འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉིན་ཤས་གོང་ལྷ་ས་གྲོང་ཁྱེར་ཁྲེང་ཀོན་ཆུས་རྔ་ཆེན་ཁྲོམ་གཞུང་གུར་ས་གྲོང་ཚོས་མི་དམངས་ཉེན་རྟོག་པ་དང་མཉམ་དུ། ཁོངས་གཏོགས་ཁུལ(ལྷག་པར་དུ་ཀྲོའུ་ཅི་ཐང་ཆེན)གྱི་འཁོར་འཁྲིད་ཡུལ་སྐོར་བར་དམིགས་ནས། ཡ་རབས་ཡུལ་སྐོར་གྱི་སློབ་གསོའི་བྱ་སྤྱོད་སྤེལ་བ་རེད།
ད་ཐེངས་ཀྱི་བྱ་སྤྱོད་ནང་ཡུལ་མི་དང་ཡུལ་སྐོར་བར་ཡ་རབས་ཡུལ་སྐོར་གྱི་གལ་ཆེའི་རང་བཞིན་དང་དེ་བཞིན་འབྲེལ་ཡོད་བདེ་འཇགས་ཤེས་བྱ་དྲིལ་བསྒྲགས་རྒྱ་ཁྱབ་བྱས་པ་དང་། འཁོར་འཁྲིད་ཡུལ་སྐོར་བྱེད་སྐབས་ངེས་པར་དུ་བརྩི་སྲུང་ཞུ་དགོས་པའི་འགྲིམ་འགྲུལ་སྒྲིག་སྲོལ་དང་། བདེ་འཇགས་ངང་རླངས་འཁོར་གཏོང་བའི་རྒྱུན་ཤེས། ཡ་རབས་ཡུལ་སྐོར་བྱེད་སྐབས་འཚོ་བའི་གད་སྙིགས་གང་བྱུང་དུ་མི་དབྱུག་པ་སོགས་ཀྱི་ནང་དོན་གཙོ་གནད་དུ་ནན་བཤད་བྱས་པ་དང་དུས་མཚུངས། རྒྱུན་སྤྱོད་ཀྱི་འཕྲལ་སྡོམ་ཐག་གཅོད་བྱ་ཐབས་ཁག་གཅིག་ཀྱང་འགྲེལ་བཤད་བརྒྱབ་པ་རེད།
ད་ཐེངས་ཀྱི་ཡ་རབས་ཡུལ་སྐོར་སློབ་གསོའི་བྱ་སྤྱོད་སྤེལ་བ་བརྒྱུད། མཐའ་འཁོར་གྱི་ཡུལ་མིའི་དང་ལེན་ཧུར་ཐག་དང་ཚད་མཐོའི་གདེང་འཇོག་ཐོབ་ཡོད། ཡུལ་སྐོར་བ་ཚོས་ད་ཐེངས་ཀྱི་བྱེད་སྒོའི་ནང་ཞུགས་པ་བརྒྱུད། ཡ་རབས་ཡུལ་སྐོར་ལ་ངོས་འཛིན་སྔར་བས་གཏིང་ཟབ་བྱུང་བ་མ་ཟད། སླད་ཕྱིན་གྱི་ཡུལ་སྐོར་ཁྲོད་བདེ་འཇགས་དང་ཤེས་དཔལ་ལ་སྔར་བས་མཐོང་ཆེན་བྱེད་ཀྱི་ཡིན་ཞེས་བརྗོད། དེ་དང་ཆབས་ཅིག་ཁོངས་གཏོགས་ཁུལ་གྱི་ཡུལ་སྐོར་ཁོར་ཡུག་མངོན་གསལ་དོད་པོས་ལེགས་སུ་ཕྱིན་པ་དང་མ་རབས་བྱེད་སྤྱོད་མངོན་གསལ་དོད་པོས་ཉུང་དུ་ཕྱིན་ཡོད་པ་རེད།