འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། དུས་རབས་གསར་པའི་རྒྱབ་ལྗོངས་ཆེན་པོའི་འོག རྒྱ་ཆེའི་དཔོན་དམག་ཚོའི་དུས་རྒྱུན་གྱི་དཔེ་ཀློག་གི་དགོས་མཁོ་དེ་བས་ལེགས་པའི་ངང་བསྐངས་ནས་བསམ་པའི་རིག་གནས་འཚོ་བ་ཕུན་སུམ་ཚོགས་སུ་གཏོང་བ་དང་ཆབས་ཅིག དཔོན་དམག་ཚོའི་དེབ་གཡར་བའི་ལག་ཁྱེར་གཉེར་བ་དང་། དེབ་གཡར་བ། དེབ་ཕྱིར་སྤྲོད་སོགས་ཀྱི་དངོས་ཡོད་དཀའ་ངལ་སེལ་ཆེད། ཉེ་ཆར་ལྷ་ས་གྲོང་ཁྱེར་དཔེ་མཛོད་ཁང་གིས་འགན་འཁྲི་འཁུར་སེམས་དང་ལས་འགན་སྒྲུབ་སེམས་ཆེན་པོའི་སྒོ་ནས་ལས་དོན་མི་སྣ་སྒྲིག་འཛུགས་ཧུར་ཐག་བྱས་ཏེ། དྲག་ཆས་ཉེན་རྟོག་བོད་ལྗོངས་སྤྱི་ཁྱབ་རུ་ཁག་གི་དཔུང་སྡེར་བསྐྱོད་དེ་དམག་སྒར་དུ་དཔེ་ཀློག་ཁྱབ་སྤེལ་གྱི་བྱེད་སྒོ་སྤེལ་བ་རེད།
བྱེད་སྒོ་སྤེལ་ཡུལ་དུ་ལྷ་ས་གྲོང་ཁྱེར་དཔེ་མཛོད་ཁང་གི་ལས་དོན་པས་རང་ཉིད་ཀྱིས་འཁྱེར་ཡོང་བའི་ལོ་རྒྱུས་དང་། ཆབ་སྲིད། བཅའ་ཁྲིམས། རྩོམ་རིག་སོགས་ཁྱབ་ཁོངས་མང་པོའི་དེབ་ལེགས་པོ་ཁག་གཅིག་འོས་སྦྱོར་བྱས་པ་རེད། ནང་དོན་ཕུན་སུམ་ཚོགས་པ་དང་སྣ་ཁ་འཛོམས་པའི་དཔེ་དེབ་དག་ལས་དཔོན་དམག་ཚོར་བསམ་པའི་རྒྱགས་ཕྱེ་མཁོ་འདོན་བྱས་པ་རེད། གཞན་ཡང་། ལས་དོན་པས་དྲག་ཆས་ཉེན་རྟོག་དཔོན་དམག་ཚོར་དེབ་གཡར་བའི་ལག་ཁྱེར་གཉེར་བ་མ་ཟད། ས་གནས་ས་ཐོག་ཏུ་དེབ་གཡར་བའི་ལག་ཁྱེར་བེད་སྤྱོད་བྱེད་རིམ་དང་དེ་བཞིན་དེབ་གཡར་ནས་ཕྱིར་སྤྲོད་སྟངས་སོགས་གསལ་བོར་བཤད་པ་རེད།