※ ཡག་པའི་ཡོན་ཏན་བླངས་ན་དགའ།

ཉེས་པའི་བྱ་སྤྱོད་དོར་ན་དགའ།

※ ཁ་སོ་མེད་ཞིམ་པོའི་ཟས་དང་བྲལ།

ལག་ནོར་མེད་ཉེ་བའི་གཉེན་དང་བྲལ།

※ གདོང་ཆེན་ཁོག་པ་སྤུ་ཡིས་བརྒྱངས།

མི་ཆེན་ཁོག་པ་གཏམ་གྱིས་བརྒྱངས།

※ འགྲོ་མི་ཤེས་རྐང་པ་གཡང་ལ་ཤོར།

ཤོད་མི་ཤེས་ཚིག་སྣེ་སྐྱོན་ལ་ཐུག

※ སྦྱིན་པའི་ཟས་ལ་ཆེ་ཆུང་དང་།

གནོད་པའི་ཚིག་ལ་མང་ཉུང་མེད།

※ སྐེ་དམར་པོ་མ་བཅད་ན།

ཁྲག་དམར་པོ་ག་ནས་ཐོན།

※ བོང་བུས་གཡག་ལ་བཀོད་པ།

དུང་ལ་དཀར་རྩིའི་རི་མོ།

※ ཚོད་མེད་མི་ལ་གྲོས་མ་འདྲི།

ཁ་མང་མི་ལ་སྙིང་མ་སྟོན།

※ མི་ཁོག་གཏམ་གྱིས་བཀྲུ་དགོས།

རྫ་ཁོག་ཆུ་ཡིས་བཀྲུ་དགོས།

※ ལས་ག་ལེར་བྱས་ན་བསམ་དོན་འགྲུབ།

གཏམ་ག་ལེར་བཤད་ན་ཚིག་བརྡ་འཕྲོད།

※ སྦྱངས་པ་ཐམས་ཅད་མཁས་པ་ཡིན།

ལུག་རྫི་འུར་རྡོ་རྒྱག་པར་མཁས།

※ མི་འགྲོ་བའི་ལམ། ཙི་ཙི་འགྲོ་བའི་ཨི་ཁུང་།

※ སྐོར་བ་རི་ལ་བསྐོར། འདེད་ས་གླ་བ་ཡིན།

※ རང་རྒྱུས་ལོན་པ་མཁས་པ་དང་།

རང་ཚུགས་ཐུབ་པ་དཔའ་བོ་ཡིན།

※ མུན་ནག་གི་མཚན་མོ་ཇི་ལྟར་རིང་ཡང་།

སྐྱ་རེངས་ཀྱི་ལམ་བུ་འགོག་མི་ཐུབ།

※ ལས་ངན་པའི་སྡིག་པ་མ་བསགས་ན།

སྐྲག་དགོས་པའི་གཤིན་རྗེ་ཆོས་རྒྱལ་མེད།

※ དགེ་སེམས་མེད་པའི་ཆོས་པ་དེ།

སྤྱང་ཀིས་ཆོས་གོས་གྱོན་པ་འདྲ།