ང་ནི་ཕྱི་ཡི་མཛེས་སྡུག་ལྷུན་པོར་ཆགས། །
ཁྱོད་རང་ནང་གི་མཛེས་པ་རྣལ་མར་དུང་། །
ང་ཡིས་མདུན་གྱི་མེ་ཏོག་འཐུ་ཞོར་ཆས། །
ཁྱོད་ཀྱིས་རྒྱབ་ཏུ་རེ་བཞག་དུ་མ་འཁུར། །
འུ་གཉིས་མ་གཞིར་ལྡོག་ཟླ་ཁོ་ནར་སྣང་། །
ང་རང་ཁུ་སིམ་སྡོད་པར་གཤིས་སུ་གྲུབ། །
ཁྱོད་ཉིད་འུར་ཟིང་ཀློང་ནས་རྒྱུ་བར་སྤྲོ། །
ང་ཡིས་སྒེར་གྱི་འཚོ་བར་མཛེས་ཆས་སྤྲས། །
ཁྱོད་ཀྱིས་གཞུང་གི་ལས་ལ་ཁ་དོག་བསྣན། །
འུ་གཉིས་མ་གཞིར་ལྡོག་ཟླ་ཁོ་ནར་སྣང་། །
ང་ཡིས་དབྱར་ཟླ་གསུམ་གྱི་མཛེས་པར་རེ། །
ཁྱོད་ཀྱིས་ཉིན་མཚན་དབྱེར་མེད་ཁ་བར་བསྒུགས།
ང་རང་སྟོན་གྱི་ལོ་མའི་ལང་ཚོར་འཁྲེང་། །
ཁྱོད་རང་དཔྱིད་དཔལ་བུ་མོའི་འཛུམ་ལ་ཞེན། །
འུ་གཉིས་མ་གཞིར་ལྡོག་ཟླ་ཁོ་ནར་སྣང་། །
ང་ཡི་མི་ཚེ་མནོག་ཆུང་བྱ་བར་སྟོངས། །
ཁྱོད་ཀྱི་མི་ཚེར་འཇའ་འོད་གུར་ཁང་ཕུབ། །
ཁྱོད་ལ་ཤེས་ཡོན་གཉིས་ལྡན་རྣམ་དཔྱོད་མངའ། །
ང་རང་ལེ་ལོས་བཟི་ནས་འབྱུང་འགྱུར་བརླགས། །
འུ་གཉིས་མ་གཞིར་ལྡོག་ཟླ་ཁོ་ནར་སྣང་། །