དཔྱིད་ཀ
དཔྱིད་ཀ་ནི་ཁམ་བུའི་མེ་ཏོག་གི་རྣ་རྒྱན་བཏགས་པའི།
བུ་མོ་ཆུང་ཆུང་དེ་ཡིན།
དཔྱིད་ཀ་ནི་རྩྭ་ལྗང་མཉེན་མོ་གདན་དུ་བཏིང་པའི།
བུ་མོ་ཆུང་ཆུང་དེ་ཡིན།
གཅེས་མིང་ལ་རེ་བ་ཟེར་བའི་བུ་མོ་ཆུང་ཆུང་དེས།
མ་འོངས་ཞེས་པའི་ཤོག་དཀར་གྱི་སྟེང་དུ།
ཁྲ་ཆིལ་ཆིལ་གྱི་རྨི་ལམ་འབྲི།
འོད་ལམ་ལམ་གྱི་སང་ཉིན་འབྲི།
བྱིའུ་ཆུང་དག་གི་གྲེ་འགྱུར་སྙན་མོ།
བུ་མོ་ཆུང་ཆུང་ལ་བླངས་པ་དང་།
ཆུ་ཕྲན་འདི་ཡང་།
བུ་མོ་ཆུང་ཆུང་བཞིན།
མ་འོངས་འཚོལ་བར་ཆས་སོང་།
ཨ་མའི་ཨམ་ཕྲག
ང་རང་སྐྱེ་དུས་སུ།
ཨ་མའི་ཨམ་ཕྲག་ནས།
འོ་མའི་ཆུ་རྒྱུན་བརྡོལ་ཡོང་བས།
ཨ་མའི་ཨམ་ཕྲག་ནི།
ཚེ་སྲོག་གི་མ་མ་དེ་ཡིན་ཨང་།
ང་རང་བྱིས་པའི་དུས།
ཨ་མའི་ཨམ་ཕྲག་ནས།
སྐབས་རེ་བྱི་རིལ་ཐོན་ཡོང་།
སྐབས་རེ་ཀུ་ཤུ་སྨིན་ཡོང་།
སྐབས་རེ་རྩེད་ཆས་སྦྱིན་ཡོང་བས།
ཨ་མའི་ཨམ་ཕྲག་ནི།
སྒྱུ་མ་མཁན་གྱི་ཁུག་མ་དེ་ཅི་ལ་མིན།
མིག་ཧྲིག་ཧྲིག་གིས།
ཨ་མའི་ཨམ་ཕྲག་ལ་ལྟ་དུས།
ཨ་མའི་ཨམ་ཕྲག་གིས།
ངའི་རེ་བ། ཆུད་ཟོས་སུ་གཏན་ནས་གཏོང་མ་མྱོང་།