འདི་ག་ཚགས་པར་ཁང་དུ་ལྷ་ས་ནས་ཟླ་1ཚེས་28ཉིན་གནས་ཚུལ་འབྱོར་གསལ། ཉེ་ཆར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྕགས་རྭ་བློ་བཟང་བསྟན་འཛིན་གྱིས་བརྟག་ཞིབ་ཚོགས་ཆུང་གི་སྣེ་ཁྲིད་དེ་ལྷ་ས་གྲོང་ཁྱེར་གྱི་ལྕགས་རོང་ཕྱོགས་བསྡུས་ཞིང་ཞོར་ཉོ་ཚོང་ཁྲོམ་ར་དང་། ཧྲེང་མེ་ཅ་སྒོ་རྩིས་ཚོང་ཁང་། ནག་ཆུའི་དབྱར་རྩྭ་དགུན་འབུའི་མཉམ་གཉེར་ཚོང་ཁང་སོགས་སུ་བསྐྱོད་དེ་འབྲས་དང་གྲོ་ཞིབ་དང་སྣུམ་དང་། ཤ་དང་། འོ་མ། སྒོ་ང་། སྔོ་ཚལ་དང་ཤིང་འབྲས་སོགས་དམངས་འཚོའི་ཚོང་ཟོག་གལ་ཆེན་གྱི་ཁྲོམ་རའི་མཁོ་སྤྲོད་དང་སྤུས་ཚད་དང་རིན་གོང་ལ་མཁྱེན་རྟོགས་གནང་བ་མ་ཟད། ལྷ་ས་གྲོང་ཁྱེར་བཟའ་བཅའ་ཞིབ་དཔྱད་ཚད་ལེན་ལྟེ་གནས་ལྕགས་རོང་མྱུར་བཤེར་ས་ཚིགས་ཀྱི་འཁོར་སྐྱོད་གནས་ཚུལ་དང་དེ་བཞིན་དབྱར་རྩྭ་དགུན་འབུའི་ཁུངས་འདེད་སོགས་ཀྱི་འབྲེལ་ཡོད་གནས་ཚུལ་ལ་ཞིབ་བཤེར་ཡང་གནང་བ་རེད། ཁོང་གིས་ལས་དོན་མི་སྣ་དང་བྱམས་བརྩེའི་ངང་གླེང་མོལ་གནང་བ་དང་འབྲེལ་ཟོལ་མེད་ཀྱི་འཚམས་འདྲི་དང་ལོ་གསར་གྱི་སྨོན་འདུན་ཡང་ཞུས་པ་རེད།

བརྟག་ཞིབ་ཚོགས་ཆུང་གིས་བསྟན་དོན། ཐོག་མཐའ་བར་གསུམ་དུ་མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ཨང་དང་པོར་བཞག་ནས། ཕྱོགས་ཁག་གི་འགན་འཁྲི་ནན་དུ་གཏོང་བ་དང་། བཟའ་བཅའི་སྤུས་ཚད་ཀྱི་འགག་སྒོ་ཡག་པོ་སྲུང་བ། བཟའ་བཅའི་བདེ་འཇགས་ཁྱབ་ཁོངས་ཀྱི་ཁྲིམས་འགལ་སྒྲིག་འགལ་གྱི་བྱེད་སྤྱོད་ལ“ཐར་པར་གཏན་ནས་མི་གཏོང་བ”མཐའ་འཁྱོངས་བྱེད་པ། རྫུན་ལྷད་ཞན་གསུམ་གྱི་ཐོན་རྫས་བཟོས་པ་དང་སྤུས་འགྱུར་བཟའ་བཅའ་བཙོངས་པ་སོགས་ཀྱི་ཁྲིམས་འགལ་བྱེད་སྤྱོད་ལ་རྡུང་རྡེག་ནན་པོ་གཏོང་བ་བཅས་བྱས་ནས། བཟའ་བཅའི་བདེ་འཇགས་ཀྱི་མཐའ་ཚད་བརྟན་པོ་སྲུང་དགོས། གཉེར་སྐྱོང་བྱེད་པོར་ཡིད་རྟོན་ཁྲིམས་སྲུང་གི་གཉེར་སྐྱོང་བྱེད་པར་ཁྲིད་སྟོན་བྱས་ཏེ། རིགས་ཁག་གི་ཁྲོམ་རའི་དམངས་འཚོའི་ཚོང་ཟོག་གལ་ཆེན་མཁོ་སྤྲོད་འདང་ངེས་དང་། སྤུས་ཚད་ལ་འགན་ལེན། རིན་གོང་བརྟན་པོ་བཅས་ཡོང་བར་འགན་ལེན་ཏན་ཏིག་དང་། མི་དམངས་མང་ཚོགས་ཚོས་བློ་བདེའི་ངང་ཉོ་བ་དང་། བློ་བདེའི་ངང་ཟ་བ། བློ་བདེའི་ངང་སྤྱོད་པ་བཅས་ཡོང་བར་འགན་ལེན་ཏན་ཏིག་བྱེད་དགོས། ཁྲོམ་རའི་སྒྲིག་ལམ་མུ་མཐུད་བཅོས་སྒྲིག་དང་དྲོ་སྐྱིད་ཀྱི་ཞབས་ཞུ་འཚོལ་ཞིབ་བྱས་ཏེ། མི་དམངས་མང་ཚོགས་བློ་བདེ་དང་འཆམ་མཐུན་གྱི་དཔྱིད་གསར་དུས་ཆེན་དང་བོད་ཀྱི་ལོ་གསར་ཞིག་གཏོང་ཐུབ་པར་བྱེད་དགོས།