བསོད་ནམས།

སྐྱིད་སྡུག་འདྲེས་མའི་འཚོ་བས་ལོ་གཅིག་བསྐྱལ། །

སླར་ཡང་བདེ་སྡུག་འདྲེས་མའི་ལོ་ཟླ་བསུས། །

གེགས་བར་ཞི་བའི་བསོད་ནམས་ཞིང་གི་ཁྱོན། །

རྐང་བྲོ་གླུ་གཞས་གར་དབྱངས་དགའ་སྤྲོས་ཁེངས། །

གངས་ཅན་ནམ་མཁར་གསེར་གྱི་གདུགས་མཆོག་ཕུབ། །

ཕྱོགས་བཅུ་ཡོངས་སུ་ལོ་ལེགས་ལྟས་བཟང་འཆར། །

བསམ་དོན་འགྲུབ་ལ་རེ་ལྟོས་འཆའ་བ་ཡི། །

གཏན་བདེའི་ཇུས་བཟང་ནམ་ཡང་རྣམ་པར་རྒྱལ། །

བོད་འབངས་ཡུན་རིང་བདེ་བར་འཚོ་བའི་ཞིང་། །

བསིལ་ལྗོངས་ནོར་འཛིན་སྒེག་མོ་ཆུ་སྐྱེས་ཚལ། །

དར་རྒྱས་བསུང་ཞིམ་ལྷང་ལྷང་འཐུལ་བའི་ཁྲོད། །

བོད་མིའི་སྐྱིད་གླུ་རྐང་དྲུག་མགྲིན་གླུར་མཚུངས། །

ཕྱོགས་མཐའ་འཁོར་བའི་ས་འཛིན་མཐོ་དམའ་ཀུན། །

བྱེད་པོས་བཞེངས་པའི་རྒྱལ་མཚན་ཆེ་ཆུང་གཟུགས། །

ནམ་ཡང་མི་ཞིག་བརྟན་ཞིང་བརྗིད་པའི་ཉམས། །

མཐོ་བོད་འབྱུང་ཁམས་འགྱུར་མེད་དཔང་པོར་གྱུར། །

ལ་ཀླུང་གང་སར་སྦྲེལ་བའི་བྲག་ཕུག་ལམ། །

ཕན་ཚུན་སྦྲེལ་མཐུད་དཔལ་བེའུ་མཛེས་རིས་ཆགས། །

སྐྱེལ་འདྲེན་འགྲུལ་བཞུད་སྐར་མདའ་འཁྱུག་པ་ཡིས། །

དབོར་འདྲེན་དངོས་པོས་ས་གཞིའི་སྣོད་ཆེན་བཀང་། །

དྲི་མེད་དྭངས་གཙང་ཕྱོགས་ཀུན་དལ་འགྲོའི་ཀློང་། །

འཚེ་མེད་གནས་བཟོད་བདེ་བའི་ལྟོ་དཀར་ཉ། །

ཅི་དགར་འཁྱུག་པའི་གཤོག་པའི་རྩལ་སྟོན་དེར། །

བག་ཡངས་བྱ་ཚོགས་རྣམས་ཀྱིས་མཁའ་ནས་ལྟ། །

འཕྲུལ་གྱི་མདངས་འཛིན་མཐའ་ཡས་རྩྭ་ཐང་ཀུན། །

འཕེལ་ཁ་རྒྱས་པའི་དཀར་ནག་ཕྱུགས་ཀྱིས་བཀང་། །

བཅུད་ལྡན་ཞོ་དང་འོ་མའི་རྒྱུན་བཟང་པོས། །

འདོད་འབྱུང་བུམ་པ་བཀང་སྟེ་རྟེན་འབྲེལ་འགྲིག །

བཅུ་ཕྲག་རིག་གནས་ལོ་རྒྱུས་སྙན་གྲགས་ཆེ། །

མི་ཉམས་གོང་འཕེལ་ཤེས་དཔལ་འོད་སྟོང་འབར། །

སྲིད་འབྱོར་ཕུན་ཚོགས་ཡོངས་འདུས་གཏམ་བཟང་པོ། །

དུང་དཀར་དབྱངས་ཀྱིས་སྒྲོག་པའི་བཀྲ་ཤིས་ཤོག །

དམག་འཁྲུག་མུ་གེ་ནད་རིགས་གདོན་བགེགས་ཀུན། །

རང་དགར་གཞོམ་པའི་སྐལ་བཟང་ཞི་བདེའི་ཡུལ། །

སྨན་ལྗོངས་དབུ་འཕང་མཐོ་བའི་སྐྱེ་འགྲོའི་ཚོགས། །

མདུན་སྐྱོད་འཁོར་ལོར་བཅིབས་པའི་བཀྲ་ཤིས་ཤོག །

རིན་ཆེན་རྟགས་མཆོག་བརྒྱད་ལ་འགྲོགས་པའི་དོན། །

དོན་དམ་བཟང་པོ་ཀུན་འདུས་ཤིང་སྦྲུལ་ལོ། །

ལོ་གསར་བསུ་བའི་བདེ་ལེགས་སྨོན་པའི་ཚིག །

ཚིག་སྦྱོར་དོན་ལྡན་དགེ་ལེགས་འཕེལ་གྱུར་ཅིག །