འདི་ག་ཚགས་པར་ཁང་དུ་ཆིང་ཏའོ་ནས་གློག་འཕྲིན་འབྱོར་གསལ། ཟླ་8ཚེས་27ནས་29ཉིན་བར། རྒྱལ་སྒྲོལ་ཀུང་སིའི་འགོ་ཁྲིད་པའི་ཆིང་ཏའོ་ཡི་དབུ་ཚོགས་སྐབས་ལྔ་པ་ཧྲན་ཏུང་ཆིང་ཏའོ་རུ་འཚོགས་པ་རེད། སྐབས་འདིའི་དབུ་ཚོགས་ནི་ཚོང་དོན་པུའུ་དང་ཧྲན་ཏུང་ཞིང་ཆེན་སྲིད་གཞུང་གིས་མཉམ་དུ་གཉེར་བ་དང“རྒྱལ་སྒྲོལ་ཀུང་སི་དང་ཀྲུང་གོ”ཞེས་པའི་བརྗོད་དོན་གཙོ་བོ་མུ་མཐུད་སྤྱད་དེ་དབུ་ཚོགས་འཚོག་རིང་འགོ་ཚུགས་མཛད་སྒོ་དང་། རྒྱལ་སྒྲོལ་ཀུང་སིའི་འཕེལ་རྒྱས་གླེང་སྟེགས། རྒྱལ་སྒྲོལ་ཀུང་སིའི་མ་འཇོག་སྤེལ་རེས་མཉམ་ལས་ཚོགས་འདུ། ཧྲང་ཧའེ་མཉམ་ལས་དཔེ་སྟོན་ཁུལ་གྱི་ཆེད་དོན་འོས་སྦྱོར་ངོ་སྤྲོད་ཚོགས་འདུ། ཀྲུང་གོ་དང་ཡོ་རོབ（ཆིང་ཏའོ）ཀྱི་ལྗང་མདོག་དང་རྒྱུན་མཐུད་ཆོག་པའི་འཕེལ་རྒྱས་གླེང་སྟེགས། གཙོ་མགྲོན་ཞིང་ཆེན་གྱི་འོས་སྦྱོར་ངོ་སྤྲོད་སོགས་ཀྱི་བྱེད་སྒོ་རབ་དང་རིམ་པ་སྤེལ་བ་རེད། རྒྱལ་སྒྲོལ་ཀུང་སི་451ནས་ཡོང་བའི་འཐུས་མི་550ལྷག་ཙམ་སྐབས་འདིའི་དབུ་ཚོགས་ལ་ཞུགས་པ་དང་དེའི་ཁྲོད་དབུ་ཚོགས་ལ་ཞུགས་ཐེངས་དང་པོ་ཡིན་པའི་རྒྱལ་སྒྲོལ་ཀུང་སི་99ཡོད་པ་རེད།

དབུ་ཚོགས་ཐོག་ཚོང་དོན་པུའི་རྒྱལ་སྤྱིའི་ཚོང་དོན་དཔལ་འབྱོར་མཉམ་ལས་ཞིབ་འཇུག་ཁང་གིས《རྒྱལ་སྒྲོལ་ཀུང་སི་ཀྲུང་གོར་ཡོད་པ།“ཀྲུང་གོའི་ལུགས་ཀྱི་དེང་རབས་ཅན”གྱི་གོ་སྐབས་གསར་པ་མཉམ་སྤྱོད་བྱེད》ཅེས་པའི་ཞིབ་འཇུག་སྙན་ཞུ་ཁྱབ་བསྒྲགས་བྱས་པ་རེད། སྙན་ཞུའི་ནང་2023ལོའི་བར་ཀྲུང་གོས་ཕྱི་རྒྱལ་ཚོང་པའི་ཐད་ཀའི་མ་འཇོག་དངོས་སུ་སྤྱོད་པའི་གཞི་ཁྱོན་སྔར་བཞིན་ཉེ་བའི་ལོ་10ཡི་རིང་གི་ཆུ་ཚད་ཅུང་མཐོ་སར་གནས་པ་དང་ལས་རིགས་ཀྱི་གྲུབ་ཆ་དང་ས་ཁུལ་གྱི་བཀོད་པ་རྒྱུན་ཆད་མེད་པར་ལེགས་སུ་ཕྱིན་ནས། 2024ལོའི་ལོ་སྟོད་དུ་རྒྱལ་ཡོངས་སུ་གསར་དུ་བཙུགས་པའི་ཕྱི་རྒྱལ་གྱི་མ་འཇོག་ཁེ་ལས་ཀྱི་གྲངས་འབོར་དུས་མཚུངས་ལས་14.2%འཕར་ཡོད་ཅེས་འཁོད་ཡོད་པ་རེད།

（ལྷག་ཚེས་བསྒྱུར། སྒྲོན་ལགས་ཀྱིས་ཞུས）