༄༅་། བཏང་སྙོམས་།

བཏང་སྙོམས་ནི།

འབོད་ཚིག་ཅིག་ཡེ་ནས་མིན།

བཏང་སྙོམས་ནི།

གླེང་ཆོག་ཆོག་གི་སྐད་ཆ་སྙན་པོ་དེ་བས་མིན།

བཏང་སྙོམས་ནི།

ཡིད་ཀྱི་སྣེ་མོར་བསྐོན་པའི་ལ་རྒྱའི་མདུད་པ་ཡིན།

ཕྱོགས་རིས་དང་རྒྱང་དུ་བཀྱེད་པ་དེ་བཏང་སྙོམས་སོ།

ཀུན་ལ་ལྟ་བའི་མིག་ཟུང་མངའ་བ་དེ་བཏང་སྙོམས་སོ།

ཡོད་ཚད་ལ་སྨན་པའི་གཏམ་སྨྲ་བ་དེ་བཏང་སྙོམས་སོ།

བཏང་སྙོམས་ནི།

རྒྱུ་མེད་རྐྱེན་མེད་མ་རེད།

བཏང་སྙོམས་ནི།

གཟུགས་མེད་སྒྲ་མེད་མ་རེད།

བཏང་སྙོམས་ནི།

སྙིང་ལ་བཏབ་པའི་དམ་ཚིག་གི་ཕུར་པའོ།

འདུ་ཤེས་ལ་ལྷད་མ་ཞུགས་པ་དེ་བཏང་སྙོམས་སོ།

རང་ཉིད་ཁོ་ན་མ་བསམ་པ་དེ་བཏང་སྙོམས་སོ།

སྤྱི་མཐུན་གྱི་ལྟ་བ་རྙེད་པ་དེ་བཏང་སྙོམས་སོ།

༄༅་། ཞིང་གྲོང་གི་འགྱུར་ཁུག་།

རྣ་བ་ཀྲོང་ངེར།

ཆེས་ཉེ་ས་ཞིག་ནས།

ཞིང་གྲོང་གི་འགྱུར་ཁུག་ལ་ཉན་དུས།

གདོད་མའི་གླུ་དབྱངས་ཤིག་གིས།

བྱིས་དུས་ཀྱི་སྣང་བ་ཐང་མར་བརྡལ་བྱུང་།

མིག་ཟུང་གསལ་ལེར།

ཆེས་ཡངས་ས་ཞིག་ནས།

ཞིང་གྲོང་གི་ལྷོད་ཉམས་ལ་ལྟ་དུས།

གདོད་མའི་བག་ཆགས་ཤིག་གིས།

བྱིས་དུས་ཀྱི་རྩེད་ར་ཞེ་ལ་ཐོགས་བྱུང་།

ལུས་སེམས་ལྷོད་བདེར།

ཆེས་རིང་ས་ཞིག་ནས།

ཞིང་གྲོང་གི་པང་ལ་འཁོར་དུས།

གདོད་མའི་གཏམ་རྒྱུད་ཅིག་གིས།

བྱིས་དུས་ཀྱི་འཚོ་བ་སྙིང་ནས་དྲན་བྱུང་།