ཀ་མད་ཡིག་ངོ་ཙམ་མིན་ཁ་བརྡ་གནས་ལུགས་སློབ་མཁན། །

ག་འགྲོ་ཟ་སྡོད་ཙམ་མིན་ང་ཁོའི་གུས་ལུགས་སློབ་མཁན། །

ཅ་དངོས་བདག་གཅེས་ཙམ་མིན་ཆ་ལུགས་ཀུན་སྤྱོད་སློབ་མཁན། །

ཇ་ཆང་རྒྱན་འགྱེད་མི་རོལ་ཉ་མ་དགའ་བའི་ཨ་མ། །

ཏ་ཟིག་ཡུལ་སྐད་ཙམ་མིན་ཐ་སྙད་སྐད་རིགས་སློབ་མཁན། །

ད་ལྟའི་བྱིས་དུས་ཙམ་མིན་ན་དར་ལང་ཚོ་རྒྱན་མཁན། །

པ་ཕའི་མིང་ཙམ་མ་ཡིན་ཕ་ཚབ་བུ་རྒྱུད་གསོ་མཁན། །

བག་ཡོད་སྤྱོད་ལམ་སློབ་མཁན་མ་ཡུམ་ཁོང་འདྲ་ཨེ་ཡོད། །

ཙ་རིའི་ལམ་ཁྲིད་ཙམ་མིན་མཚར་སྡུག་མདུན་ལམ་སྟོན་མཁན། །

ཛ་དྲག་སྐུལ་སློང་ཙམ་མིན་ཝ་ལེར་ཤ་ཚས་སྐྱོང་མཁན། །

ཞྭ་གོས་འཚོ་ཚིས་ཙམ་མིན་བཟང་པོའི་དྲིན་འཇལ་སློབ་མཁན། །

འ་འུར་འདུ་འཛིས་མ་གཡེང་ཡ་རབས་སྐྱོང་བའི་ཨ་མ། །

ར་ལུག་དབྱེ་འབྱེད་ཙམ་མིན་ལ་ཀླུང་གནས་བཤད་གསུང་མཁན། །

ཤ་བཟའི་འཁོར་བ་ཙམ་མིན་ས་བཅུའི་ལམ་སྣ་འདྲེན་མཁན། །

ཧ་ཧུའི་དགོད་འཛུམ་ཙམ་མིན་ཨ་ནུའི་བྱིས་པ་གསོ་མཁན། །

ཧ་ལམ་བཙལ་ཀྱང་མ་རྙེད་ཨ་གསར་དབེན་པའི་ཨ་མ། །