ཨ་མ།
འཇིག་རྟེན་ཆུང་དྲགས་ནའང་།
ཁྱོད་རང་ཡོད་པས།
ང་ཡི་འཛུམ་མདངས་ལ་ཡལ་བ་མེད།
ཨ་མ།
ལས་ཀྱི་ལྷགས་རླུང་གིས་གཙེས་པའི་འཚོ་བར།
ཁྱོད་དབང་བས།
ངའི་མི་ཚེའི་སྙིང་པོ་འོ་ཇ་བཞིན་མངར།
ཨ་མ།
དུས་ཀྱི་དྲག་ཆར་རྒོད་རུང་།
བུ་ངའི་གསོལ་འདེབས་ཀྱི་ཀློང་ན།
ཁྱེད་རང་དྲོ་སྐྱིད་ཀྱིས་འཚོ་ཐུབ།
ཨ་མ།
འཚོ་བ་ཞེས་པའི་སྐྱིད་སྡུག་གི་སྒང་གཞོང་འདི་ནས།
སྐྱོ་གདུང་གི་མིག་ཆུ་ལན་དུར་བསྐྱིལ་རུང་།
ཁྱོད་ཡོད་པས།
ང་དངངས་དགོས་མ་བྱུང་།
ཨ་མ།
ནར་སོན་གྱི་ལོ་ཟླའི་འགྲུལ་བཞུད་རིང་མོར།
པྲ་ཚག་གི་བྱ་སྤྱོད་རེ་རེས།
སེམས་སྡུག་གི་རྨ་ཁ་རེ་རེ་བྱིན་ཡང་།
དྲོད་ཀྱིས་ཁེངས་པའི་གདམས་པ།
ནམ་ཡང་།
ང་རང་གཡང་ཁ་ལས་གཅུན་པའི་སྲབ་མདའ་ཡིན།
ཨ་མ།
དགའ་སྐྱོའི་གོ་རིམ་གྱི་ཁྲོད་ནས།
ཐུགས་ལ་རྟག་བརྟན་གྱི་བརྩེ་བ་མངའ་བ་ཁྱོད།
བརྟན་བརླིང་གི་ཉི་ཟླ་བཞིན།
བུ་ངའི་མགོ་ཐོག་ན་འཚེར།