སྦྲུལ་ཞིག་ཤིང་བཟོ་ར་བ་ཞིག་ཏུ་འཛུལ་བ་དང་། གྱང་ཟུར་དུ་སླེབས་དུས་སོག་ལེ་ཞིག་གི་སྟེང་དུ་འཛེག་ནས་ཕྱིན་པས། སྟབས་མ་ལེགས་པར་ལུས་ལ་རྨས་སྐྱོན་ཕྲན་བུ་ཕོག སྦྲུལ་དེའི་བསམ་པར་སོག་ལེས་རང་ལ་གནོད་བསྐྱལ་བ་རེད་བསམས་ཏེ་ཁ་ཕྱིར་བསློགས་ནས་སོག་ལེ་ལ་སོ་བཏབ་པས། སྦྲུལ་དེའི་ཁ་ལའང་རྨས་སྐྱོན་ཕོག

སྦྲུལ་དེའི་བསམ་པར་སོག་ལེས་རྐང་བཙུགས་ནས་རང་ལ་སྙད་རྐོ་གི་འདུག་བསམས་ཏེ་ཁོང་ཁྲོ་ཆེན་པོ་ལངས། ཁོས་དེ་འཕྲལ་རང་ལུས་ཀྱིས་སོག་ལེ་ལ་འཁྲིལ་ནས་བསྡད་དེ་སོག་ལེ་དབུགས་སུབ་བཏང་སྟེ་གསོད་དགོས་སྙམ། ཁོས་དེ་ལྟར་རང་ནུས་ཡོད་རྒུ་བཏོན་ནས་རང་ལུས་ཀྱིས་སོག་ལེ་ཞགས་པས་བསྡམས་པ་ལྟར་དམ་དུ་བསྡམས་པས། མཐར་རང་ལུས་དུམ་བུར་ཆད་དེ་རང་སྲོག་ཤོར་བའོ།།