འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉེ་ཆར། བོད་ཀྱི་མི་རིགས་ལག་ཤེས་བཟོ་ལས་ཐོན་ལས་མནའ་འབྲེལ་བཙུགས་པ་རེད། གསར་འགོད་པས་མནའ་འབྲེལ་འཛུགས་པའི་ཚོགས་ཆེན་ཐོག་ནས་ཤེས་རྟོགས་བྱས་པར་གཞིགས་ན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཚད་མཐོའི་མཐོང་ཆེན་བྱས་པ་བརྒྱུད། རང་ལྗོངས་ཀྱི་མི་རིགས་ལག་ཤེས་བཟོ་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ཡོད། མིག་སྔའི་བར་ལྗོངས་ཡོངས་ཀྱི་མི་རིགས་ལག་ཤེས་བཟོ་ལས་གཉེར་སྐྱོང་བྱེད་པོ་2500ལྷག་ཙམ་དང་ལས་ཞུགས་མི་གྲངས་ཁྲི་3.4ལྷག་ཙམ་ཡོད། ལྗོངས་ཡོངས་སུ་ཀྲུང་གོའི་བཟོ་རྩལ་མཛེས་རྩལ་མཁས་ཅན་གྱི་མཚན་སྙན་ཐོབ་མཁན་ཁྱོན་8དང་། རང་སྐྱོང་ལྗོངས་ཀྱི་བཟོ་རྩལ་མཛེས་རྩལ་མཁས་ཅན་65 ས་ཁུལ（གྲོང་ཁྱེར）རིམ་པའི་བཟོ་རྩལ་མཛེས་རྩལ་མཁས་ཅན་126བཅས་ཡོད་པ་རེད། རང་ལྗོངས་ཀྱི་སྲོལ་རྒྱུན་ལག་རྩལ་རྒྱུན་འཛིན་ཐུབ་པ་དང་སྟོངས་ཉེའི་བཟོ་རྩལ་རྒྱུན་མཐུད་ཐུབ་པ་བྱུང་བ་མ་ཟད། ཤེས་ལྡན་པའི་དཔུང་ཁག་ཀྱང་རིམ་བཞིན་སྟོབས་ཆེར་འགྲོ་བཞིན་ཡོད་པ་རེད།

（བདེ་དབང་དང་སྒྲོན་ལགས་ཀྱིས་སྒྱུར་ཞུས་བྱས）