འདི་ག་ཚགས་པར་ཁང་དུ་ནག་ཆུ་ནས་གློག་འཕྲིན་འབྱོར་གསལ། གཞོན་ནུ་ལོ་ཆུང་གི་ཁྲིམས་སྐྱོང་འདུ་ཤེས་དང་བཅའ་ཁྲིམས་ཀྱི་འདུ་ཤེས་སྔར་བས་ཟབ་ཏུ་གཏོང་བ་དང་། གཞོན་ནུ་ལོ་ཆུང་གི་ཁྲིམས་འགལ་ཉེས་གསོག་སྔོན་འགོག ན་སོ་དར་ལ་མ་བབས་པའི་མིར་ཁྲིམས་ལུགས་ཁྱབ་གདལ་དང་སློབ་གསོ་གཏོང་བའི“མཐའ་མའི་འགག་གནད”སེལ་བ་བཅས་བྱ་ཆེད། ཉེ་ཆར་འབྲི་རུ་རྫོང་གཤམ་ཆུ་ཤང་གཡམ་པ་གྲོང་ཚོར་བཅའ་སྡོད་བོད་ཀྱི་ན་སོ་དར་ལ་མ་བབས་པའི་ཉེས་ཅན་སློབ་གཅུན་སུའོ་ཡི་གྲོང་སྡོད་ལས་དོན་རུ་ཁག་གི་འབྲེལ་མཐུད་མཐུན་སྦྱོར་འོག བོད་ཀྱི་ན་སོ་དར་ལ་མ་བབས་པའི་ཉེས་ཅན་སློབ་གཅུན་སུའོ་ཡི“བློ་སྐྱེད་འཆད་ཁྲིད་ཚོགས་པས”འབྲི་རུ་རྫོང་གི་སློབ་འབྲིང་དང་པོ་དང་གཉིས་པར“བློ་སྐྱེད་འཆད་ཁྲིད་ཁང་སློབ་གྲྭར་སྐྱོད། ལག་གདང་འབྲེལ་ནས་བཅའ་ཁྲིམས་ཁྱབ་གདལ་དང་ལང་ཚོ་སྲུང”ཞེས་པ་བརྗོད་དོན་གཙོ་བོར་བྱས་པའི་བཅའ་ཁྲིམས་ཁྱབ་གདལ་དང་ཉེན་ཟོན་སློབ་གསོའི་བྱེད་སྒོ་སྤེལ་ཞིང་། ཁྱོན་སློབ་མ་700ལྷག་ཙམ་ཁྲིམས་སྐྱོང་སློབ་གསོའི་བྱེད་སྒོ་དེར་ཞུགས་པ་རེད།

དེའི་རིང་འཆད་ཁྲིད་ཚོགས་པས་ཁྲིམས་ཆད་འཁུར་བཞིན་པའི་བཙོན་པས་རང་གི་མྱོང་ཚོར་བཤད་དེ་ཁྲིམས་ལུགས་གླེང་བའི་བརྙན་ལམ་གྲ་སྒྲིག་ཞིབ་ཚགས་བྱས་པའི་དམིགས་ཡུལ་ནི་གྱོད་དཔེ་ངོ་མ་དང་ཁྲིམས་ཆད་འཁུར་བཞིན་པའི་བཙོན་པའི་འགྱོད་སེམས་ཟུང་འབྲེལ་བྱས་ནས་གཞོན་ནུ་ལོ་ཆུང་སློབ་མར་ཁྲིམས་སྐྱོང་གི་ཉེན་བརྡ་བཏང་སྟེ་ཁོང་ཚོར་ལང་ཚོར་གཅེས་སྤྲས་ཀྱིས་ཉེས་གསོག་དང་རྒྱང་དུ་གྱེས་དགོས་པའི་ཁྲིད་སྟོན་བྱ་རྒྱུ་དེ་ཡིན་པ་རེད། “PPTསློབ་ཆས་དང་གྱོད་དཔེ་ངོ་མའི་འཆད་འགྲེལ་ཟུང་འབྲེལ”གྱི་བྱེད་ཐབས་ལ་བརྟེན་ནས་འདྲིས་ཆེ་ཤིང་གོ་བདེ་ཤེས་སླའི་སྐད་ཆ་ནས་གཞོན་ནུ་ལོ་ཆུང་གི་སེམས་ཁམས་བྱ་སྤྱོད་དང་ཟུང་འབྲེལ་བྱས་ཏེ་ཁྲིམས་སྐྱོང་གི་ས་བོན་སློབ་གྲྭའི་ནང་འདེབས་ཐུབ་པ་དང་སེམས་ནང་དུ་འདེབས་ཐུབ་པ་བྱས་པས་སློབ་མའི་ཚོགས་སྤྱིའི་བདེ་འཇགས་དོགས་ཟོན་གྱི་འདུ་ཤེས་དང་རང་སྲུང་ནུས་པ་ཆེ་རུ་ནུས་ལྡན་ཕྱིན་པ་མ་ཟད། སློབ་མར་རྣམ་པ་གསར་རྐྱང་གི་ཁྲིམས་སྐྱོང་སློབ་ཚན་ཞིག་ཀྱང་འཁྲིད་པ་རེད།