ཤིན་ཧྭ་དྲ་བ་ལྷ་ས་ནས་ཟླ་1ཚེས་29ཉིན་གློག་འཕྲིན་འབྱོར་གསལ། འདི་ལོ་ལྷ་གཞིས（ལྷ་ས་ནས་གཞིས་རྩེ་བར）ལྕགས་ལམ་ཤར་གཏོང་ཐུབ་ནས་ལོ་བཅུ་འཁོར་ཞིང་། 2014ལོ་ནས་2024ལོའི་ཟླ་དང་པོའི་བར་གྱི་ལོ་བཅུ་ཡི་རིང་། ལྷ་གཞིས་ལྕགས་ལམ་གཞིས་རྩེ་འབབ་ཚུགས་ཀྱིས་ཁྱོན་འགྲུལ་པ་མི་ཐེངས་ཁྲི་1113.2ཙམ་སྐྱེལ་འདྲེན་བྱས་པ་རེད།

2024ལོར། ལྷ་གཞིས་ལྕགས་ལམ་གཞིས་རྩེ་འབབ་ཚུགས་སུ་དཔྱིད་གསར་སྐྱེལ་འདྲེན་བྱེད་ཐེངས་བཅུ་པ་འགོ་ཚུགས། ལྷ་གཞིས་ལྕགས་ལམ་གཞིས་རྩེ་འབབ་ཚུགས་ཀྱི་ཏང་ཀྲི་པུའི་ཧྲུའུ་ཅི་ཝང་ཆི་ཧྲན་གྱིས། ལྷ་ས་དང་གཞིས་རྩེར་འགྲོ་འོང་བྱེད་མཁན་འགྲུལ་པའི་རྒྱུན་གཏན་གྱི་ཕྱིར་སྐྱོད་ཀྱི་དགོས་མཁོ་སྐོང་ཆེད། གཞིས་རྩེ་འབབ་ཚུགས་ཀྱིས་སྔ་སྣུར་དུ་འབབ་ཚུགས་ཀྱི་སྒྲིག་ཆས་ལ་ཞིབ་བཤེར་བྱས་པ་དང་ཆབས་ཅིག སྟེགས་འཁོར་དང་སྨན་སྒམ་ཆུང་ངུ་སོགས་ཞབས་ཞུའི་སྒྲིག་ཆས་མཁོ་འདོན་བྱས་ནས་འགྲུལ་པ་ཚོར་ཞབས་འདེགས་ཡག་པོ་ཞུ་རྩིས་ཡོད། འདི་ལོའི་དཔྱིད་གསར་སྐྱེལ་འདྲེན་རིང་གཞིས་རྩེ་འབབ་ཚུགས་ཀྱིས་སྔོན་དཔག་བྱས་ན་འགྲུལ་པ་ཁྲི་6.3སྐྱེལ་འདྲེན་བྱ་རྒྱུ་ཡིན་ཞིང་ཉིན་རེར་ཆ་སྙོམས་མི་1575ཙམ་ཟིན་རྒྱུ་ཡིན་ཞེས་བཤད།

ངོ་སྤྲོད་བྱས་པར་གཞིགས་ན། ལྷ་གཞིས་ལྕགས་ལམ་ཤར་གཏོང་ཐུབ་པ་ནས་བཟུང་གཞིས་རྩེ་འབབ་ཚུགས་ཀྱིས་འགྲུལ་པ་སྐྱེལ་འདྲེན་བྱེད་ཚད་ལོ་ལྟར་འཕར་ནས་ལོར་འགྲུལ་པ་སྐྱེལ་འདྲེན་བྱེད་ཚད་དེ་2014ལོའི་མི་ཐེངས་ཁྲི་13.2ནས་2023ལོའི་མི་ཐེངས་ཁྲི་66.3བར་ལྡབ་6ཙམ་འཕར་ཡོད། “མེ་འཁོར་ལ་བསྡད་ན་སྟབས་བདེ་ཞིང་མགྱོགས་པས་ང་ཚོ་ཕྱི་ལ་འགྲོ་བར་ཕན་ཐོགས་ཆེན་པོ་འདུག”ཅེས་གཞིས་རྩེའི་གྲོང་མི་ཡེ་ཤེས་ཀྱིས་བཤད།

ཝང་ཆི་ཧྲན་གྱིས། ལྷ་གཞིས་ལྕགས་ལམ་གྱིས་ཡུལ་འདི་གའི་ཡུལ་མིར་སྟབས་བདེ་ལ་བདེ་འཇགས་ལྡན་པའི་འགྲིམ་འགྲུལ་མཁོ་འདོན་བྱས་པ་མ་ཟད། དཔལ་འབྱོར་འཕེལ་རྒྱས་དང་། ཡུལ་སྐོར་གསར་སྤེལ། མི་རིགས་མཐུན་སྒྲིལ། དབུལ་སྒྲོལ་ཕྱུག་འགྱུར་སོགས་ལའང་གསོན་ཤུགས་གསར་པ་སྦྱིན་ཡོད་ཅེས་བཤད། （སྐལ་མཆོག་གིས་བསྒྱུར། དམ་ཆོས་མི་ཕམ་གྱིས་ཞུས）