ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཉེ་ཆར་ཀྲུང་ཡོའི་དུས་གཏན་མེ་འཁོར་གྱིས་ཟིན་ཐོ་གསར་པ་བཏོད་པའི་ཐད་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས“རྒྱུད་གཅིག་ལམ་གཅིག”མཉམ་སྐྲུན་གྱི་རྣམ་གྲངས་གཙོ་བོ་དང་མཚོན་རྟགས་རང་བཞིན་གྱི་སྤུས་རྟགས་ཤིག་ཡིན་པའི་ཀྲུང་ཡོའི་དུས་གཏན་མེ་འཁོར་ཨེ་ཤེ་ཡ་དང་ཡོ་རོབ་ཚོང་དོན་གྱི་མིང་དོན་མཚུངས་པའི“གསེར་གྱི་བགྲོད་ལམ”ཞིག་ཏུ་གྱུར་ཡོད་ཅེས་བརྗོད།

“ཀྲུང་ཡོའི་དུས་གཏན་མེ་འཁོར་གྱིས་ཟིན་ཐོ་གསར་པ་བཏོད་པར་རྟེན་འབྲེལ་ཞུ་གི་ཡིན” མའོ་ཉིང་གིས“རྒྱུད་གཅིག་ལམ་གཅིག”མཉམ་སྐྲུན་གྱི་རྣམ་གྲངས་གཙོ་བོ་དང་མཚོན་རྟཌ་རང་བཞིན་གྱི་སྤུས་རྟགས་ཡིན་པའི་ཀྲུང་ཡོའི་དུས་གཏན་མེ་འཁོར་ཡོ་རོབ་ཀྱི་རྒྱལ་ཁབ་25ཡི་གྲོང་ཁྱེར་223ལ་ཤར་གཏོང་ཐུབ་ཡོད་ལ། ཨེ་ཤེ་ཡའི་རྒྱལ་ཁབ་11གི་གྲོང་ཁྱེར་100ལྷག་ཙམ་དང་འབྲེལ་མཐུད་བྱས་ཡོད། འདས་ཟིན་པའི་ལོ་8ཙམ་རིང་ཀྲུང་ཡོའི་དུས་གཏན་མེ་འཁོར་ལོ་རེར་གཏོང་ཐེངས་1702ཟིན་པ་ནས་ཁྲི་1.7བར་མང་དུ་བཏང་ཡོད། ལོ་རེའི་དངོས་ཟོག་སྐྱེལ་འདྲེན་གྱི་རིན་ཐང་ཨ་སྒོར་དུང་ཕྱུར་80ནས་ཨ་སྒོར་དུང་ཕྱུར་567བར་འཕར་ནས་ཨེ་ཤེ་ཡ་དང་ཡོ་རོབ་ཚོང་དོན་གྱི་མིང་དོན་མཚུངས་པའི“གསེར་གྱི་བགྲོད་ལམ”ཞིག་ཏུ་གྱུར་ཡོད་ཅེས་བརྗོད།

གཞུང་ལམ་ཤར་གཏོང་ཐུབ་ན་ལས་རིཌ་དར། ཀྲུང་ཡོའི་དུས་གཏན་མེ་འཁོར་གྱིས་སྐྱེལ་འདྲེན་བྱེད་པ་ནི་ཚོང་ཟོག་དང་། བརྒྱུད་སྤྲོད་བྱེད་པ་ནི་གོ་སྐབས། འཁྱེར་ཡོང་བ་ནི་རེ་བ་བཅས་ཡིན། དུས་གཏན་མེ་འཁོར་གྱིས་ཀྲུང་གོ་དང་ཡོ་རོབ་ཀྱི་ཚོང་ཟོག་ཕ་རོལ་པོའི་ཁྲོམ་རར་མགྱོགས་མྱུར་འབྱོར་བར་སྟབས་བདེ་བསྐྲུན་པ་མ་ཟད། ཟོག་འགྲེམས་དང་། བཟོ་ལས། ཚོང་དོན་ལྟེ་གནས། ཐོན་ལས་གླིང་ཁུལ་བཅས་གསར་པ་མུ་མཐུད་ཐོན་རྒྱུར་སྐུལ་ཁྲིད་བྱས་ནས་ཀྲུང་ཡོའི་དབར་གཉིས་ཁེ་གཉིས་ཕན་གྱི་འབྲེལ་ཟམ་བསྐྲུན་ཡོད་ཅེས་ཁོང་གིས་བརྗོད།