འདི་ག་ཚགས་པར་ཁང་དུ་གནས་ཚུལ་འབྱོར་གསལ། ཉེ་ཆར། ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གིས《གྲངས་འཛིན་ཚོང་དོན་སྒྱུར་བཅོས་གསར་གཏོད་དང་འཕེལ་རྒྱས་གཏོང་རྒྱུའི་སྐོར་གྱི་བསམ་འཆར》བཀྲམ་པ་རེད།

《བསམ་འཆར》ནང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་ཀྱིས་ཏང་གི་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ལག་བསྟར་གཏིང་ཟབ་བྱེད་པ་དང་། གོང་འཕེལ་གྱི་བསམ་གཞི་གསར་པ་ཆ་ཚང་བ་དང་། གནད་ལ་འཁེལ་བ། ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། བརྟན་ཐོག་ཡར་བརྩོན་གྱི་ལས་ཀའི་རྩ་བའི་དགོངས་གཞི་མཐའ་འཁྱོངས་བྱེད་པ། འཕེལ་རྒྱས་ཀྱི་རྣམ་པ་གསར་པ་གཏོད་རྒྱུར་ཞབས་འདེགས་ཞུ་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཤུགས་ཆེན་གཏོང་བ། རྒྱལ་ནང་དང་རྒྱལ་སྤྱིའི་སྤྱི་ཡོངས་གཉིས་སྤྱི་འདོམས་བྱེད་པ། འཕེལ་རྒྱས་དང་བདེ་འཇགས་སྤྱི་འདོམས་བྱེད་པ། དངོས་གཞིའི་དཔལ་འབྱོར་དང་གྲངས་འཛིན་དཔལ་འབྱོར་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་བ། གྲངས་འཛིན་ཚོང་དོན་སྒྱུར་བཅོས་གསར་གཏོད་དང་འཕེལ་རྒྱས་ལ་སྐུལ་འདེད་གཏོང་བ་བཅས་བྱས་ཏེ། ཕྱི་ཕྱོགས་ཚོང་དོན་འཕེལ་རྒྱས་ཀྱི་སྒུལ་ནུས་གསར་པ་དང་ལེགས་ཆ་གསར་པ་བཏོད་ནས་གྲངས་འཛིན་ཀྲུང་གོ་དང་ཚོང་དོན་རྒྱལ་ཁབ་སྟོབས་ཆེན་འཛུགས་སྐྲུན་མགྱོགས་པོ་བྱ་ཆེད་དེ་བས་ཆེ་བའི་ལེགས་སྐྱེས་འབུལ་དགོས་པའི་བླང་བྱ་བཏོན་ཡོད་པ་རེད།

གསར་གཏོད་གཙོ་གནད་དང་བདེ་འཇགས་རྨང་གཞིར་བྱེད་པ་དང་། སྒོ་མོ་འབྱེད་རྒྱ་ཆེ་རུ་གཏོང་བ་དང་མཉམ་ལས་གཉིས་ཕན་ཡོང་བར་བྱེད་པ། སྒྱུར་བཅོས་ཟབ་ཏུ་གཏོང་བ་དང་བརྒྱུད་རིམ་ལྡན་པའི་བཅོས་སྒྲིག་བྱེད་པ། སྔོན་ལ་ཚོད་ལྟ་བྱེད་པ་དང་གཙོ་གནད་ཚད་བརྒལ་ཡོང་བ་བྱེད་པ་བཅས་ཀྱི་རྩ་དོན་གཞིར་བཟུང་གྲངས་འཛིན་ཚོང་དོན་སྒྱུར་བཅོས་གསར་གཏོད་དང་འཕེལ་རྒྱས་ལ་སྐུལ་འདེད་གཏོང་དགོས། དམིགས་ཚད་གཙོ་བོ་ནི། 2029ལོར་སླེབས་སྐབས་གྲངས་འཛིན་ཅན་གྱི་རྩིས་སྤྲོད་ཆོག་པའི་ཞབས་ཞུའི་ཚོང་དོན་གྱི་གཞི་ཁྱོན་བརྟན་པོའི་ཁྲོད་མང་དུ་འགྲོ་རྒྱུ་དེས་རང་རྒྱལ་གྱི་ཞབས་ཞུའི་ཚོང་དོན་གྱི་བསྡོམས་འབོར་ནང་བཟུང་བའི་བསྡུར་ཚད་45%ཡན་མཐོ་རུ་གཏོང་རྒྱུ་དང་། གྲངས་འཛིན་ཚོང་དོན་གྱི་རྨང་གཞིའི་སྒྲིག་བཀོད་ཀྱི་བཀོད་པ་སྔར་བས་འཐུས་སྒོ་ཚང་དུ་གཏོང་བ་དང་། གྲངས་འཛིན་ཚོང་དོན་འཕེལ་རྒྱས་དང་འཚམ་པའི་སྒྲིག་སྲོལ་དང་ལམ་སྲོལ་གཞི་རྩའི་ཆ་ནས་འཛུགས་པ། གྲངས་འཛིན་ཁྱབ་ཁོངས་ཀྱི་ཕྱི་ཕྱོགས་ལ་སྒོ་མོ་འབྱེད་པའི་ཆུ་ཚད་མཐོ་རུ་ཤུགས་ཆེན་གཏོང་བ་བཅས་བྱས་ནས་རྒྱལ་སྤྱིའི་ཚད་གཞི་མཐོ་བའི་དཔལ་འབྱོར་ཚོང་དོན་གྱི་སྒྲིག་སྲོལ་དང་སྦྲེལ་མཐུད་བྱེད་པར་ཕྱོགས་ཡོངས་ནས་ཤུགས་སྣོན་རྒྱག་རྒྱུ་དེ་ཡིན་པ་དང་། 2035ལོར་སླེབས་སྐབས་གྲངས་འཛིན་ཅན་གྱི་རྩིས་སྤྲོད་ཆོག་པའི་ཞབས་ཞུའི་ཚོང་དོན་གྱི་གཞི་ཁྱོན་གྱིས་རང་རྒྱལ་གྱི་ཞབས་ཞུའི་ཚོང་དོན་གྱི་བསྡོམས་འབོར་ནང་བཟུང་བའི་བསྡུར་ཚད་50%ཡན་མཐོ་རུ་གཏོང་རྒྱུ་དང་། གོ་རིམ་ལྡན་པ་དང་། བདེ་འཇགས། ནུས་ཆེ་བཅས་ཀྱི་གྲངས་འཛིན་ཚོང་དོན་བཅོས་སྐྱོང་མ་ལག་ཕྱོགས་ཡོངས་ནས་འཛུགས་པ་དང་ལམ་ལུགས་རྣམ་པའི་སྒོ་དབྱེའི་ཆུ་ཚད་ཕྱོགས་ཡོངས་ནས་མཐོ་རུ་གཏོང་རྒྱུ་དེ་རེད།

（སྐལ་མཆོག་གིས་བསྒྱུར། ལྷག་ཚེས་ཞུས）