འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉེ་ཆར། གསར་འགོད་པར་ལྷ་ས་གྲོང་ཁྱེར་མི་དམངས་སྲིད་གཞུང་གིས་འཚོགས་པའི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོཌ་བྱུང་བར། བོད་རང་སྐྱོང་ལྗོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་བཅུ་གསུམ་པའི་ཐོག《ལྷ་ས་གྲོང་ཁྱེར་གྱི་རྒྱལ་གཅེས་འཕྲོད་བསྟེན་དོ་དམ་སྲོལ་ཡིག》ལ་བཟོ་བཅོས་རྒྱག་རྒྱུའི་ཆོག་མཆན་སྤྲད་ཅིང་། ས་གནས་རང་བཞིན་གྱི་ཁྲིམས་སྲོལ་དེ་2025ལོའི་ཟླ་1ཚེས་1ཉིན་ནས་ལག་ལེན་བསྟར་རྒྱུ་རེད།

《ལྷ་ས་གྲོང་ཁྱེར་གྱི་རྒྱལ་གཅེས་འཕྲོད་བསྟེན་དོ་དམ་སྲོལ་ཡིག》ལ་ཁྱོན་ལེའུ་དྲུག་དང་དོན་ཚན་སོ་གསུམ་ཡོད་པའི་ནང་ཁོར་ཡུག་འཕྲོད་བསྟེན་ལེགས་གཏོང་དང་། བདེ་ཐང་སློབ་གསོ་དང་བདེ་ཐང་ལ་སྐུལ་སྤེལ། ནད་སྦྱོར་སྐྱེ་དངོས་སྔོན་འགོག་དང་ཚོད་འཛིན། བཅའ་ཁྲིམས་ཀྱི་འགན་འཁྲི་སོགས་ཀྱི་ནང་དོན་ཚུད་ཡོད་པ་རེད།

ལྷ་ས་གྲོང་ཁྱེར་འཕྲོད་བསྟེན་དང་བདེ་ཐང་ཨུ་ལྷན་གྱི་ཏང་ཙུའི་ཁོངས་མི་དང་ཀྲུའུ་རེན་གཞོན་པ་ཡན་ཀྲོའུ་ཀྲུང་གིས《ལྷ་ས་གྲོང་ཁྱེར་གྱི་རྒྱལ་གཅེས་འཕྲོད་བསྟེན་དོ་དམ་སྲོལ་ཡིག》ནང་རིམ་ཁག་ཁོངས་མིའི་ཚན་པའི་འགན་འཁྲི་དང་ལས་བགོས་སྔར་བས་ཁ་གསལ་བཟོས་ནས་བདེ་ཐང་སློབ་གསོ་དང་བདེ་ཐང་ལ་སྐུལ་སྤེལ་ཐད་ཤུགས་སྣོན་རྒྱག་རྒྱུར་སྔར་བས་མཐོང་ཆེན་བྱས་ཏེ། གཙོ་གནད་ས་ཁོངས་ལ་བཅོས་སྐྱོང་བྱེད་ཤུགས་ཆེ་རུ་བཏང་བ་དང་རིགས་ཁག་གི་ཞིབ་ཕྲའི་ཁུལ་ལ་བཅོས་སྐྱོང་བྱེད་པར་བླང་བྱ་ཁ་གསལ་བཏོན་པ་དང་ཆབས་ཅིག གྲོང་གསེབ་ཀྱི་ཁོར་ཡུག་འཕྲོད་བསྟེན་ལེགས་སུ་གཏོང་རྒྱུ་དེ་གྲོང་གསེབ་ཕྱོགས་ཡོངས་ནས་དར་རྒྱས་འགྲོ་བར་སྐུལ་འདེད་གཏོང་བའི་གཙོ་གནད་ལས་དོན་ལ་བརྩིས་ནས་གྲོང་ཚོའི་གཙང་སྦྲ་དང་། ཆུ་དང་གསང་སྤྱོད་སྒྱུར་བཀོད་སོགས་ཀྱི་ལས་དོན་ལ་སྐུལ་འདེད་ཧུར་ཐག་གཏོང་བ་དང་གྲོང་ཚོའི་རྣམ་པ་ལེགས་སུ་བཏང་ནས་གནས་འཕྲོད་ལས་འཚམ་དང་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་ཧུར་ཐག་བྱས་ཡོད་ཅེས་ངོ་སྤྲོད་བྱས་པ་རེད།