འདི་ག་ཚགས་པར་ཁང་དུ་པེ་ཅིང་ནས་ཟླ་11ཚེས་28ཉིན་གློག་འཕྲིན་འབྱོར་གསལ། ཟླ་11ཚེས་28ཉིན། 2024ལོའི་ཀྲུང་གོའི་སྤུས་རྟགས་གླེང་སྟེགས་པེ་ཅིང་དུ་འཚོགས་ཤིང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཨུ་ཡོན་ཀྲང་གཞོན་པ་ཕེང་ཆིང་ཧྭ་ཚོགས་འདུར་ཕེབས་ནས་ཤིས་ཚིག་བསྒྲོན་པ་རེད།

ཚོགས་ཞུགས་སྐུ་མགྲོན་ཚོས། སྤུས་རྟགས་གཏོད་པར་ཤུགས་སྣོན་བརྒྱབ་སྟེ། ཐོན་སྐྱེད་ནུས་ཤུགས་གསར་མའི་འཕེལ་རྒྱས་ལ་རམ་འདེགས་དང་། འཕེལ་རྒྱས་ཀྱི་འདུ་ཤེས་གསར་པ་དོན་ཐོག་ཏུ་འཁྱོལ་བར་སྐུལ་འདེད། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བརྒྱུད་སྤེལ་ལ་རོགས་རམ་བཅས་བྱས་ཏེ། མི་དམངས་ཀྱི་སྤུས་ཚད་མཐོ་བའི་འཚོ་བའི་དགོས་མཁོ་དེ་བས་ལེགས་པར་སྐོང་དགོས། སྤུས་རྟགས་གཏོད་པ་ནི་བརྒྱུད་རིམ་ལྡན་པའི་འདུ་འགོད་ཅིག་ཡིན་པས། སྤྱི་ཚོགས་ཡོངས་ཀྱིས་ཐུན་མོང་ཐོག་འབད་བརྩོན་གྱིས་སྤུས་རྟགས་གཏོད་པ་དེ་བཟོ་སྐྲུན་རྒྱལ་ཁབ་སྟོབས་ཆེན་དང་སྤུས་ལེགས་རྒྱལ་ཁབ་སྟོབས་ཆེན་སོགས་རྒྱལ་ཁབ་ཀྱི་འཐབ་ཇུས་ཁྲོད་མཉམ་འདྲེས་གཏིང་ཟབ་ཡོང་བར་སྐུལ་འདེད་བཏང་སྟེ། “ཀྲུང་གོའི་སྤུས་ཚད”གོ་ལ་ཧྲིལ་པོར་ཁྱབ་པ་དང“ཀྲུང་གོའི་སྤུས་རྟགས”ཀྱིས་འཛམ་གླིང་ལ་བདེ་སྐྱིད་སྐྲུན་དགོས་པའི་ངོས་འཛིན་བྱས་པ་རེད།

ཀྲུང་གོའི་སྤུས་རྟགས་གླེང་སྟེགས་ནི་མི་དམངས་ཉིན་རེའི་ཚགས་པར་ཁང་གིས་གཙོ་གཉེར་བྱས་ཤིང་། ད་རེས་ཀྱི་གླེང་སྟེགས་ཀྱི་བརྗོད་དོན་གཙོ་བོ་ནི“ཐོན་སྐྱེད་ནུས་ཤུགས་གསར་མ་འཕེལ་རྒྱས་བཏང་ནས། སྤུས་རྟགས་རྒྱལ་ཁབ་སྟོབས་ཆེན་སྐྲུན་པར་སྐུལ་འདེད་གཏོང་དགོས”ཞེས་པ་དེ་རེད། གླེང་སྟེགས་ཀྱིས་གླེང་སྟེགས་ཨ་མ་དང་། “དངུལ་རྩའི་སྤུས་ཚད་མཐོ་བའི་འཕེལ་རྒྱས་ཀྱི་དཔེ་མཚོན་སྙན་ཞུའི་ཚོགས་འདུ” “ཏང་འཛུགས་སྐྱོང་གིས་རྙིང་ཁུངས་མིང་ཅན་སྤུས་ཚད་མཐོ་བའི་འཕེལ་རྒྱས་ལ་སྣེ་ཁྲིད་བྱེད་པའི་གླེང་སྟེགས” “ཐོན་སྐྱེད་ནུས་ཤུགས་གསར་མས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གླེང་སྟེགས”སོགས་ཡན་ལག་མཉམ་སྤེལ་གླེང་སྟེགས་3བཀོད་སྒྲིག་བྱས་ཡོད།

（ཚེ་ཁོས་བསྒྱུར། ལྷག་ཚེས་ཞུས）