ཆར་ལྡན་དབྱར་གྱི་མཛའ་མོ་མགྲོན་དུ་ཕེབས། །

རི་རྩེའི་ཁ་བས་དབུ་ཞྭ་དལ་གྱིས་ཕུད། །

གཙང་ཆུ་ལུ་མ་ཤང་ཤང་མདུན་ནས་བཞུར། །

མཐའ་ཡས་སྤང་ཐང་རིམ་གྱིས་ལྗང་གུར་གྱུར། །

འདོད་ཡོན་མེ་ཏོག་སྣ་བརྒྱ་ཕྱོགས་སུ་བཀྲ །

བསིལ་རླུང་ཀློང་དུ་འདབ་མས་བྲོ་གར་འཁྲབ། །

བསུང་ཞིམ་དྲི་འཛིན་དབང་པོའི་བཅུད་དུ་བསྣམས། །

ཨེ་མ་ལུས་སེམས་བདེ་བའི་ཞིང་དུ་འཁོད། །

ནོར་འཛིན་སྒེག་མོའི་ལང་ཚོའི་མཛེས་སྡུག་ལ། །

ཆགས་པའི་འབུ་དང་བུང་བའི་ཚོགས་རྣམས་ཀྱིས། །

དགའ་བའི་གཤོག་གླུ་ལེན་གྱིན་ལྡིང་བ་འདི། །

དབྱར་གྱི་མཛེས་པར་བསྟོད་པའི་རོལ་དབྱངས་འདྲ། །

ཞོགས་པའི་ཉི་གཞོན་གསར་པའི་འཛུམ་ཞལ་ཁྲོད། །

མདང་ནུབ་ཆར་པས་བཞག་པའི་ཟིལ་པ་ནི། །

འཇམ་མཉེན་ཡལ་གའི་ངོས་སུ་ཁྲོམ་ཁྲོམ་དུ། །

འོད་ཀྱི་བརྟུལ་ཞུགས་འཛིན་པའི་ཚུལ་དེ་མཛེས། །

ཚར་དུ་དངར་བའི་ནགས་ཀྱི་སྐྱེད་ཚལ་དུ། །

སྣ་མང་རྐང་འཐུང་སྐྱེ་གཟུགས་འགྲན་པ་བཞིན། །

འཇོལ་མོ་དང་ནི་བྱ་བྱེའུ་ཁྱུ་ཚོགས་ཀྱིས། །

བག་ཕེབས་ཁྲོད་དུ་གྲེ་འགྱུར་ངོམས་པར་བྲེལ། །

སྣ་ཚོགས་ལྗོན་ཤིང་སྣོལ་མའི་དབེན་གནས་འདིར། །

སྲོག་ཆགས་སྣ་ཚོགས་བག་ཕེབས་འཚོ་བར་རོལ། །

མི་དང་རང་བྱུང་ཁམས་ཀྱི་འཆམ་མཐུན་ལས། །

དུས་རབས་གསར་པའི་ས་མཐོའི་རྣམ་པ་མངོན། །

དབྱར་གྱི་ལྗོན་ཤིང་ལོ་མ་ལྡེམ་ལྡེམ་དུ། །

བསིལ་འཇམ་རླུང་བུའི་གར་དུ་ཡང་ཡང་རྩེན། །

སྨིན་ལེགས་འདབ་ཕྲེང་ཡིད་ངོར་རབ་སྡུག་པས། །

ཡིད་སེམས་གཞན་ལ་འཁྲེང་བའི་གོ་སྐབས་དབེན། །