དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ལ་ཉེ་བའི་སྐབས་སུ། མངའ་རིས་ས་ཁུལ་སྒེར་རྩེ་རྫོང་སྨོན་གྲུབ་གྲོང་གསར་སྡེ་ཁུལ་གྱི་གང་སར་དུས་ཆེན་གྱི་རྣམ་པས་ཁེངས། ཐོག་སྟེང་དམར་ཞིང་གྱང་དཀར་བའི་སྡོད་ཁང་རེ་རེའི་ཐོག་ཁར་སྐར་ལྔའི་དར་དམར་རླུང་ཕྱོགས་དང་བསྟུན་ནས་ལྷབ་ལྷུབ་ཏུ་གཡོ་བ་དང་། ཁྱིམ་ཚང་ཚང་མས་ལུག་ཤ་དང་ཚགས་ཤ་དེ་བཞིན་དངོས་ཟོག་སྣ་ཚོགས་གྲབས་གསོག་ལས་ལ་བྲེལ་ནས་ཚང་མའི་ངོ་གདོང་ལས་དགའ་བའི་འཛུམ་མདངས་ངང་གིས་འཕྱུར་བཞིན་འདུག

སྡེ་ཁུལ་དེའི་མང་ཚོགས་ལ་བཀྲ་ཤིས་བྱ་བ་ཉིས་བརྩེགས་ཤིག་འཕྲད་པ་ནི། སྨོན་གྲུབ་གྲོང་གསར་མཉམ་ལས་ཁང་གི་བགོ་འགྲེམས་མཛད་སྒོའང་དུས་ཆེན་གོང་དུ་གཉེར་བཞིན་ཡོད་པ་དེ་རེད། མཛད་སྒོར་ཞུགས་མཁན་ཚང་མས་ལུས་ལ་གཟབ་མཆོར་སྤྲས་ནས་རང་རང་གི་ཐོབ་སྐལ་མི་དམན་པ་རག་སྟེ་སེམས་ཁོང་གི་དགའ་བ་གནོན་མི་ཐུབ་པར་གྱུར།

“2023ལོར་སྨོན་གྲུབ་གྲོང་གསར་སྡེ་ཁུལ་གྱི་ཐོན་ལས་རྣམ་གྲངས་ལ་དཔལ་འབྱོར་གྱི་ཡོང་འབབ་ཡག་པོ་རག་སྟེ་ད་རེས་སྡེ་ཁུལ་གྱི་མང་ཚོགས་ལ་བགོ་འགྲེམས་སྒོར་ཁྲི་20ཙམ་རྒྱག་རྒྱུ་བྱུང་སོང་། དེས་མཉམ་ལས་ཁང་གི་ཁོངས་མི་རྣམས་ལ་གྲོང་ཚོའི་མཉམ་སྡེབ་དཔལ་འབྱོར་རྒྱ་སྟོབས་ཆེ་རུ་སོང་བ་ལས་བྱུང་བའི་ཕན་པ་ཚོར་ཏེ་གྲོང་ཚོ་ཡོངས་ཀྱི་ཡུལ་མི་རྣམས་ཀྱིས་མཉམ་དུ་ཕྱུག་པོ་ཆགས་པར་བྱེད་པའི་འདུན་པ་སྔར་བས་ཆེ་རུ་སོང་ཡོད”ཅེས་སྨོན་གྲུབ་གྲོང་གསར་སྡེ་ཁུལ་གྱི་གྲོང་སྡོད་ལས་དོན་རུ་ཁག་གི་རུ་དཔོན་གཞོན་པ་ཧྥེང་ཡུན་གྱིས་གསར་འགོད་པར་བཤད་བྱུང་།

ཧྥེང་ཡུན་གྱིས་གནས་སྤོས་མང་ཚོགས་ཁོར་ཡུག་གསར་པར་སྔ་ཙམ་འཕྲོད་རྒྱུར་རོགས་རམ་བྱས་ནས་ཚང་མ་ངལ་རྩོལ་ཕྱུག་འགྱུར་ཡོང་བར་ལྕག་སྐུལ་གཏོང་ཆེད། སྨོན་གྲུབ་གྲོང་གསར་སྡེ་ཁུལ་གྱིས་ཡུལ་བབ་དང་བསྟུན་པ་དང་།

(པར་ངོས་བཞི་པར་གཟིགས)(པར་ངོས་དང་པོར་མཐུད)　དུད་ཚང་དང་བསྟུན་ནས་ཇུས་བཏོན་ཏེ་སྒེར་རྩེ་རྫོང་ཟོག་འགྲེམས་སྡེབ་སྐྱེལ་ལྟེ་གནས་དང་། སྨོན་གྲུབ་གྲོང་གསར་ཞིང་ཞོར་ཐོན་རྫས་ཁྲོམ་ར་སོགས་ཀྱི་རྣམ་གྲངས་དོན་འཁྱོལ་བྱས་པ་མ་ཟད། སྨོན་གྲུབ་གྲོང་གསར་ཁྱིམ་ལས་ཞབས་ཞུའི་ལྟེ་གནས་བཙུགས་པ་དང་། རླངས་འཁོར་འཁྲུ་ས་དང་། ཇ་ཁང་སོགས་ལེ་ལག་ཚང་བའི་སྒྲིག་བཀོད་འཛུགས་སྐྲུན་གྱིས་གནས་སྤོས་མང་ཚོགས་ལ“ལས་ཀ”ཡོད་པར་བྱས་པས། ཁོང་ཚོའི་དངུལ་ཁུག་ནང་གི་དངུལ་འབེལ་དུ་སོང་ཡོད། མིག་སྔའི་བར། ཡུལ་མི་ལས་ཞུགས་ཐུབ་ཚད་མི་གྲངས་50ལྷག་ཙམ་ཟིན་ཏེ་མི་རེར་ཆ་སྙོམས་ལོར་ཡོང་འབབ་སྒོར་ཁྲི་ལས་བརྒལ་ཡོད།

2016ལོར་རྡོ་ཆུང་གི་ཁྱིམ་བྲག་པོ་ཤང་བྲག་པོ་གྲོང་ཚོའི་ས་ཕག་ཁང་པ་ཞིག་ནས་རྫོང་གྲོང་གི་སྨོན་གྲུབ་གྲོང་གསར་གྱི་ཡངས་ཤིང་དཀར་ཆ་དོད་པའི་ཁང་བཟང་ནང་སྤོས་ཤིང་། སྔོན་མ་བཟའ་ཚང་གཉིས་པོ་འབྲོག་སར་རྩྭ་ཆུ་གང་བཟང་སར་སྐྱས་སྤོས་ཏེ་ཉིན་ལྟར་འབྲོག་ལས་ཁོ་ན་བྱས་ནས་འཚོ་བ་སྐྱེལ་བ་དང་། ལོར་ཁྱིམ་དུ་ཡོང་འབབ་སྒོར་2000ཡང་མ་ཟིན་པའི་ཁར་ཕྲུ་གུ་3གསོ་དགོས་པས་འཚོ་བ་ཧ་ཅང་དཀའ་ཚེགས་ཆེན་པོ་ཡོད།

སྨོན་གྲུབ་གྲོང་གསར་སྡེ་ཁུལ་དུ་སྤོས་པ་ནས་བཟུང་། རྡོ་ཆུང་ལ་རེ་བ་རྒྱག་ས་བྱུང་ཞིང་། གནས་སྤོ་བྱས་ནས་མི་རིང་བར་རྡོ་ཆུང་ལ་སྨོན་གྲུབ་གྲོང་གསར་སྡེ་ཁུལ་ཁྱིམ་ལས་ཞབས་ཞུའི་ཀུང་སི་ནས་ལས་ཀ་ཞིག་རག་པ་དང་། དུས་རྒྱུན་སྡུག་བསྲན་འཁྱོག་ལ་ལས་ཀ་འཇོན་པའི་དབང་གིས་རྡོ་ཆུང་སྡེ་ཁུལ་གྱི་མང་ཚོགས་ཀྱིས་འོས་སྦྱོར་བྱས་པ་བརྒྱུད་ཀུང་སི་དེའི་འགན་འཁུར་བར་གྱུར་ཞིང་། ངོ་སྤྲོད་བྱས་པ་ལྟར་ན། ཀུང་སི་བཙུགས་ཚུན་ཉིན་ལྟར་གྱི་མངགས་ཐོ་ཡང་སེ་འབྱོར་བ་དང་། ཀུང་སིའི་ཞབས་ཞུར་ས་གནས་མང་ཚོགས་ཀྱི་ཁས་ལེན་རྒྱ་ཁྱབ་ཏུ་ཐོབ་བཞིན་ཡོད།

2019ལོར་རྡོ་ཆུང་གིས་དངུལ་ཁང་ནས་དངུལ་བུན་སྒོར་ཁྲི་5གཡར་ནས་བཟའ་ཟླ་དང་མཉམ་དུ་རང་ཁྱིམ་གྱི་སྒོ་རའི་ནང་ཙག་ཙིག་ཚོང་ཁང་ཆུང་ངུ་ཞིག་བཙུགས་པར་ལོར་ཡོང་འབབ་སྒོར་ཁྲི་1ལྷག་ཡོང་བ་དང་། དལ་བའི་སྐབས་སུ་ཁོང་གིས་ད་དུང་ཕྱིར་གླ་པ་བརྒྱུགས་ནས་ཁྱིམ་ལ་ལག་དངུལ་གསོག་གི་ཡོད། ལོ་གཅིག་རིང་། གླ་ཆའི་ཡོང་སྒོ་དང་། སྲིད་ཇུས་རང་བཞིན་གྱི་ཁ་གསབ། ཐོན་ལས་ལས་བྱུང་བའི་བགོ་འགྲེམས་སོགས་བསྡོམས་ཚེ་རྡོ་ཆུང་གི་ཁྱིམ་ལ་ལོར་ཡོང་འབབ་སྒོར་ཁྲི་བཅུ་ལྷག་ཙམ་ཡོད།

རྡོ་ཆུང་གིས“འདི་ལོར་ཁྱིམ་མི་རྣམས་འཚོ་བ་དེ་བས་སྐྱིད་པ་ཞིག་ཡོང་ཆེད་ངས་ངེས་པར་དུ་འབད་བརྩོན་བྱེད་ཀྱི་ཡིན”ཞེས་འཛུམ་དམུལ་དམུལ་ངང་གསར་འགོད་པར་བཤད་བྱུང་། (པ་སངས་ཚེ་རིང་གིས་བསྒྱུར། ཚེ་དབང་ལྷ་མོ་དང་པ་ཚེས་ཞུས)