ང་ཚོས་ནམ་རྒྱུན་དཔེ་དེབ་ནི་ཤེས་རིག་གི་སྒོ་མོ་འབྱེད་པའི་ལྡེ་མིག་དང་། ཤེས་བྱའི་རྒྱ་མཚོ་སྒྲོལ་བའི་གྲུ་གཟིངས། གཏམ་བརྗོད་ཀྱི་སྤོབས་པ་སྦྱིན་པའི་སྨྲ་ལྕེ། དཀར་ནག་དབྱེ་ཤན་འབྱེད་པའི་རྣམ་དཔྱོད། བཟང་ངན་འཇུག་ལྡོག་སྟོན་པའི་བློ་མིག ཐེ་ཚོམ་གྱི་དྲ་བ་གཅོད་པའི་རལ་གྲི ཤེས་བྱའི་བ་གམ་སྙེག་པའི་སྐས་འཛེག བསླུ་མེད་ཕྱི་ཐག་རིང་བའི་གྲོགས་མཆོག ལམ་ནོར་ལྡོག་ཤེས་སྟོན་པའི་སློབ་དཔོན། རྨོངས་མུན་སེལ་བའི་ཉིན་བྱེད་དང་ཤེས་རིག་གི་ནོར་བུ་སྦྲུམ་པའི་བང་མཛོད། འགྱུར་མེད་ཀྱི་དགའ་གྲོགས་སྐྱོ་གྲོགས་དང་། མི་ཚེའི་འཕྲང་ལམ་རིང་མོའི་དཔུང་རོགས་ཡག་ཤོས། སྐོམ་པ་སེལ་བའི་བདུད་རྩི་དང་འཚོ་བར་ཁ་དོག་སྩོལ་བའི་འཇའ་འོད། མཐོང་རྒྱ་དང་ཐོས་རྒྱ་སྐྱེད་པའི་དགོས་འདོད་ཀྱི་ནོར་བུ་ཀུན་འབྱུང་སོགས་ཀྱི་དཔེ་རུ་འཇོག་བཞིན་ཡོད་པས། དེ་ལས་དཔེ་ཀློག་གི་ཕན་ཡོན་དང་། རིན་ཐང་། ནུས་པ་སོགས་རྟོགས་ཐུབ།

འཛམ་གླིང་དཔེ་ཀློག་ཉིན་མོ་ཐེངས་ཉེར་དགུ་པ་ཤར་བ་དང་བསྟུན་ནས། འདི་ག《སེམས་སྐྱིད་ཇ་ཁང》གི་པར་ངོས་སུ་དཔེ་ཀློག་དང་འབྲེལ་བའི་རྩོམ་ཡིག་འགའ་བཀོད་དེ་རྒྱ་ཆེའི་ཀློག་པ་པོ་རྣམ་པའི་སྤྱན་སྔར་བསྟར་ཡོད་པས། ལྷན་རྒྱས་ནས་དགྱེས་གཟིགས་གནང་བར་འཚལ་ལོ།།