འདི་ག་ཚགས་པར་ཁང་དུ་པེ་ཅིང་ནས་གློག་འཕྲིན་འབྱོར་གསལ། ཉེ་ཆར་ནུབ་ཕྱོགས་ཀྱི་སྨྱན་སྦྱོར་འགའ་ཞིག་གིས་ཀྲུང་གོའི་དུས་ཚིགས་དང་པོའི་རྒྱལ་དམངས་དཔལ་འབྱོར་འཁོར་སྐྱོད་ཀྱི་གྲངས་གཞི་གཙོ་བོ་སོགས་ལ་དོ་ཁུར་བྱེད་པའི་སྐོར་ལ། ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས། འདི་ལོ་ཀྲུང་གོའི་དཔལ་འབྱོར་གྱི་དམིགས་ཚད་ཁག་འགོ་ཡག་པོ་ཚུགས་ཡོད། ཉེ་དུས་རྒྱལ་སྤྱིའི་སྤྱི་ཚོགས་ཐོག་ཀྲུང་གོར་ལྟ་སྟངས་ཡག་པོ་འཛིན་པའི་སྐད་སྒྲ་ཇེ་མང་དུ་འགྲོ་བཞིན་ཡོད་ལ། ཀྲུང་གོའི་འཕེལ་རྒྱས་ལ་ཡིད་ཆེས་བྱེད་ཤུགས་ཀྱང་ཆེ་རུ་འགྲོ་བཞིན་ཡོད་ཅེས་བརྗོད།

ལིན་ཅན་གྱིས“ཉེ་དུས་རྒྱལ་སྤྱིའི་སྤྱི་ཚོགས་ཐོག་ཀྲུང་གོར་ལྟ་སྟངས་ཡག་པོ་འཛིན་པའི་སྐད་སྒྲ་ཇེ་མང་དུ་འགྲོ་བཞིན་ཡོད་ལ། ཀྲུང་གོའི་འཕེལ་རྒྱས་ལ་ཡིད་ཆེས་བྱེད་ཤུགས་ཀྱང་ཆེ་རུ་འགྲོ་བཞིན་ཡོད་པ་ང་ཚོར་དོ་སྣང་བྱུང”ཞེས་བརྗོད་པ་དང་། ཁོང་གིས། ཨེ་ཤེ་ཡ་གསར་སྤེལ་དངུལ་ཁང་དང་། ཀའོ་ཧྲེང་། མོ་ཀེན་ཧྲི་ཏན་ལི་སོགས་རྒྱལ་སྤྱིའི་དངུལ་རྩའི་སྒྲིག་གཞིས་འདི་ལོའི་ཀྲུང་གོའི་དཔལ་འབྱོར་འཕར་ཚད་ཀྱི་སྔོན་དཔག་གཅིག་རྗེས་གཉིས་མཐུད་ངང་མཐོ་རུ་བཏང་བ་དང་། ཨེ་ཤེ་ཡ་གསར་སྤེལ་དངུལ་ཁང་གིས་ཡོངས་བསྒྲགས་བྱས་པའི《2024ལོའི་ཨེ་ཤེ་ཡའི་འཕེལ་རྒྱས་རྒྱང་ལྟ》ཞེས་པའི་སྙན་ཞུའི་ནང་2024ལོ་ནས་2025ལོར་ཀྲུང་གོས་ཨེ་ཤེ་ཡའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་དཔལ་འབྱོར་འཕར་བར་ལེགས་སྐྱེས་འབུལ་ཚད་46%ཟིན་ནས་གོ་ལ་ཧྲིལ་པོའི་དཔལ་འབྱོར་འཕར་བར་ལེགས་སྐྱེས་འབུལ་ཆེ་ཤོས་ཀྱི་དཔལ་འབྱོར་སྒྲིག་གཞི་མུ་མཐུད་རྒྱུན་འཁྱོངས་བྱེད་རྒྱུའི་སྔོན་དཔག་བྱས་ཡོད་ཅེས་བརྗོད།