འདི་ག་ཚགས་པར་ཁང་དུ་ཧྥུའུ་ཀྲོའུ་ནས་གློག་འཕྲིན་འབྱོར་གསལ། ཉིན་ཤས་གོང་། སྲོལ་རྒྱུན་བཟོ་རྩལ་གྱི་སྤུས་ཚད་མཐོ་བའི་རྒྱུན་འཛིན་འཕེལ་རྒྱས་དང་མངོན་མིན་རིག་གནས་ཤུལ་བཞག་གིས་གྲོང་གསེབ་དར་རྒྱས་ལ་རམ་འདེགས་བྱེད་པའི་ས་གནས་ས་ཐོག་གི་ཚོགས་འདུ་ཧྥུའུ་ཅན་ཞིང་ཆེན་ལུང་ཡན་གྲོང་ཁྱེར་ཡུང་ཏིང་ཆུས་སུ་འཚོགས་པ་རེད།
ཚོགས་འདུའི་ཐོག་བསྟན་དོན། ཞི་ཅིན་ཕིང་གི་རིག་གནས་དགོངས་པའི་ཚན་རིག་དང་མཐུན་པའི་མཛུབ་ཁྲིད་འོག འབྲེལ་ཡོད་སྡེ་ཚན་གྱིས་འབྲེལ་གཏུག་མཐུན་སྦྱོར་དམ་ཟབ་དང་། རྩེ་རིམ་ཇུས་འགོད་ལ་ཤུགས་སྣོན་རྒྱག་པ། ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བའི་སྒོ་ནས་ས་གནས་ཁག་གིས་མངོན་མིན་རིག་གནས་ཤུལ་བཞག་ལ་བརྟེན་ཏེ་གྲོང་གསེབ་དར་རྒྱས་ལ་རམ་འདེགས་བྱེད་པར་རྒྱབ་སྐྱོར་བྱས་ནས་ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་དང་། ལས་ཞུགས་འབབ་འཕར་ལ་སྐུལ་ཁྲིད། གནས་འཕྲོད་ལས་འཚམ་དང་འཆམ་མཐུན་གྲོང་གསེབ་འཛུགས་སྐྲུན་ལ་རམ་འདེགས་བཅས་བྱས་ཡོད། མིག་སྔའི་བར་ས་གནས་ཁག་གིས་མངོན་མིན་རིག་གནས་ཤུལ་བཞག་བཟོ་ཁང་9100ལྷག་ཙམ་བསྐྲུན་པ་དེ་དག་རྫོང་ཁོངས་1721ལ་ཁྱབ་པ་དང་། དབུལ་སྒྲོལ་མང་ཚོགས་ཁྲི་27ལ་ཐད་ཀར་ལས་ཞུགས་ཐུབ་པ། མི་རེའི་ཆ་སྙོམས་ལོའི་ཡོང་འབབ་སྒོར་ཁྲི་3.6ལྷག་ཙམ་ཟིན་ནས་ས་གནས་དེ་གའི་མང་ཚོགས་ཀྱིས་རང་ཉིད་ཀྱི་ལག་གཉིས་ལ་བརྟེན་ནས་བདེ་སྐྱིད་དང་མཛེས་སྡུག་ལྡན་པའི་འཚོ་བ་གཏོད་རོགས་བྱས་པ་རེད།
ཚོགས་འདུའི་ཐོག་བླང་བྱ་བཏོན་དོན། ཞི་ཅིན་ཕིང་གི་རིག་གནས་དགོངས་པ་དང“ཞིང་གསུམ”ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ། ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱེད་པ་དང་། སྒྱུར་བཅོས་གསར་གཏོད་དང་སྤུས་འབྲས་ལེགས་གཉེར་མཐའ་འཁྱོངས་བྱེད་པ། ཁུར་མཉམ་ལེན་དང་དོན་སྤྱི་སྒྲུབ་ཀྱི་ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བ། བརྒྱུད་རིམ་ལྡན་པའི་ངང་སྐུལ་འདེད་གཏོང་བའི་འཕེལ་རྒྱས་ཀྱི་རྣམ་པ་གཏོད་པ། གྲོང་གསེབ་ཀྱི་མངོན་མིན་རིག་གནས་ཤུལ་བཞག་སྲུང་སྐྱོང་གི་ལས་ཀའི་མ་ལག་འཐུས་སྒོ་ཚང་དུ་གཏོང་བ། མངོན་མིན་རིག་གནས་ཤུལ་བཞག་བཟོ་ཁང་གི་སྤུས་འབྲས་ལེགས་གཉེར་ལ་སྐུལ་འདེད་གཏོང་བ། ཤེས་ལྡན་པའི་དཔུང་ཁག་འཛུགས་སྐྱོང་བྱེད་ཤུགས་ཆེ་རུ་གཏོང་བ། ལས་ཀའི་བྱེད་ཐབས་གསར་གཏོད་དང་ཕུན་སུམ་ཚོགས་སུ་གཏོང་བ་བཅས་བྱས་ཏེ། མངོན་མིན་རིག་གནས་ཤུལ་བཞག་གིས་གྲོང་གསེབ་དར་རྒྱས་ལ་རམ་འདེགས་བྱེད་པའི་ལས་དོན་ལ་མུ་མཐུད་དམ་འཛིན་ཡག་པོ་བྱེད་དགོས།
（བདེ་དབང་གིས་སྒྱུར་ཞུས་བྱས）