འདི་ག་ཚགས་པར་ཁང་དུ་གྲོང་ཁྱེར་ལི་གཡོད་རེ་ནེ་ལུའུ་ནས་གློག་འཕྲིན་འབྱོར་གསལ། མི་དམངས་ཉིན་རེའི་ཚགས་པར་དང་པར་ཙིར་སྨྱན་སྦྱོར་གྱི“ལག་གདང་སྦྲེལ་ནས་ཀྲུང་པར་གྱི་ལས་དབང་གཅིག་མཐུན་ཚོགས་པ་གཏོད་རྒྱུར་སྐུལ་འདེད་གཏོང་དགོས”ཞེས་པའི་མཉམ་འབྲེལ་བཅར་འདྲི་ཚོགས་པས་ཉེ་ཆར་པར་ཙིར་གྱི་མའེ་ལི་ཧྲན་རི་བོའི་དམིགས་བསལ་གློག་ཆེན་གྱི་ཐད་རྒྱུག་གློག་འདྲེན་གྱི་དུས་ཐེངས་གཉིས་པའི་རྣམ་གྲངས་ཀྱི་ལི་གཡོད་གློག་སྒྱུར་ས་ཚིགས་སུ་བཅར་འདྲི་བྱས་པ་རེད།

མི་དམངས་ཉིན་རེའི་ཚགས་པར་གྱི་གསར་འགོད་པ་དང《ཚོང་ལས་ལྟ་ཞིབ་ཚགས་པར》དང《པར་ཙིར་ཉིན་རེའི་ཚགས་པར》སོགས་པར་ཙིར་གྱི་སྨྱན་སྦྱོར་གསར་འགོད་པ་མང་པོ་ཞིག་གིས་ས་གནས་ས་ཐོག་ཏུ་གློག་སྒྱུར་སྒྲིག་ཆས་དང་ཚོད་འཛིན་ཁང་སོགས་ལ་ལྟ་སྐོར་བྱས་ཏེ་རྣམ་གྲངས་གཉེར་སྐྱོང་གི་ད་ལྟའི་གནས་ཚུལ་དང་ཀྲུང་གོ་དང་པར་ཙིར་གྱི་ནུས་རྒྱུ་མཉམ་ལས་སོགས་གློག་སྒྱུར་ས་ཚིགས་ཀྱི་ཀྲུང་པར་རྒྱལ་ཁབ་གཉིས་ཀྱི་ལས་མིར་བཅར་འདྲི་བྱས་པ་རེད། དེ་ཉིན་རྒྱལ་ཁབ་གཉིས་ཀྱི་སྨྱན་སྦྱོར་གསར་འགོད་པས་ད་དུང་རྒྱལ་ཁབ་གློག་དྲ་པར་ཙིར་མ་རྐང་ཚོད་འཛིན་ཀུང་སིའི་སྤྱི་ཁྱབ་པུའུ་རུ་བསྐྱོད་དེ་རྒྱལ་ཁབ་གློག་དྲ་ཀུང་སིའི་རོགས་རམ་འོག་སྤེལ་བའི“མ་ལེའི་འབྱུང་འགྱུར་གྱི་རླབས་རྒྱུན”ཞེས་པའི་མཉམ་སྒྲོག་རོལ་དབྱངས་ཚོགས་པ་དང་ཝ་ལུང་གི་གནའ་བོའི་གྲུ་ཁའི་གནའ་རྫས་རྟོག་ཞིབ་རྗེས་ཤུལ་སྲུང་སྐྱོང་སོགས་སྤྱི་ཚོགས་ཀྱི་སྤྱི་ཕན་རྣམ་གྲངས་ཤེས་རྟོགས་བྱས་པ་དང་འབྲེལ་ཁེ་ལས་ཀྱི་འཐུས་མི་དང་བཞུགས་མོལ་སྤེལ་རེས་ཀྱང་བྱས་པ་རེད།

2014ལོའི་ཟླ་7པར་ཀྲུའུ་ཞི་ཞི་ཅིན་ཕིང་དང་སྐབས་དེ་དུས་ཀྱི་པར་ཙིར་གྱི་ཙུང་ཐུང་ལུའོ་སའེ་ཕུའུ་གཉིས་པོའི་བདེན་དཔང་འོག་ཀྲུང་གོ་རྒྱལ་ཁབ་གློག་དྲ་ཀུང་སི་དང་པར་ཙིར་རྒྱལ་ཁབ་གློག་ཤུགས་ཀུང་སིའི་དབར་པར་ཙིར་གྱི་མའེ་ལི་ཧྲན་རི་བོའི་དམིགས་བསལ་གློག་ཆེན་གྱི་གློག་འདྲེན་རྣམ་གྲངས་ཀྱི་མ་འཇོག་མཉམ་ལས་གྲོས་མཐུན་ལ་མིང་རྟགས་བཀོད་པ་རེད། རྣམ་གྲངས་དེ་པར་ཙིར་གྱི་ཀྲོའུ་5བརྒལ་ནས་བྱང་རྒྱུད་ཀྱི་མའེ་ལི་ཧྲན་རི་བོའི་ཆུ་ཤུགས་གློག་ཁང་ལས་ཐོན་པའི་ནུས་རྒྱུ་གཙང་མ་དེ་མི་འབོར་མང་བའི་ཤར་ལྷོའི་རྒྱུད་དུ་འདྲེན་གཏོང་བྱས་པས་མི་ཁྲི་2200ཡི་གློག་སྤྱོད་དགོས་མཁོ་བསྐངས་ཡོད། མཉམ་འབྲེལ་བཅར་འདྲིར་ཞུགས་མཁན་པར་ཙིར་གྱི་སྨྱན་སྦྱོར་གསར་འགོད་པས་ཀྲུང་གོའི་ཁེ་ལས་ཀྱིས་ས་གནས་དེ་གའི་གློག་ཤུགས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་ལ་སྐུལ་འདེད་བཏང་ནས་ས་གནས་དེ་གའི་སྤྱི་ཚོགས་དང་དཔལ་འབྱོར་འཕེལ་རྒྱས་ལ་སྐུལ་ཁྲིད་ནུས་ལྡན་བྱས་པ་མ་ཟད། ད་དུང་སྤྱི་ཚོགས་ཀྱི་རྣམ་གྲངས་རབ་དང་རིམ་པ་ལག་བསྟར་བྱས་ནས་དམངས་འཚོ་ལེགས་སུ་གཏོང་རོགས་བྱས་ཡོད། རྒྱལ་ཁབ་གཉིས་པོའི་སྨྱན་སྦྱོར་གྱིས་སྤེལ་རེས་ལ་ཤུགས་སྣོན་རྒྱག་པ་དང་མཉམ་འབྲེལ་བཅར་འདྲི་སོགས་བྱས་པ་བརྒྱུད་རྒྱལ་ཁབ་གཉིས་པོའི་དམངས་ཚོགས་དབར་ཕན་ཚུན་ཤེས་རྟོགས་དང་འབྲེལ་གཏུག་བྱེད་པར་སྔར་བས་སྐུལ་འདེད་བཏང་སྟེ་ལག་གདང་སྦྲེལ་ནས་ཀྲུང་པར་རྒྱལ་ཁབ་གཉིས་པོའི་ལས་དབང་གཅིག་མཐུན་ཚོགས་པ་གཏོད་རྒྱུར་སྐུལ་འདེད་གཏོང་ཆེད་སྨྱན་སྦྱོར་གྱི་སྟོབས་ཤུགས་ལེགས་སྐྱེས་སུ་འབུལ་རྒྱུ་ཡིན་ཞེས་བརྗོད།