ཟླ་8ཚེས་29ཉིན། བོད་ལྗོངས་ཞིབ་དཔྱོད་ལས་ཁུངས་ཀྱི་12309མི་རིགས་མཐུན་སྒྲིལ་ཡར་ཐོན་གྱི“གཡང་འཛོམས་ཐད་སྦྲེལ་ཁ་པར”གྱི་གསར་འགྱུར་ཡོངས་བསྒྲགས་ཚོགས་འདུ་ལྷ་སར་འཚོགས་ཤིང་། གསར་འགོད་པར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར། 2018ལོར་ལྗོངས་ཡོངས་ཀྱི་རིམ་པ་གསུམ་པའི་ཞིབ་དཔྱོད་ཁང་གིས་ས་གནས་ཁག་གི་དོན་དངོས་དང་ཟུང་འབྲེལ་བྱས་ཏེ་སྔ་རྗེས་སུ་12309ཞིབ་དཔྱོད་ཞབས་ཞུའི་ལྟེ་གནས་བཙུགས་པ་དང་12309ཞིབ་དཔྱོད་ཞབས་ཞུའི་ཐད་སྦྲེལ་ཁ་པར་ཤར་གཏོང་བྱས་པ་རེད། ལྟེ་གནས་དང་ཐད་སྦྲེལ་ཁ་པར་སྤྱད་པ་ནས་བཟུང་ཞིབ་དཔྱོད་ལས་ཁུངས་ཀྱིས་དུས་རབས་གསར་པའི“ཧྥེང་ཆའོ་ཡི་ཉམས་མྱོང”ལག་ལེན་ཧུར་ཐག་བསྟར་ཏེ་དམངས་ཀྱི་རེ་འབོད་ལ་ཞིབ་དཔྱོད་ལས་ཁུངས་ཀྱིས་བརྡ་ལན་ཞུ་རྒྱུ་མཐའ་འཁྱོངས་ཀྱིས་མང་ཚོགས་ལ་དེ་བས་སྒོ་དབྱེ་དང་། སྟབས་བསྟུན། དམངས་ཕན། བསྟུན་མཁས་བཅས་ཀྱི་ཞིབ་དཔྱོད་ཞབས་འདེགས་ཞུ་བར་འབད་བརྩོན་ལྷོད་མེད་བྱས་ཡོད། 2024ལོའི་ཟླ་8པའི་བར་མང་ཚོགས་ལ་ཞིབ་དཔྱོད་ཀྱི་ཞབས་འདེགས་སྣ་ཚོགས་ཐེངས་6000ལྷག་ཙམ་ཞུས་ནས་སེམས་ནུས་ཡོད་རྒུས་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག་བཅས་ཀྱི་གནད་དོན་བསལ་བ་རེད།

བོད་ཀྱི་ཁྱད་ཆོས་ལྡན་པའི“གཡང་འཛོམས་ཐད་སྦྲེལ་ཁ་པར”རིམ་སྤོར་སྒྱུར་བཀོད་བྱས་པ།

གསར་འགོད་པར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། རང་སྐྱོང་ལྗོངས་མི་དམངས་ཞིབ་དཔྱོད་ཁང་གིས་རང་ལྗོངས་ཀྱི་གནས་ཚུལ་དང་དམངས་འདོད་ལ་གཞི་ཚུགས་ཏེ། བོད་ཀྱི་ཁྱད་ཆོས་དེ་བས་ཆེ་བའི་བོད་ལྗོངས་ཞིབ་དཔྱོད་ལས་ཁུངས་ཀྱི་12309མི་རིགས་མཐུན་སྒྲིལ་ཡར་ཐོན་གྱི“གཡང་འཛོམས་ཐད་སྦྲེལ་ཁ་པར”རིམ་སྤོར་སྒྱུར་བཀོད་བྱས་ནས། དེ་སྔ་ཐད་སྦྲེལ་ཁ་པར་ས་གནས་ཁག་གི་རིམ་ཁག་ཞིབ་དཔྱོད་ཁང་གིས་ཁེར་རྐྱང་དུ་བཙུགས་པ་ནས་ད་ཆ་རང་སྐྱོང་ལྗོངས་ཞིབ་དཔྱོད་ཁང་གིས་གཅིག་གྱུར་དོ་དམ་བྱེད་པར་བསྒྱུར་བ་དང་། མང་ཚོགས་ཀྱི་རེ་འདུན་བདག་སྤྲོད་བྱེད་པའི་དུས་ཚོད་དང་ཞབས་ཞུའི་དོན་ཚན་རྐྱང་པ་སོགས་ཀྱི་ཚད་བཀག་མེད་པར་བཟོས་པ། “1+3+N”ཡི་ལས་དོན་སྒྲུབ་སྟངས་ལ་བརྟེན་ནས་མང་ཚོགས་ལ་ཕྱོགས་ཡོངས་དང་ཕྱོགས་བསྡུས་རྣམ་པའི་ཞིབ་དཔྱོད་ཞབས་འདེགས་ཧུར་ཐག་ཞུས་ཐོག “མི་རིགས་མཐུན་སྒྲིལ་ཡར་ཐོན་གྱི་ཐད་སྦྲེལ་ཁ་པར་དང་། སྤུས་ལེགས་ནུས་ཆེའི་ལས་དོན་སྒྲུབ་པའི་བགྲོད་ལམ། མང་ཚོགས་ཀྱི་ལྟ་སྐུལ་དང་ལེན་བྱེད་པའི་ཟམ་པ”བཅས་ཧུར་ཐག་བསྐྲུན་ཏེ། སྤུས་ཚད་མཐོ་བ་དང་ཕན་འབྲས་ཆེ་བའི་ཞིབ་དཔྱོད་ཀྱི་འགན་འཁྲི་སྒྲུབ་པར་བརྟེན་ནས་རྒྱ་ཆེའི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་བཏང་བ་རེད།

2023ལོའི་ཟླ་4པར་ལྗོངས་ཡོངས་ཀྱི་12309ཞིབ་དཔྱོད་ཞབས་ཞུའི་ཐད་སྦྲེལ་ཁ་པར་རང་སྐྱོང་ལྗོངས་ཞིབ་དཔྱོད་ཁང་གིས་གཅིག་གྱུར་དོ་དམ་བྱེད་པར་བསྒྱུར་ཏེ“དུས་དང་རྣམ་པ་ཀུན་ཏུ་ཉན་མཁན་ཡོད་པ་དང་། གཅིག་གྱུར་ཐོག་མངགས་གཏོང་། གནད་སྨིན་ལན་འདེབས་པ”བཅས་ཀྱི་ཞབས་ཞུའི་རྣམ་པ་གསར་རྐྱང་ཞིག་བཏོད་ནས་མང་ཚོགས་ཀྱིས་བཏོན་པའི་བཅའ་ཁྲིམས་དང་ཞིབ་དཔྱོད་དང་འབྲེལ་བ་ཡོད་པའི་རེ་འདུན་དུས་དང་རྣམ་པ་ཀུན་ཏུ་བདག་སྤྲོད་བྱེད་པ་དང་། གནད་དོན་ཐག་གཅོད་ཀྱི་རྗེས་སྙེག་དང་ཕན་འབྲས་འདྲི་རྩད་བྱེད་ཤུགས་ཆེ་རུ་གཏོང་བ། གནད་དོན་ཐག་གཅོད་ཀྱི་འབྲས་བུ་དང་འཕེལ་རིམ་ཚུར་ལན་ནུས་ལྡན་བྱེད་པ། ཁྲིམས་ལྟར་དང་དུས་ཐོག་ཏུ་མང་ཚོགས་ཀྱི་རེ་འདུན་རང་སར་ཐག་གཅོད་བྱེད་པར་སྐུལ་འདེད་གཏོང་བ་བཅས་བྱས་ནས་མང་ཚོགས་རྣམས་ཞབས་ཞུར་བློ་ཡིད་ཚིམ་ཚད་ཟམ་མི་ཆད་པར་མཐོ་རུ་བཏང་བ་རེད། 2023ལོ་ནས་བཟུང་བཅའ་ཁྲིམས་བློ་འདྲིའི་རིགས་དང་། ཞུ་གཏུག་དང་ཐེར་འདོན་རིགས། གྱོད་གཞིའི་ཆ་འཕྲིན་འདྲི་རྩད་སོགས་ཀྱི་ཞབས་འདེགས་ཐེངས་1703ཞུས་པ་ཚང་མ་མཇུག་འགྲིལ་ཡོད་པ་རེད། མང་ཚོགས་དང་སྤྱི་ཚོགས་ལས་རིགས་ཁག་གི་གདེང་འཇོག་བཟང་པོ་དང་། ཁ་པར་དང་ཡིག་ཐོག་ནས་ཐུགས་རྗེ་ཆེ་ཞུ་བ། གོས་དར་སྐྱེལ་མཁན་ཐེངས་100ལྷག་ཙམ་བྱུང་བ་དང་། ཁ་པར་རྒྱག་མཁན་མང་ཚོགས་ཀྱི་བློ་ཡིད་ཚིམ་ཚད་96%ཡན་རྒྱུན་འཁྱོངས་ཐུབ་ཡོད།

ལྗོངས་ཡོངས་ཀྱི་ཞིབ་དཔྱོད་ལས་ཁུངས་ཀྱིས་ཁྲིམས་འཛིན་རོགས་སྐྱོབ་གྱོད་གཞི་ཁྱོན་355ཐག་གཅོད་བྱས་པ།

རང་སྐྱོང་ལྗོངས་མི་དམངས་ཞིབ་དཔྱོད་ཁང་ཞུ་གཏུག་དང་ཞུ་འབུལ་ཞིབ་དཔྱོད་པུའི་ཀྲུའུ་རེན་ཟླ་བ་དོན་གྲུབ་ཀྱིས་ངོ་སྤྲོད་བྱས་དོན། གྱོད་འབྲེལ་དཀའ་ངལ་ཡོད་པའི་མང་ཚོགས་ལ་ཁྲིམས་འཛིན་རོགས་སྐྱོབ་དང་སྤྱི་ཚོགས་རོགས་སྐྱོབ་གཏིང་ཟབ་བྱ་ཆེད། རང་སྐྱོང་ལྗོངས་མི་དམངས་ཞིབ་དཔྱོད་ཁང་གིས“གཡང་འཛོམས་ཐད་སྦྲེལ་ཁ་པར”དང“ཞིབ་དཔྱོད་ཞབས་ཞུའི་ལྟེ་གནས”སོགས་ལས་སྟེགས་ཀྱི་ཁྱབ་ཁོངས་ཡོངས་ཀྱིས་ཁུངས་སྣེ་གྲལ་བཤེར་བྱས་ཏེ། ཁྲིམས་འཛིན་རོགས་སྐྱོབ་ནང་ཁུལ་འབྲེལ་མཐུད་དང་གྱོད་འབྲེལ་དཀའ་ངལ་ཡོད་པའི་བུད་མེད་ལ་ཁྲིམས་འཛིན་རོགས་སྐྱོབ་སོགས་ཀྱི་ལམ་སྲོལ་ལ་སྐུལ་འདེད་གཏིང་ཟབ་བཏང་ནས་ཞིབ་དཔྱོད་ལྷུ་ཚིགས་ཀྱི་ཁྲིམས་འཛིན་རོགས་སྐྱོབ་ཀྱིས“རོགས་སྐྱོབ་བྱེད་དགོས་རིགས་ཚང་མར་རོགས་སྐྱོབ”དང“རོགས་སྐྱོབ་བྱེད་དགོས་རིགས་ཚང་མར་འཕྲལ་མར་རོགས་སྐྱོབ”བྱ་རྒྱུ་མཐའ་འཁྱོངས་བྱས་ཡོད། 2023ལོ་ནས་བཟུང་ལྗོངས་ཡོངས་ཀྱི་ཞིབ་དཔྱོད་ལས་ཁུངས་ཀྱིས་ཁྱོན་ཁྲིམས་འཛིན་རོགས་སྐྱོབ་གྱོད་གཞི་355དང་མི་422ཐག་གཅོད་བྱས་པ་དང་རོགས་སྐྱོབ་མ་དངུལ་སྒོར་ཁྲི་932.9སྤྲད་པ་རེད།

འགལ་བ་དང་རྩོད་གཞིའི་གཏུག་ཁུངས་བཅོས་སྐྱོང་གཏིང་ཟབ་བྱ་ཆེད། རང་སྐྱོང་ལྗོངས་མི་དམངས་ཞིབ་དཔྱོད་ཁང་གིས་འཕྲལ་མར“གཡང་འཛོམས་ཐད་སྦྲེལ་ཁ་པར”ནང་བཏོན་པའི་དཀའ་གནད་ཆེ་ལ་རྙོག་འཛིང་ཆེ་བའམ་ཡང་ན་ཛ་དྲག་གི་གནད་དོན་འགོ་ཁྲིད་ལས་བྱེད་པར་རྩིས་སྤྲད་དེ་གཤམ་སྐྱོད་ཞུ་ཉན་དང་གྱོད་འགན་གཙང་ལེན་གྱི་གྱོད་དོན་ཐག་གཅོད་བྱེད་པ་དང་། རིམ་པ་གསུམ་པའི་ཞིབ་དཔྱོད་ཁང་གིས“གནས་གཏན་འཁེལ་གྱིས་ཞུ་ཉན་དང་། དུས་བཀག་ལྟར་ཁ་ཆད། གྱོད་འགན་གཙང་ལེན། རྗེས་སྙེག་བཅར་ལན”སོགས་ཀྱི་བྱེད་ཐབས་ལ་བརྟེན་ནས་མང་ཚོགས་ཀྱི་རེ་འདུན་སྣ་ཚོགས་ཧུར་ཐག་སེལ་བ་དང་། ནུས་ཤུགས་ཡོད་རྒུས་ཡིག་འབུལ་ཞུ་བཅར་གྱི་གནད་དོན་སྔོན་འགོག་དང་ཉུང་དུ་གཏོང་བ། ཏང་དང་མང་ཚོགས་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་ཟབ་ཏུ་གཏོང་བ་དང་གཞི་རིམ་གྱི་བཅོས་སྐྱོང་ཆུ་ཚད་མཐོ་རུ་གཏོང་བ་བཅས་བྱས་ཡོད། 2023ལོ་ནས་བཟུང་། ལྗོངས་ཡོངས་ཀྱི་ཞིབ་དཔྱོད་ལས་ཁུངས་ཀྱིས་མང་ཚོགས་ཀྱི་རེ་འདུན་ཐད“དམིགས་སར་འབྱོར་བ་གསུམ་དང་ཐག་གཅོད་གཅིག”གི་རྩ་དོན་མཐའ་འཁྱོངས་བྱས་ནས་འགོ་ཁྲིད་ལས་བྱེད་པས་གཤམ་སྐྱོད་ཞུ་ལན་ཐེངས་678བྱས་པ་དང་གནད་དོན་སྣ་ཚོགས་600ལྷག་ཙམ་གྲལ་བཤེར་ཐག་གཅོད་བྱས་ཡོད། ཞིང་པ་ལས་མིའི་གླ་ཕོགས་འགྱངས་ཆད་ཀྱི་གྱོད་གཞི་ཁག་197ཞུ་གཏུག་བྱ་རྒྱུར་རྒྱབ་སྐྱོར་བྱས་ནས་འགྱངས་ཆད་བྱས་པའི་གླ་ཆ་སྒོར་ཁྲི་4000ལྷག་ཙམ་ཚུར་བླངས་པ་རེད།

（བདེ་སྐྱིད་དང་སྐལ་མཆོག་གིས་སྒྱུར་ཞུས་བྱས）