འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། རྒྱལ་ཡོངས་དགུན་དུས་ལུས་རྩལ་འགྲན་ཚོགས་སྐབས་བཅུ་བཞི་པ་འགོ་ཚུགས་ཉེར་ཡོད་པའི་དུས་སུ། གསར་འགོད་པར་རང་སྐྱོང་ལྗོངས་ལུས་རྩལ་ཅུས་ནས་ཤེས་རྟོགས་བྱུང་བར། རང་ལྗོངས་ཀྱི་ལུས་རྩལ་པ་33གྲ་སྒྲིག་འགྲན་བསྡུར་ནང་ཞུགས་ཡོད་པ་དང་། ལུས་རྩལ་པ་25ལ་མཐའ་བསྡུར་ནང་ཞུགས་པའི་འོས་ཐོབ་རག་པ་དེའི་ནང་ལུས་རྩལ་པ་11ནི་རང་ལྗོངས་ཀྱིས་ཅི་ལིན་དང་། ཀུའེ་ཀྲོའུ། མཚོ་སྔོན། ཤིན་ཅང་བཅས་དང་མཉམ་དུ་གསོ་སྐྱོང་བྱས་པའི་ལུས་རྩལ་པ་རེད།

ངོ་སྤྲོད་བྱས་པར་གཞིགས་ན། རང་ལྗོངས་ཀྱི་ལུས་རྩལ་པ་གངས་ཤུད་རི་འཛེགས་དང་། ཡ་པང་གངས་ཤུད་ཀྱི་འགག་འདེད། རི་ཀླུང་གངས་ཤུད་བཅས་ཀྱི་རྣམ་གྲངས་གསུམ་ནང་ཞུགས་རྒྱུ་རེད། གངས་ཤུད་རི་འཛེགས་རྣམ་གྲངས་དེ་ཟླ་1ཚེས་30ཉིན་ནས་ཟླ་2ཚེས་1ཉིན་བར་ཧུའུ་ལུན་པེར་གྲོང་ཁྱེར་གྱི་ཀྲ་ལན་ཐུན་ཅིན་ལུང་ཧྲན་རི་བོའི་གངས་ཤུད་ར་བར་སྤེལ་རྒྱུ་དང་། རང་ལྗོངས་ཀྱི་ལུས་རྩལ་པ་17འགྲན་བསྡུར་ནང་ཞུགས་རྒྱུ་རེད།