སྣང་བ་རབ་རིབ་ཀྱི་ཟླ་འོད་ཀློང་ནས། །

མཚན་མོའི་ལྷིང་འཇགས་ཀྱི་ཁུག་སོ་དེ་རུ། །

ཐ་སྙད་གསོན་པོ་ཞིག་དབྱངས་ལ་གྱེར་བཞིན། །

ཚོར་བ་རྣོན་པོ་ཞིག་སེམས་ཀྱིས་མྱངས་ཡོད། །

ཟླ་འོད་གཞོན་ནུ་ཞིག་མཁའ་ནས་འཚེར་དུས། །

སྒེའུ་ཁུང་ཕྱི་རོལ་གྱི་འཇིག་རྟེན་དཀར་པོས། །

མཚན་མོའི་ཁོར་ཡུག་གི་མུན་པ་བསལ་ཏེ། །

འཇིག་རྟེན་ཆུང་ཆུང་ལ་མཛེས་རྒྱན་སྤྲས་འདུག །

ལྷིང་འཇཌ་མཚན་མོ་ཡི་མཁའ་དབྱིངས་སྟོང་པར། །

རྒྱུ་སྐར་མེ་ཏོག་གི་ཁྲ་ཚོམ་བཞད་དུས། །

ཚོར་བ་དབྱངས་རྟ་ལ་བསྐྱོན་པའི་རྣམ་ཤེས། །

བསིལ་རླུང་འཇམ་པོ་ཡི་ཁྲོད་དུ་ངལ་གསོས། །

ཡངས་པའི་མཁའ་མཐའ་རུ་སྐར་ཚོཌ་བཀྲ་ཞིང་། །

བསིལ་ཟེར་འོད་དཀར་གྱིས་འཇིག་རྟེན་ཁྱབ་དུས། །

ཚོར་འདུ་གསོན་པོ་ཡི་གས་སྲུབས་བར་ནས། །

ཡིད་ཀྱི་ཚོར་བ་ལ་བདེ་སྣང་སྦྱིན་འོང་། །

བསིལ་རླུང་འཇམ་པོ་ཞིག་དལ་བུར་ལྡང་དུས། །

ཁུ་སིམ་གཞས་ཆུང་གི་རོལ་དབྱངས་ཉན་བཞིན། །

ཞིམ་མངར་འོ་ཇ་ཡི་བྲོ་བ་མྱོང་ཞོར། །

ནང་སེམས་ལྷིང་འཇགས་ཀྱི་རྨི་ལམ་རོལ་ཡོད། །

ཁ་ཆར་ཟམ་ཟིམ་ཞིག་མཁའ་ནས་བབས་ཏེ། །

ལུས་སེམས་ཕྱི་ནང་དེ་ཡོངས་སུ་བརླན་དུས། །

རྟོག་འགྱུའི་འཆར་སྣང་གི་འཇིག་རྟེན་བསྐྲུན་ཏེ། །

མཛེས་སྡུག་ཐ་སྙད་ཀྱི་མཁར་རྫོང་བཞེངས་ཡོད། །

སྣང་བའི་འདབ་མ་ཞིག་གཡོ་བའི་ཚལ་ན། །

ཚོར་བའི་མེ་ཏོག་ཅིག་སེམས་སུ་འཁྲུངས་དུས། །

ཚིག་ཚོགས་དབྱངས་རྟ་ཡི་རོལ་མོ་དཀྲོལ་ཏེ། །

ཡིད་འོང་ལྷིང་འཇགས་ཀྱི་འཚོ་བར་རོལ་སོང་། །