འདི་ག་ཚགས་པར་ཁང་དུ་སེང་གེ་ཁ་འབབ་ནས་གློག་འཕྲིན་འབྱོར་གསལ། ཉེ་ཆར། གསར་འགོད་པས་མངའ་རིས་ས་ཁུལ་དམངས་སྲིད་ཅུས་ནས་ཤེས་རྟོགས་བྱས་པར། དམངས་འཚོ་འགན་ལེན་གྱི་ལས་དོན་ཏན་ཏིག་བསྒྲུབས་ནས། དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བའི་དགོས་མཁོ་ནུས་ཤུགས་ཡོད་རྒུས་བསྐངས་ཏེ། དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བའི་གནས་ཚུལ་ལ་གནད་སྨིན་མཐིལ་རྟོགས་བྱ་ཆེད། མངའ་རིས་ས་ཁུལ་གྱིས་དམངས་འཚོའི་མ་དངུལ་སྒོར་ཁྲི་1834.6སྤྲད་ནས་དཀའ་ངལ་ཡོད་པའི་མང་ཚོགས་ཀྱི་གཞི་རྩའི་འཚོ་བ་འགན་ལེན་བྱས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་མ་དངུལ་དེ་དག་མངའ་རིས་ས་ཁུལ་གྱི་དཀའ་ངལ་ཡོད་པའི་དབང་པོ་སྐྱོན་ཅན་ལ་རོགས་སྐྱོབ་དང་ཁ་གསབ་དང་། རྒན་གསོའི་ཞབས་ཞུའི་མ་ལག་འཛུགས་སྐྱོང་། དཀའ་ངལ་ཡོད་པའི་བྱིས་པའི་གཞི་རྩའི་འཚོ་བའི་འགན་ལེན་སོགས་ཐད་སྤྱོད་རྒྱུ་ཡིན་པ་རེད། དེའི་ནང་ལོ་ཧྲིལ་པོར་དཀའ་ངལ་ཡོད་པའི་དབང་པོ་སྐྱོན་ཅན་ལ“རིགས་གཉིས”ཀྱི་ཁ་གསབ་དངུལ་སྒོར་ཁྲི་556.75དང་། “གཅིག་སྡུད་གཉིས”ཀྱི་སྒྲིག་གཞི་འཁོར་སྐྱོད་གྲོན་དངུལ་དང་དེ་བཞིན་མི་སྣའི་གླ་ཆར་སྒོར་ཁྲི་392.27 དཔལ་འབྱོར་ཐད་དཀའ་ངལ་ཡོད་པའི་རྒན་རྒོན་གྱི“ཁ་གསབ་ཁག་གཉིས”ཀྱི་སྒོར་ཁྲི་23.92 གཞིས་ལུས་བྱིས་པ་དང་དཀའ་ངལ་ཡོད་པའི་བྱིས་པར་གཅེས་སྐྱོང་དང་སྲུང་སྐྱོང་མ་དངུལ་སྒོར་ཁྲི་225.6བཅས་གྲངས་ཚང་སྤྲད་པ་དང་། དྭ་ཕྲུག་གི་གཞི་རྩའི་འཚོ་བ་འགན་སྲུང་ཐད་ཟླ་དང་པོ་ནས་དྲུག་པ་བར་མ་དངུལ་སྒོར་ཁྲི་118.72སྤྲད་པ། གྲོང་ཁྱེར་དང་གྲོང་གསེབ་ཀྱི་མ་མཐའི་འཚོ་བའི་འགན་ལེན་ལ་མ་དངུལ་སྒོར་ཁྲི་460.88དང་། གྲོང་ཁྱེར་དང་གྲོང་གསེབ་ཀྱི་དམིགས་བསལ་དཀའ་ངལ་ཡོད་པའི་བསྙེན་བཀུར་གྱི་གཞི་རྩའི་འཚོ་བའི་འགན་ལེན་ལ་ཟླ་དང་པོ་དང་གཉིས་པའི་བར་མ་དངུལ་སྒོར་ཁྲི་56.46སྤྲད་ཡོད། དེ་དང་དུས་མཚུངས། དགུན་ཁའི་གུང་གསེང་དང་ལོ་གསར་སོགས་ཀྱི་དུས་ཀྱི་མཚམས་ཚིགས་དང་ཟུང་འབྲེལ་བྱས་ནས“དགུན་དུས་དྲོ་སྐྱིད་སྦྱིན”དང“བྱིས་པར་གཅེས་སེམས་ཞབས་ཞུ”སོགས་ཀྱི་ཆེད་དོན་རོགས་སྐྱོབ་བྱེད་སྒོ་མུ་མཐུད་སྤེལ་རྒྱུ་རེད།

（པ་སངས་སྒྲོན་ལགས་ཀྱིས་བསྒྱུར། མཚམས་གཅོད་ཀྱིས་ཞུས）