སྤང་ལ་མེ་ཏོག་བཞད་དུས། །

དྲི་བསུང་ཕྱོགས་བཞིར་འཐུལ་སོང་། །

ལས་དབང་དམ་དུ་སྦྲེལ་བས། །

ང་ཚོ་མཉམ་དུ་འཛོམས་སོང་། །

ལོ་བཞིའི་དགའ་སྐྱོ་ཆགས་སྡང་། །

ཕྱིར་དྲན་ཀློང་དུ་ཐིམ་སོང་། །

ང་དང་སྙིང་གི་གྲོགས་པོ། །

རང་རང་ས་ལ་གྱེས་སོང་། །

ཕྱོགས་སུ་ཐོན་པའི་གྲོགས་ཀྱི། །

མི་ཚེའི་འཕྲང་ལམ་རིང་མོར། །

སྤང་ལ་མེ་ཏོག་བཞད་འདྲའི། །

བཀྲག་མདངས་འཕྱུར་བའི་སྨོན་ལམ། །

ད་ཆ་དུས་ཚོད་ཟེར་བའི། །

གླེགས་བམ་དེ་ལ་ལྟ་དུས། །

གློ་དང་རྒྱུ་མའི་མཚམས་སུ། །

གསང་བ་མང་པོ་སྤུངས་ཤག །

གསང་བ་མང་པོའི་གསེབ་དང་། །

བརྩེ་བ་མང་པོའི་དཀྱིལ་དུ། །

དུངས་བ་ལྷུག་པོར་གཏམས་པས། །

ལས་ཀྱི་རི་མོ་གསལ་བྱུང་། །

ང་ནི་བྱང་གི་བྱིའུ་ཆུང་། །

ཁྱེད་ནི་ལྷོ་ཡི་ཁུ་བྱུག །

ང་ཚོ་འཁྲུངས་ཡུལ་མི་གཅིག །

འཛོམས་ས་གནས་མཆོག་ཉིང་ཁྲི། །

དབྱར་དགུན་སྟོན་དཔྱིད་ལོ་འཁོར། །

བར་མཚམས་མེད་པར་འཁོར་བས། །

སློབ་ཐོན་གྱེས་བྲལ་གླུ་ཚིག །

མིག་ཆུའི་གསེབ་ནས་བླངས་ཡོད། །

མིག་ཆུར་གཡོ་ལྷད་མེད་པས། །

བརྩེ་བའི་དྭངས་མ་ཡིན་སོང་། །

སློབ་གྲོགས་ལ་རྒྱའི་དར་ཤིང་། །

སེམས་ཀྱི་དབུ་རྩེར་བཞེངས་ཡོད། །

མཛེས་པའི་བཀྲ་ཤིས་འཇའ་ཚོན། །

གྲོགས་པོའི་ཕྱོགས་སུ་ཤར་རོགས། །

གྲོགས་པོ་གང་འགྲོའི་ས་ལ། །

གཏམ་བཟང་དྲི་བཞོན་ལྡང་ཤོག །

སླད་ཕྱིན་མི་ཚེའི་ལོ་ཟླར། །

བྱ་གཞག་ཡར་ངོའི་ཟླ་དང་། །

སྐུ་ཚེ་རི་རྒྱལ་ལྷུན་བཞིན། །

ཡང་ཡང་བརྟན་པའི་སྨོན་ལམ། །