ཤིན་ཧྭ་གསར་འགྱུར་ཁང་དུ་གྲོང་ཁྱེར་པཱ་སའེ་ལུའོ་ནཱ་ནས་གློག་འཕྲིན་འབྱོར་བ་གཞིར་བཟུང་། ཚེས་23ཉིན། ཀྲུང་གོའི་རླངས་འཁོར་བཟོ་སྐྲུན་ཁེ་ལས་ཆི་རུའེ་དང་སི་ཕེན་གྱི་ཨའེ་པུའུ་ལུའོ་ཀུང་སིས། པཱ་སའེ་ལུའོ་ནཱ་རང་མོས་ཚོང་དོན་ཁུལ་དུ་མ་རྩ་མཉམ་བཞག་གིས་བཙུཌ་པའི་ཨའེ་པུའུ་ལུའོ་བཟོ་གྲྭས། རླངས་འཁོར་བཟོ་དབྱིབས་དང་པོ་དངོས་སུ་ཐོན་སྐྱེད་བྱེད་འགོ་ཚུགས་པ་རེད།

ད་ཐེངས་ཨའེ་པུའུ་ལུའོ་བཟོ་གྲྭས་ཐོན་སྐྱེད་བྱས་པའི་རླངས་འཁོར་བཟོ་དབྱིབས་དང་པོ་ནི་SUVS700ཡིན་ཞིང་། དེ་རྗེས་ཀྱི་གཟའ་འཁོར་འགའི་རིང་། ད་དུང་བཟོ་གྲྭས་S800ཐོན་སྐྱེད་བྱ་རྒྱུ་རེད། འཆར་གཞི་ལྟར་ན། ཨའེ་པུའུ་ལའོ་བཟོ་གྲྭས་2025ལོར་ཚ་ལ་རྒྱག་པ་དང་། ཚོན་རྩི་གཏོར་བྱུག རླངས་འཁོར་སྒྲིག་སྦྱོར་སོགས་ཀྱི་ལྷུ་ཚིགས་ཐོན་སྐྱེད་བརྒྱུད་རིམ་ནང་བཅུག་ནས་བཟོ་གྲྭའི་ཐོན་ནུས་སྔར་བས་ཆེ་རུ་གཏོང་རྒྱུ་དང་འབྲེལ། ས་གནས་དེ་གའི་མཁོ་སྤྲོད་འཁོར་འབྲེལ་ལ་ཤུགས་སྣོན་བརྒྱབ་པ་བརྒྱུད་མཐའ་འཁོར་གྱི་དཔལ་འབྱོར་འཕེལ་རྒྱས་ལ་སྐུལ་ཁྲིད་ཀྱིས། ས་ཁོངས་ཀྱི་བཟོ་ལས་སྐྱེ་ཁམས་ལ་གསོན་ཤུགས་སྣོན་རྒྱུ་རེད།

ཅ་ཐའེ་ལུའོ་ཉི་ཡཱ་རང་སྐྱོང་ཁུལ་གྱི་ཀྲུའུ་ཞི་སར་ཝ་ཏུའོ·དབྱི་ལི་ཡཱ་ཡིས་འགོ་ཚུགས་མཛད་སྒོ་གཙོ་སྐྱོང་གནང་ཞིང་། ཁོང་གིས། སི་ཕན་དང་ཀྲུང་གོའི་འབྲེལ་བ་འཕེལ་རྒྱས་བརྟན་པོ་ཕྱིན་ཡོད། ཕྱོགས་གཉིས་པོས་ཚོང་ལས་དང་། ལག་རྩལ། རིག་གནས། སློབ་གསོ། ཚན་རིག བཟོ་ལས་སོགས་ཐད་ཀྱི་མཉམ་ལས་ལ་ཐོག་མཐའ་བར་གསུམ་དུ་གཞོལ་བཞིན་ཡོད། ཨའེ་པུའུ་ལུའོ་བཟོ་གྲྭའི་རླངས་འཁོར་བཟོ་དབྱིབས་གསར་པ་ཐོན་སྐྱེད་བྱེད་འགོ་ཚུགས་པ་ནི་དཔེ་མཚོན་ཡག་པོ་ཞིག་རེད་ཅེས་བརྗོད་པ་རེད།

(ཚེ་རིང་བུ་ཁྲིད་ཀྱིས་བསྒྱུར། པ་ཚེས་ཞུས)