རེ་བ་དང་གསོན་ཤུགས་ཀྱིས་ཁེངས་པའི་ནག་ཆུ་གྲོང་ཁྱེར་སྙན་རོང་རྫོང་གི་ས་གཞི་དེའི་ཐོག སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱིས་ཞབས་ཞུའི་འདུ་ཤེས་གསར་གཏོད་དང་། དམ་པ་དོན་གཉེར་གྱི་ལས་ཀའི་བྱེད་ཐབས་ལག་བསྟར། བུ་རྫི་རྣམ་པའི་ལས་ཀའི་རྣམ་པ་ནུས་ཤུགས་ཡོད་རྒུས་ཁྱབ་གདལ་གཏོང་བ་བཅས་བྱས་ནས། གཉེར་སྐྱོང་བྱེད་པོའི་ཐོ་འགོད་དེབ་སྐྱེལ་ལ་སེམས་ནུས་ཡོད་རྒུ་བཏོན་ཏེ་མང་ཚོགས་ཀྱི་འཕྲལ་མཁོ་དང་། སེམས་ཁྲལ། དཀའ་ངལ། རེ་སྒུག་བཅས་ཀྱི་གནད་དོན་ཐག་གཅོད་བྱས་ཏེ། སྙན་རོང་རྫོང་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་རྨང་གཞི་བརྟན་པོ་བཏིང་བ་རེད།

སྙན་རོང་རྫོང་ས་མཐོར་གནས་པས་དཔལ་འབྱོར་འཕེལ་རྒྱས་བལྟོས་བཅས་ཀྱིས་རྗེས་སུ་ལུས་པ་དང་། གཉེར་སྐྱོང་བྱེད་པོ་ཁག་གཅིག་གི་རིག་གནས་ཆུ་ཚད་དམའ་ཙམ་ཡོད་པས། ཁྲོམ་ར་ལྟ་འདོམས་ལས་དོན་ལ་འགྲན་སློང་ཧ་ཅང་ཆེན་པོ་འཕྲད་ཡོད། སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱི་ལས་དོན་པ་ཡོངས་ཀྱིས་ཞུམ་མེད་ཀྱི་བློ་སྟོབས་དང་འགྱུར་མེད་ཀྱི་ཆོད་སེམས་ཐོག་ནས་དཀའ་ངལ་ལ་མ་འཛེམས་པར་རང་འགུལ་ངང་བྱ་སྤྱོད་སྤེལ་བ་རེད།

བརྒྱུད་རིམ་ཧྲིལ་པོ་གློག་རྡུལ་ཅན་དུ་འགྱུར་རྒྱུ་ཁྱབ་གདལ་གཏོང་བ་དང་ཕན་འབྲས་ཆེན་པོས“བྱ་བ་གཅིག”སྒྲུབ་པའི་ཁྲོད། ལས་དོན་པས་རིག་གནས་ཆུ་ཚད་ཅུང་དམའ་བའི་གཉེར་སྐྱོང་བྱེད་པོར“གཅིག་གཏད་གཅིག”གི་ཐོག་ནས་རོགས་རམ་འདུན་ཞུ་བྱས་ཏེ། ཐོ་འགོད་དེབ་སྐྱེལ་གྱི་བརྒྱུད་རིམ་ཚང་མ་དང་ཞིབ་ཕྲའི་བླང་བྱ་ཚང་མར་ཆད་ལུས་མེད་པར་འགྲེལ་བཤད་བརྒྱབ་པ་རེད། ཡི་གེ་མི་ཤེས་པའི་གཉེར་སྐྱོང་བྱེད་པོ་དེ་དག་ལ་ལས་དོན་པས་གོ་བདེ་ཤེས་སླའི་སྐད་ཆའི་ཐོག་ནས་འབྲེལ་ཡོད་ནང་དོན་ལ་གསལ་འགྲེལ་བྱས་ཏེ། གྲངས་གཞི་ཚང་མ་གནད་ལ་འཁེལ་ཞིང་འཕྱུགས་པ་མེད་པའི་འགན་ལེན་བྱེད་པ་དང་། གདམ་ག་ཚང་མར་བསམ་གཞིག་གཏིང་ཟབ་བྱེད་ཀྱི་ཡོད་པ་རེད།

མང་ཚོགས་ལ་ཞབས་འདེགས་དེ་བས་ལེགས་པ་ཞུ་ཆེད། སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱིས་གྲོང་སྡོད་ལས་དོན་རུ་ཁག་ལ་དམིགས་ཤིང་། གྲོང་སྡོད་ལས་དོན་རུ་ཁག་གི་རུ་མིར་གསོ་སྦྱོང་བྱས་པ་བརྒྱུད། ཐོ་འགོད་དེབ་སྐྱེལ་གྱི་ཞབས་ཞུ་གྲོང་ཚོའི་གང་སར་ཁྱབ་པ་བྱས་ཡོད།

བརྒྱུད་རིམ་ལྡན་པའི་གསོ་སྦྱོང་བྱས་པ་བརྒྱུད་གྲོང་སྡོད་ལས་དོན་རུ་ཁག་གི་རུ་མི་མང་ཆེ་བ་གཉེར་སྐྱོང་བྱེད་པོའི་ཐོ་འགོད་དེབ་སྐྱེལ་གྱི་ལས་རོགས་ནུས་ལྡན་དུ་གྱུར་ནས་གཉེར་སྐྱོང་བྱེད་པོར་དུས་ཐོག་ཏུ་མཛུབ་ཁྲིད་དང་རོགས་རམ་ཡང་དག་བྱེད་ཐུབ་ཀྱི་ཡོད། དོགས་གནད་སེལ་བ་དང་རེའུ་རྒྱང་རོགས་བྱེད་པ་ཡིན་ནའང་འདྲ། ཡང་ན་སྲིད་ཇུས་བློ་འདྲི་བྱེད་པ་བཅས་གནད་དོན་གང་ཞིག་ཡིན་རུང་གྲོང་སྡོད་ལས་དོན་རུ་ཁག་གི་རུ་མིས་ནུས་པ་གལ་ཆེན་བཏོན་ཡོད།

གཉེར་སྐྱོང་བྱེད་པོར་སྔར་བས་སྟབས་བདེ་བསྐྲུན་ཆེད། སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱིས་ནུས་ཤུགས་ཡོད་རྒུས་ཚབ་སྒྲུབ་ས་ཚིགས་ཁག་གི་ལས་མིར་ཕྱོགས་ཡོངས་ནས་གསོ་སྦྱོང་བྱས་ཤིང་། ལག་ཁྱེར་ལེན་པ་ནས་རྗེས་མཐུད་དོ་དམ་བར་ཚང་མར་ཆེད་མིས་འགན་འཁུར་ནས་གཉེར་སྐྱོང་བྱེད་པོར་བརྒྱུད་རིམ་ཧྲིལ་པོའི་རྗེས་སྙེགས་ཞབས་ཞུ་མཁོ་འདོན་བྱེད་ཀྱི་ཡོད་པ་རེད།

ཚབ་སྒྲུབ་ས་ཚིགས་བཙུགས་པ་དེ་གཉེར་སྐྱོང་བྱེད་པོའི་སྒོ་ཁར་སྟབས་བདེའི་ཞབས་ཞུའི་སྦྲེལ་ཟམ་ཞིག་བསྐྲུན་པ་དང་གཉིས་སུ་མ་མཆིས། གཉེར་སྐྱོང་བྱེད་པོས་ལ་ཀླུང་བརྒལ་མི་དགོས་པར་ནུས་ཆེ་དང་སྤུས་ལེགས་ཀྱི་ཐོ་འགོད་དེབ་སྐྱེལ་གྱི་ཞབས་ཞུ་ལོངས་སུ་སྤྱོད་ཐུབ་ཀྱི་ཡོད།

སྙན་རོང་རྫོང་ས་རྒྱ་ཆེ་བ་དང་གཉེར་སྐྱོང་བྱེད་པོ་ཁྱབ་ཚུལ་ཅུང་ཁ་ཐོར་ཡིན་པའི་ཁར། ཁྲོམ་ར་ལྟ་འདོམས་སྡེ་ཚན་གྱི་ལས་སྒོ་རྒྱ་ཆེ་བ་དང་། ལས་འགན་ལྕི་བ། མི་སྣ་ཉུང་བ་སོགས་ཀྱིས་རྐྱེན་པས། གཉེར་སྐྱོང་བྱེད་པོས་ལས་སྒོ་གཉེར་སྐབས་རྒྱུན་དུ“ནར་འགྱངས་བྱེད་པ”དང“དུས་ཚོད་ནོར་བའི”སྣང་ཚུལ་ཐོན་གྱི་ཡོད།

དཀའ་གནད་དེ་ཐག་གཅོད་ནུས་ལྡན་བྱ་ཆེད། སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱིས་ཞབས་ཞུའི་ཁ་ཆད་ལས་དོན་གྱི་ལམ་ལུགས་འཕྲལ་དུ་ཁྱབ་གདལ་བཏང་བ་རེད། གསར་གཏོད་ཀྱི་ལམ་ལུགས་དེ་བརྒྱུད་གཉེར་སྐྱོང་བྱེད་པོས་རང་ཉིད་ཀྱི་དུས་ཚོད་བཀོད་སྒྲིག་གཞིར་བཟུང་ཁ་པར་དང་དྲ་རྒྱ་སོགས་ཐབས་ལམ་སྣ་ཚོགས་བརྒྱུད་ལས་སྒོ་སྔོན་མངགས་བྱེད་ཆོག་གི་ཡོད། ལམ་ལུགས་དེ་ཁྱབ་གདལ་བཏང་བས“དུས་ཚོད་ནར་འགྱངས”དང“དུས་ཚོད་ནོར་བའི”སྣང་ཚུལ་གཏན་འགོག་ནུས་ལྡན་ཐུབ་ནས་གཉེར་སྐྱོང་བྱེད་པོར་སྟབས་བདེ་ཆེན་པོ་བསྐྲུན་ཡོད།

སྙན་རོང་རྫོང་ཁྲོམ་ར་ལྟ་འདོམས་ཅུས་ཀྱི་འབད་བརྩོན་ལྷོད་མེད་བརྒྱུད། བུ་རྫི་རྣམ་པའི་ཞབས་འདེགས་ཞུ་སྟངས་དེས་གཉེར་སྐྱོང་བྱེད་པོའི་ཐོ་འགོད་དེབ་སྐྱེལ་ལ་སྟབས་བདེ་ཆེན་པོ་བསྐྲུན་པ་དང་། སྙན་རོང་རྫོང་གི་དཔལ་འབྱོར་འཕེལ་རྒྱས་ལ་གསོན་ཤུགས་གསར་པ་བསྣན་ཡོད།