ཀུན་གྱི་སེམས་ནུས་གཅིག་ཏུ་སྒྲིལ།

ཉེ་བའི་ལོ་ཤས་རིང་། རང་ལྗོངས་ཀྱི་རིམ་ཁག་ཏང་ཨུད་དང་སྲིད་གཞུང་གིས་བློ་བརྟན་འགྱུར་མེད་ངང་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ཀྱི“དོན་ཆེན་བཞིར”དམ་འཛིན་ཡག་པོ་བྱས་ནས“འཛུགས་གཏོད་བཞིར”སྐུལ་འདེད་ཏན་ཏིག་བཏང་བས། བྱ་གཞག་ཁག་ལ་གྲུབ་འབྲས་རླབས་པོ་ཆེ་ཐོབ་ཡོད། སྔོན་དཔག་བྱས་ན་ལོ་ཧྲིལ་པོར་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་9%ཙམ་འཕར་བ་དང་། མི་རེའི་ཆ་སྙོམས་ཀྱི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་སྒོར་ཁྲི་6ལྷག་ཙམ་ཟིན་པ། གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་10%ལྷག་ཙམ་འཕར་བ། དཔལ་འབྱོར་དམིགས་ཚད་གཙོ་བོ་འཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་པ་བཅས་རེད།

མིག་སྔའི་བར་ལྗོངས་ཡོངས་ཀྱི་གྲོང་ཁྱེར་དང་ས་ཁུལ་བདུན་གྱིས“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་གྲོང་ཁྱེར（ས་ཁུལ）གྲུབ་འབྲས་ཐོབ་པའི་ངང་འཛུགས་གཏོད་བྱས་པ་དང་། མཉམ་སྡེབ་140དང་མི་སྒེར་189ལ་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ་དང་དཔེ་བཟང་མི་སྒེར་གྱི་མཚན་སྙན་ཐོབ་པ། མཉམ་སྡེབ་1944དང་མི་སྒེར་2857ལ་ལྗོངས་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་མཉམ་སྡེབ་དང་དཔེ་བཟང་མི་སྒེར་གྱི་མཚན་སྙན་ཐོབ་ཡོད།

ད་ཆའི་གངས་ལྗོངས་ས་མཐོར་མི་རིགས་ཁག་གི་མང་ཚོགས་མཉམ་སྡོད་དང་། མཉམ་སྦྱོང་། མཉམ་ལས། མཉམ་སྤྲོ་བཅས་ཀྱི་ཁྲོད་འགྲོ་འོང་དང་། སྤེལ་རེས། མཉམ་འདྲེས་བཅས་བྱུང་ནས་ཀུན་སེམས་གཅིག་ཏུ་བསྒྲིལ་ཡོད།

སྤུས་བཟང་འཕེལ་རྒྱས་ལམ་བུར་སྐྱོད།

“རླུང་འཁོར་འཁོར་བ་མཐོང་སྐབས་ང་བློ་ཧ་ཅང་བདེ་པོ་འདུག” པད་མས་མཚོ་སྨད་རྫོང་གྲི་གུ་གྲོང་རྡལ་དུ་ཟ་ཁང་ཞིག་གཉེར་ཡོད། དེ་སྔ་གློག་བརྟན་པོ་མེད་པས་ཚོང་ཁང་ནང་གི་གློག་ཆས་རྟག་ཏུ་འཚིག་གི་ཡོད། གྲི་གུ་རླུང་གློག་རྣམ་གྲངས་ཐོན་སྐྱེད་བྱེད་འགོ་ཚུགས་པ་དང་ཆབས་ཅིག་ཁོང་ཚོར་ཡང་རླུང་གློག་བརྟན་པོ་སྤྱོད་ཐུབ་ཡོད།

མིག་སྔར་གོ་ལ་ཧྲིལ་པོའི་ས་བབ་མཐོ་ཤོས་ཀྱི་རླུང་ཤུགས་གློག་ཁང་མཚོ་སྨད་གྲི་གུ་རླུང་གློག་གི་དུས་ཐེངས་དང་པོའི་རྣམ་གྲངས་ཀྱི་གློག་འདོན་ཚད་ཀྲའོ་ཝ་22ཟིན་པ་དང་། 2021ལོའི་ཟླ་12པའི་ཟླ་མཇུག་ཏུ་གློག་འདོན་ཚད་ཆུ་ཚོད་ཆན་ཝ་དུང་ཕྱུར་1.4ཙམ་ཟིན་ཡོད།

ད་ཆ་བོད་ཀྱི་ལོའི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་2000ལས་བརྒལ་ནས་གྲོང་ཁྱེར་དང་གྲོང་གསེབ་ཀྱི་རྣམ་པར་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཞིང་། “བསྐྱར་དར་རྟགས་ཅན”གྱི་མེ་འཁོར་གངས་རིའི་མཐའ་ནས་བསྐོར་ཏེ་བྱ་འཕུར་བ་ལྟར་སྐྱོད་བཞིན་ཡོད་པ་སོགས་གངས་ལྗོངས་ས་མཐོར་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བའི་རྣམ་པ་མངོན་བཞིན་ཡོད།

ས་མཐོའི་རང་བྱུང་སྐྱེ་ཁམས་སྲུང་།

གྲངས་གཞི་ལས་མངོན་པར། རང་ལྗོངས་ཀྱི་གྲོང་ཁྱེར་དང་གྲོང་རྡལ་གཙོ་བོའི་མཁའ་རླུང་སྤུས་ཚད་ལེགས་པའི་ཉིན་གྲངས་ཀྱི་བསྡུར་ཚད་99.9%ཟིན་ཞིང་། ལྷ་ས་གྲོང་ཁྱེར་གྱི་མཁའ་རླུང་སྤུས་ཚད་ལེགས་པའི་ཚད་གཞི་དེ་རྒྱལ་ཡོངས་ཀྱི་གཙོ་གནད་གྲོང་ཁྱེར་168ནང་ཨང་དང་པོར་སླེབས་པ་དང་། ཆུ་བོ་དང་མཚོ་གཙོ་བོའི་ཆུ་སྤུས་ལེགས་པ་དང་ས་ངོས་ཀྱི་ཆུའི་སྤུས་ཚད་ལོན་ཚད་100%ཟིན་ནས་བོད་འདི་ཉིད་སྔར་བཞིན་འཛམ་གླིང་ཐོག་ཁོར་ཡུག་སྤུས་ཚད་ལེགས་ཤོས་ཀྱི་ས་ཁུལ་གྲས་ཤིག་རེད།

ལྷ་ས་ལྷོ་བྱང་རི་བོའི་སྔོ་འགྱུར་ལས་གྲྭ་གདོང་དཀར་ནགས་བཟོའི་ཡུག་ཁུལ་3པར་རྣམ་གླིང་རྫོང་པེ་ཤིང་ངལ་ནུས་ཚད་ཡོད་འགན་འཁྲི་ཀུང་སིའི་ཏུང་ཧྲི་ཀྲང་ཉི་མ་སྲི་ཆོད་ཀྱིས་ལས་རོགས་ཚོའི་སྣེ་ཁྲིད་དེ་ལྕང་སོན་གཡོག་བྱེད་ཀྱི་ལས་དོན་ཞིབ་ཚགས་ངང་སྒྲུབ་བཞིན་ཡོད། ཁོང་གིས“ལྕང་སོན་དེ་དག་ཉིན་རེ་སྐྱེ་འཚར་ཡག་པོ་ཡོད་པ་མཐོང་སྐབས་དགའ་ཚོར་ཆེན་པོ་ཡོང་གི་འདུག”ཅེས་བཤད།

ངོ་སྤྲོད་བྱས་པར་གཞིགས་ན། 2022ལོར་ལྷ་སའི་ལྷོ་བྱང་རི་བོའི་སྔོ་འགྱུར་ལས་གྲྭར་ཤིང་འཛུགས་སྔོ་འགྱུར་གྱི་མ་དངུལ་སྒོར་དུང་ཕྱུར་13.7བཏང་བ་དང་། རིམ་རྩིས་བྱས་ན་ལྕང་སོན་རྐང་ཁྲི་1700ལྷག་ཙམ་བཙུགས་པ་དང་། ནགས་བཟོ་མུའུ་ཁྲི་14ཙམ་བྱས་པ། ལྕང་སོན་གསོན་ཚད་70%ཡན་ཟིན་པ་བཅས་ལས་དོན་ཁག་བརྟན་པོའི་ངང་སྤེལ་བཞིན་ཡོད།

མཐའ་སྲུང་མཐའ་བརྟན་ལྕགས་རི་བསྐྲུན།

དེང་རབས་ཅན་གྱི་བོད་བཟོའི་ཁང་པ་སྟར་པ་རེ་རེ་སྔོ་ལྗང་རི་ཀླུང་གིས་བསྐོར་བའི་རི་གཤམ་དུ་ཆགས་པ་དང་གཙང་ལ་གྲལ་འགྲིག་པའི་གྲོང་ཚོའི་ལམ་བུ་ཤར་གཏོང་ཐུབ་པ་དེ་ནི་ད་ཆའི་ཡུལ་སྨད་ཀྱི་རྣམ་པ་ཡིན། དེ་སྔའི“མི་གསུམ་ཤང”ནས་ད་ཆ་ཁོངས་གཏོགས་སུ་སྲིད་འཛིན་གྲོང་ཚོ་གཉིས་ཡོད་པའི“འབྱོར་འབྲིང་ཤང”དུ་གྱུར་ཡོད།

2018ལོ་ནས་བཟུང་ཡུལ་སྨད་ཤང་དུ་མཐའ་མཚམས་འབྱོར་འབྲིང་གྲོང་ཚོ་དང་དེ་བཞིན་ལེ་ལག་ཚང་བའི་སྒྲིག་བཀོད་འཛུགས་སྐྲུན་བྱས་པ་དང་། 2019ལོར་ཆུ་ཡུལ་སྣུམ་ནག་གཞུང་ལམ་བསྐྱར་སྐྲུན་ལས་གྲྭ་ཁྱོན་ཡོངས་ནས་བསྐྲུན་ཟིན་ཏེ་ཡུལ་སྨད་ལ་ལོ་ལྟར་ཁ་བ་ཆེན་པོས་ལམ་འགག་པའི་དཀའ་གནད་བསལ་བ། དེ་དང་ཆབས་ཅིག་རྒྱལ་ཁབ་གློག་དྲས་ཆན་ཧྥུའུ་10ཡི་གློག་འདྲེན་སྐུད་ལམ་ཡུལ་སྨད་དུ་ཁྲིད་པས་ཡུལ་སྨད་ལ་བདེ་འཇགས་ལྡན་པའི་གློག་བརྟན་པོ་སྤྱོད་རྒྱུ་བྱུང་ཡོད། 2022ལོར་ཡུལ་སྨད་ཤང་གི་མི་རེའི་ཆ་སྙོམས་ཡོང་འབབ་སྒོར་ཁྲི་4.4ཙམ་ཟིན་པ་དང་མི་རེའི་ཆ་སྙོམས་སྡོད་ཁང་གི་རྒྱ་ཁྱོན་སྨི་ངོས་གྲུ་40ཟིན་གྱི་ཡོད།

ཡུལ་སྨད་ཤང་གི་འཕོ་འགྱུར་ནི་རང་ལྗོངས་ཀྱི་མཐའ་མཚམས་ས་ཁུལ་འཛུགས་སྐྲུན་ལ་ཤུགས་སྣོན་རྒྱག་པ་དང་རྒྱལ་ཁབ་ཀྱི་མཐའ་བརྟན་མཐའ་དར་དམངས་ཕྱུག་བྱ་སྤྱོད་ཀྱི་དཔེ་སྟོན་ཁུལ་འཛུགས་གཏོད་ཧུར་ཐག་བྱས་ནས་རྒྱལ་ཁབ་ཀྱི་བདེ་འཇགས་སྲུང་ཡོལ་བརྟན་པོ་སྐྲུན་པའི་བསྡུས་རིས་ཤིག་རེད།

མཐའ་མཚམས་དར་རྒྱས་བྱུང་ན་མཐའ་མཚམས་བརྟན་ལྷིང་ཡོང་བ་དང་། མཐའ་མཚམས་མི་སེར་ཕྱུག་པོ་ཆགས་ན་མཐའ་སྲུང་མཐའ་བརྟན་ཡོང་ཐུབ། རང་ལྗོངས་ཀྱི་མི་རིཌ་ཁག་གི་མང་ཚོགས་ཚོས་ཐོག་མཐའ་བར་གསུམ་དུ་གཙོ་འཛིན་གྱི་མངགས་བཅོལ་བློ་ལ་བརྟན་པོར་བཅངས་ནས་རྒྱལ་གཅེས་མཐའ་སྲུང་གི་སྙིང་སྟོབས་རྒྱུན་འཛིན་གྱིས་སྐལ་བཟང་མེ་ཏོག་ལྟར་གངས་ལྗོངས་ཀྱི་མཐའ་མཚམས་སུ་གཞི་ཚུཌ་ཏེ་བླ་ན་མེད་པའི་རྒྱལ་ཁབ་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱས་ནས་ཏང་གི་འོད་ཟེར་མཐའ་མཚམས་སུ་འཕྲོ་བ་དང་མཐའ་མཚམས་མི་དམངས་ཀྱི་སེམས་པ་ཏང་ལ་ཕྱོཌ་པའི་མི་སེམས་འགུལ་བའི་གཏམ་རྒྱུད་རྩོམ་བཞིན་ཡོད།