འདུས་པ་ཁྲོམ་གྱི་གར་སྟེགས་སུ། །

སྐེད་པའི་འཁྲི་ཤིང་རབ་ཕྲ་མའི། །

མཉེན་ལྕུག་ལུས་ཀྱི་རྣམ་འགྱུར་དེས། །

དབང་མེད་མིག་ཟུང་ལྐོག་ནས་ཁྱེར། །

རབ་མཛེས་སྙིང་རྗེའི་རང་གཟུགས་འཕྲུལ། །

མི་མངོན་ནམ་མཁའི་ལྷ་མོ་བཞིན། །

ཡིད་འོང་ལྷོད་པའི་ཉམས་འགྱུར་དེ། །

མིག་གི་དཔལ་དུ་བྱོན་པ་ལེགས། །

གཞན་སེམས་རྐུ་བའི་ཞལ་རས་ངོས། །

མ་བཅོས་འཛུམ་གྱི་ཚེམས་ཕྲེང་དགོད། །

མཆུ་སྒྲོས་ཨུཏྤལ་ར་མདའ་ཡིས། །

གཞོན་པའི་ཡིད་ཀྱི་སྦྲང་མ་སྒུལ། །

ལུས་མཛེས་དབྱར་གྱི་སྤང་ཐང་འདྲ། །

གསུང་སྐད་ཁུ་བྱུག་དོ་ཟླར་འཁུ། །

སྙིང་གཏམ་བདུད་རྩིའི་སྐྱེམས་ཆང་གིས། །

བུང་བ་དགའ་བདེའི་དཔལ་གྱིས་མྱོས། །

ལུས་ཀྱི་སྟངས་སྟབས་མིག་གི་དཔལ། །

ངག་གི་གྲེ་འགྱུར་རྣ་བའི་དཔྱིད། །

སེམས་ཀྱི་རང་བཞིན་གངས་རིའི་མདོག །

ནང་སེམས་མྱོས་པའི་རྒྱུ་རུ་གྱུར། །

ཞལ་ཁྱིམ་པདྨའི་མེ་ཏོག་མཛེས། །

ཞལ་མཆུ་གེ་སར་སྙིང་པོ་ཡག །

ཞལ་གྱི་ཡན་ལག་འདབ་མ་གྲོལ། །

ཞལ་བཟང་ཡིད་འོང་ལྟ་ན་སྡུག །