ཁྱོད་འུ་གཉིས་སྡོང་གྲོགས་དཔེ་དེབ་བྱ། །

དེ་ལོས་བྱ་འོད་ཀྱི་བདག་པོ་རེད། །

འོད་མེད་ན་འཇིག་རྟེན་སྨག་གིས་ཁེངས། །

འོད་མེད་ན་འགྲོ་ལམ་མུན་པས་བཀག །

འོད་བདག་པོ་དཔེ་དེབ་གྲོགས་སུ་བསྟེན། །

ས་ཐག་རིང་རིག་པའི་སྡོང་གྲོགས་ཡོད། །

ཡུལ་རྒྱལ་ཁམས་སེམས་ཀྱིས་རེག་རྒྱུ་ཡོད། །

གྲོགས་བརྒྱ་སྟོང་སྐར་ཚོགས་ཤར་འདྲའི་ཁྲོད། །

གྲོགས་དཔེ་དེབ་འདྲ་བ་རིག་རྒྱུ་མེད། །

ཁྱོད་འུ་གཉིས་གྲོགས་པོ་དཔེ་དེབ་བྱ། །

དེ་ལོས་བྱ་རིག་པའི་ལྡེ་མིག་རེད། །

ཕྱི་འཇིག་རྟེན་ཁམས་ཀྱི་མཛེས་ལྗོངས་དང་། །

ནང་སེམས་ཀྱི་དཔལ་ཡོན་རྒྱས་འདོད་ན། །

ཤེས་རིག་པའི་ལྡེ་མིག་ངེས་པར་མཁོ། །

དེ་མ་ཚོར་མ་ཤེས་བརླགས་སོང་ན། །

ཁྱོད་འུ་གཉིས་འཇིག་རྟེན་ཆུང་ཆུང་འདིར། །

སྐྱིད་ཟེར་བ་ཡོང་རྒྱུ་དཀའ་མོ་རེད། །

ནང་སེམས་ཀྱི་ཕུགས་འདུན་འགྲུབ་པར་དཀའ། །

ཁྱོད་འུ་གཉིས་འགྲོ་རོགས་དཔེ་དེབ་བྱ། །

དེ་ལོས་བྱ་དགུང་གི་ཉི་ཟླ་རེད། །

དགུང་ཉི་མ་མེད་ན་དྲོད་ཁོལ་མེད། །

དུང་ཟླ་བ་མེད་ན་བསིལ་ཟེར་མེད། །

དགུང་ཉི་ཟླ་རོགས་སུ་འགྱུར་སོང་ན། །

རི་མཐོན་པོ་རྡོག་པས་མནན་ཞོར་དུ། །

ལྷོད་ཤིག་ཤིག་ངང་ནས་སྤྲིན་པར་བཞོན། །

སྤྲིན་དཀར་པོར་བཞོན་ནས་གཞན་ཡུལ་འགྲིམས། །

གཞན་ཡུལ་གྱི་མཛེས་སྡུག་མིག་གིས་བལྟ། །