དྲུག་པའི་ཚེས་པ་གསུམ་ལ།།

དྲི་ཞིམ་བོད་ཟས་ཁང་ནས།།

མཚར་སྡུག་ཉམས་ཀྱིས་ཕྱུག་པའི།།

ཁྱོད་རང་མིག་ལ་འཁོར་སོང་།།

འཛུམ་པའི་ཟུར་མིག་མདའ་མོ།།

ཅི་འདྲའི་རྣོ་ངར་ཆེ་བ།།

ཡ་ཆུང་སྙིང་གི་དཀྱིལ་འཁོར།།

ཕྱི་ནང་མེད་པར་གཙེས་སོང་།།

སྐུ་ལུས་ལྕུག་ཕྲན་སྨྱུག་མ།།

ཅི་འདྲའི་དྲང་ཞིང་མཉེན་པ།།

ཕར་བཞུད་ཚུར་བཞུད་ལམ་ནས།།

མིག་རྩ་ཡང་ཡང་སྒུལ་སོང་།།

བཞིན་རས་དུང་གི་མདོག་ལ།།

མཁུར་མཚོས་མེ་ཏོག་པད་མ།།

ཁྱོད་ཀྱི་མཛེས་དང་འཛུམ་གྱིས།།

ཡིད་ཀྱི་བརྟན་པ་ཕྲོགས་སོང་།།

མི་ཚོགས་འདུ་འཛི་ཆེ་ཡང་།།

ཁྲ་ཆུང་མིག་ལ་མཛེས་པ།།

ཡ་ཆུང་སྙིང་ལ་མཛའ་བ།།

ཁྱོད་རང་མ་གཏོགས་མི་འདུག།

དུས་ཀྱི་འཁྱུག་འགྲོས་བར་ནས།།

ཁྱོད་རང་གློ་བུར་བཞུད་སོང་།།

སེམས་ཀྱི་གཏིང་དང་མཐའ་རུ།།

ཞེན་ཆགས་མཚོ་མོ་བསྐྱིལ་སོང་།།

སེམས་སོང་བུ་མོ་ཁྱོད་ལ།།

མཚམས་འདྲི་ཞུ་འདོད་སྐྱེས་ཀྱང་།།

རྒྱུ་རྐྱེན་ག་གེ་མོ་ཡིས།།

འཁྲིས་སུ་བཅར་ནི་མ་ཕོད།།

རྨི་ལམ་མཛེས་པའི་གྲོང་ནས།།

ཁྱོད་རང་རྟག་ཏུ་མཐོང་ཡང་།།

མངོན་སུམ་སྣང་བའི་ཁམས་ནས།།

ཁྱོད་ཉིད་མཐོང་ཐབས་མི་འདུག།