▲ ད་རེས་ཀྱི་ཞིང་ལས་ཐོན་རྫས་ཚོང་འདུས་ཀྱིས“དེང་རབས་ཞིང་ལས་འཕེལ་རྒྱས་མགྱོགས་པོ་བཏང་སྟེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བ”ཞེས་པ་བརྗོད་དོན་གཙོ་བོར་བྱས་པ་དང་། གྲུབ་འབྲས་འགྲེམས་སྟོན་དང་། སྤེལ་རེས་སྐུལ་འདེད། སྤུས་རྟགས་གསར་གཏོད། ཚོང་དོན་སྐུལ་སྤེལ་བཅས་ཕྱོགས་བཞིར་གཙོ་བོར་དམིགས་པ། འགྲེམས་སྟོན་རྒྱ་ཁྱོན་སྨི་ངོས་གྲུ་ཁྲི་10ལྷག་ཙམ་ཟིན་པ། ཁེ་ལས་3000ཙམ་གྱིས་འགྲེམས་རྫས་སྣ་ཁ་ཁྲི་2ལྷག་ཙམ་ཁྱེར་ནས་འགྲེམས་སྟོན་ལ་ཞུགས་པ། སྔོན་དཔག་བྱས་ན་ཚོང་འདུས་ལ་ཞུགས་མཁན་ཆེད་ལས་ཉོ་སྒྲུབ་ཚོང་པ་ཁྲི་5ལྷག་ཙམ་ཟིན་རྒྱུ་རེད།

འདི་ག་ཚགས་པར་ཁང་དུ་པེ་ཅིང་ནས་ཟླ་11ཚེས་29ཉིན་གློག་འཕྲིན་འབྱོར་གསལ། ཟླ་11ཚེས་28ཉིན། ཀོང་ཏུང་ཞིང་ཆེན་ཀོང་ཀྲོའུ་གྲོང་ཁྱེར་དུ་ཀྲུང་གོ་རྒྱལ་སྤྱིའི་ཞིང་ལས་ཐོན་རྫས་ཚོང་འདུས་སྐབས་ཉེར་གཅིག་པ་འགོ་ཚུགས་ཤིང་། ད་རེས་ཀྱི་ཞིང་ལས་ཐོན་རྫས་ཚོང་འདུས་ཀྱིས“དེང་རབས་ཞིང་ལས་འཕེལ་རྒྱས་མགྱོགས་པོ་བཏང་སྟེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བ”ཞེས་པ་བརྗོད་དོན་གཙོ་བོར་བྱས་པ་དང་། གྲུབ་འབྲས་འགྲེམས་སྟོན་དང་། སྤེལ་རེས་སྐུལ་འདེད། སྤུས་རྟགས་གསར་གཏོད། ཚོང་དོན་སྐུལ་སྤེལ་བཅས་ཕྱོགས་བཞིར་གཙོ་བོར་དམིགས་པ། འགྲེམས་སྟོན་རྒྱ་ཁྱོན་ལ་སྨི་ངོས་གྲུ་ཁྲི་10ལྷག་ཙམ་ཟིན་པ། ཁེ་ལས་3000ཙམ་གྱིས་འགྲེམས་རྫས་སྣ་ཁ་ཁྲི་2ལྷག་ཙམ་ཁྱེར་ནས་འགྲེམས་སྟོན་ལ་ཞུགས་པ། སྔོན་དཔག་བྱས་ན་ཚོང་འདུས་ལ་ཞུགས་མཁན་ཆེད་ལས་ཉོ་སྒྲུབ་ཚོང་པ་ཁྲི་5ལྷག་ཙམ་ཟིན་རྒྱུ་རེད།

ད་རེས་ཀྱི་ཞིང་ལས་ཐོན་རྫས་ཚོང་འདུས་ཀྱིས་ཞིང་ལས་དེང་རབས་ཅན་མངོན་གསལ་དོད་པོ་ཡོང་བ་བྱས་པའི་རྨང་གཞིའི་ཐོག་སྤུས་རྟགས་ལ་བརྟེན་ནས་ཞིང་ལས་སྤུས་ཚད་མཐོ་བའི་འཕེལ་རྒྱས་ལ་སྣེ་ཁྲིད་བྱེད་པར་དམིགས་པ་དང་། སྤུས་རྟགས་གཏོད་པ་དང་འོས་སྦྱོར་བྱེད་ཤུགས་ཆེ་རུ་གཏོང་བ། བྲིན་ཚོང་དང་ཚོང་སྐུལ་གྱི་བྱེད་སྒོ་རབ་དང་རིམ་པ་སྤེལ་བ། དྲ་ཐོག་དང་དྲ་ཕྱི་མཉམ་འགུལ་གྱིས་འོས་སྦྱོར་བྱས་ནས་ཞིང་ལས་ཐོན་རྫས་ཐོན་སྐྱེད་དང་ཕྱིར་ཚོང་འབྲེལ་མཐུད་ལ་སྐུལ་འདེད་ཤུགས་ཆེན་བཏང་སྟེ་སྤུས་ཚད་མཐོ་བའི་ཞིང་ལས་མཉམ་ལས་སྤེལ་རེས་ཀྱི་ལས་སྟེགས་བཏོད་ཡོད། ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་ཀྱི་སྤུས་རྟགས་ཞིང་ལས་ཐོན་རྫས་དང་གྲོང་གསེབ་ཀྱི་རོགས་སྐྱོར་ཐོན་ལས་རྩེ་གྲ་སོགས་ཀྱི་འགྲེམས་ཁུལ་ཁྱོན་12བཙུགས་ཡོད་པ་དང་འགྲེམས་སྟོན་བྱེད་པའི་ཁོངས་སུ་སྤུས་ལེགས་དང་ཁྱད་ལྡན་ཞིང་ལས་ཐོན་རྫས་དང་། མངོན་མིན་རིག་གནས་ཤུལ་བཞག་གི་ལག་ཤེས་ཐོན་རྫས། ཞིང་འཕྲུལ་སྒྲིག་ཆས་བཀོལ་སྤྱོད་སོགས་ཚུད་ཡོད་པ་རེད།

ཤེས་རྟོགས་བྱུང་བ་ལྟར་ན། ད་རེས་ཀྱི་ཞིང་ལས་ཐོན་རྫས་ཚོང་འདུས་ཀྱིས་ཧ་སག་སི་ཐན་ཉིད་སྐུ་མགྲོན་གཙོ་བོའི་རྒྱལ་ཁབ་ལ་གཏན་འཁེལ་བྱས་པ་དང་ཨེ་ཤེ་ཡ་དབུས་མའི་རྒྱལ་ཁབ་ལྔས་གཙོ་བོར་བྱས་པའི་རྒྱལ་སྤྱིའི་མཉམ་ལས་ཀྱི་འགྲེམས་ཁུལ་ཆེད་མངགས་བཙུགས་པར་རྒྱལ་ཁབ་15ནས་ཡོང་བའི་སྤུས་ལེགས་ཁེ་ལས་འགྲེམས་སྟོན་ནང་ཞུགས་པའི་ཡིད་དབང་བཀུག་ཡོད་པ་རེད།

ཚེས་29ཉིན། ད་རེས་ཀྱི་ཞིང་ལས་ཐོན་རྫས་ཚོང་འདུས་ཐོག་རྒྱལ་ཡོངས་ཀྱི་ཞིང་ལས་ཐོན་རྫས་ཉོ་སྒྲུབ་ཚོང་པའི་མནའ་འབྲེལ་བཙུགས་ཤིང་། མནའ་འབྲེལ་དེས་ཞིང་ལས་ཐོན་རྫས་བྲིན་ཁ་རྒྱུག་པོ་མེད་པ་དང་འཚོང་དཀའ་བར་ཁ་གཏད་གཅོག་རྒྱུར་གཞོལ་བ་དང་། ཞིང་ལས་ཐོན་རྫས་གཉེར་ཚོང་གི་ཞབས་ཞུའི་མ་ལག་འཛུགས་པར་སྐུལ་འདེད་གཏོང་བ། ས་གནས་ཁག་གི་འགྲེམས་ཚོགས་དང་འབྲེལ་མཐུད་འོས་སྦྱོར་བྱེད་སྒོར་ཞབས་འདེགས་ཧུར་ཐག་ཞུ་བ་བཅས་བྱས་ནས་ཞིང་ལས་ཐོན་རྫས་འཁོར་རྒྱུག་ལ་སྐུལ་འདེད་གཏོང་རྒྱུ་ཡིན་པ་རེད།

（གནམ་ཕྱུག་རྒྱལ་གྱིས་བསྒྱུར། སྤེན་ཚེས་ཞུས）