ལོ་གསར་འཆར་ཉེའི་སྐབས་འདིར་ཕ་ཡུལ་དུ་ལོག་མཁན་ཇེ་མང་དུ་འགྲོ་བཞིན་ཡོད་མོད། འོན་ཀྱང་སི་ཁྲོན་མན་དབྱང་དུ་སྡོད་པའི་ཀྲུའུ་ཅའོ་ཡིས་བུ་མོ་གཉིས་འཁྲིད་ནས་རྡོག་ཁྲེས་ཆེ་ཆུང་ཁག་དྲུག་འཁྱེར་ཏེ་ཁྱིམ་ནས་བྲེལ་འཚུབ་ངང་ཐོན།

དེ་ཉིན་ནི་ལུགས་རྙིང་ལོའི་ཟླ་བཅུ་གཉིས་པའི་ཚེས་བཅུ་ཡིན་ཞིང་། ཁོང་ཚོ་འགྲོ་ཡུལ་ནི་ས་བབ་སྨི་4500ཟིན་པའི་གངས་ལྗོངས་ཀྱི་མཐའ་མཚམས་འགག་སྒོར་ཡིན་པ་དང་མཐའ་མཚམས་ཀྱི་འགག་སྒོ་སྲུང་མཁན་མི་དམངས་ཉེན་རྟོག་པ་ཀྲའོ་ཐན་ཧའོ་ཡིས་དེ་གར་ལོ་12རིང་ལས་ཀ་བྱེད་རིང་ནང་མི་དང་མཉམ་འཛོམས་མེད་པའི་དཔྱིད་གསར་དུས་ཆེན་ཐེངས་12བཏང་།

(པར་ངོས་གསུམ་པར་གཟིགས)(པར་ངོས་དང་པོར་མཐུད)

ཉིན་གསུམ་རིང་འགྲུལ་བཞུད་བྱེད་རིང་འགྲིམ་འགྲུལ་ཡོ་ཆས་རིགས་བཞིར་བསྡད་པ་དང་། ས་བབ་སྨི་5210ཟིན་པའི་རྒྱའུ་ལ་དང་ཇོ་མོ་གླང་མའི་གུག་ཆ་108བརྒལ་རྗེས་ཀྲུའུ་ཅའོ་དང་བུ་མོ་གཉིས་གཞིས་རྩེ་གྲོང་ཁྱེར་དིང་རི་རྫོང་བཀྲ་ཤིས་འཛོམས་ཤང་དུ་འབྱོར་ཞིང་། དེ་གར་ནི་གཞིས་རྩེའི་མཐའ་མཚམས་དོ་དམ་ཉིང་ལག་རུ་ཁག་བཀྲ་ཤིས་འཛོམས་མངགས་གཏོང་ཁང་གི་ཀྲའོ་ཐན་ཧའོ་ཡི་ལས་ཀ་བྱ་ཡུལ་རེད།

2018ལོའི་དཔྱིད་གསར་དུས་ཆེན་སྐབས་སུ་ཀྲུའུ་ཅའོ་གཞིས་རྩེ་གྲོང་ཁྱེར་ཁང་དམར་རྫོང་མཐའ་མཚམས་འགག་སྒོར་ཐེངས་དང་པོར་བཟའ་ཟླ་ཀྲའོ་ཐན་ཧའོ་དང་མཉམ་དུ་ལོ་གསར་གཏོང་བར་སླེབས་པ་དང་། ཁོང་གིས་བཟའ་ཟླ་དང་འདྲ་བའི་མཐའ་མཚམས་སྲུང་མཁན་དེ་བས་མང་བས་སྐད་གྲགས་མེད་པར་ལེགས་སྐྱེས་འབུལ་བ་མིག་མཐོང་ལག་ཟིན་ཐུབ་ཅིང་། དེ་གར་སྐོར་གཡེང་སོ་ལྟ་ཁང་ཡོད་པ་དང་། མཚན་གུང་དུ་ཛ་དྲག་ཆེ་བའི་རོགས་སྐྱོབ་བྱེད་དགོས་པ། ཡང་ཡང་ཐོན་པའི་རྩོད་གཞི་འདུམ་འགྲིག་བྱེད་དགོས་པ་ལ་སོགས་ཁྱིམ་ཆུང་བློས་བཏང་ནས་ཁྱིམ་ཆེན་སྐྱོང་བའི་བརྟན་སྲུང་བྱེད་སྟངས་དེ་ལས་མཐའ་མཚམས་བརྟན་ལྷིང་དང་། གནམ་འོག་བདེ་འཇགས། མི་དམངས་ལ་སྐྱིད་སྣང་བཅས་བྱུང་ཡོད།

2021ལོའི་ལོ་མཇུག་ཏུ་ཀྲའོ་ཐན་ཧའོ་གཞིས་རྩེའི་མཐའ་མཚམས་དོ་དམ་ཉིང་ལག་རུ་ཁག་བཀྲ་ཤིས་འཛོམས་མངགས་གཏོང་ཁང་གི་ཏང་ཀྲི་པུའི་ཧྲུའུ་ཅི་དང་སློབ་སྟོན་པར་བསྐོ་གཞག་བྱས་པ་དང་བཟའ་ཟླས་ཁོང་གི་ལས་ཀར་རྒྱབ་སྐྱོར་བྱ་ཆེད། 2022ལོའི་དཔྱིད་གསར་དུས་ཆེན་སྐབས་སླར་ཡང་བཟའ་ཟླའི་གམ་དུ་ཡོང་ནས་ཁོང་དང་མཉམ་དུ་ལོ་གསར་བཏང་།

2024ལོའི་དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ཉེའི་སྐབས་སུ་རྒྱ་ཆེའི་མང་ཚོགས་ཚོར་བརྟན་ལྷིང་དང་བཀྲ་ཤིས་པའི་དུས་ཆེན་ཞིག་གཏོང་རྒྱུ་ཡོང་བར་བྱ་ཆེད་ཀྲའོ་ཐན་ཧའོ་དང་ལས་རོགས་ཚོས་སླར་ཡང་ལས་གནས་བརྟན་སྲུང་བྱས།

ཀྲུའུ་ཅའོ་ནི་ཆའང་རིགས་ཡིན་པ་དང་ཀྲའོ་ཐན་ཧའོ་ནི་རྒྱ་རིགས་ཡིན་ཞིང་། བཟའ་ཟླ་གཉིས་ཀ་གུང་ཁྲན་ཏང་ཡོན་རེད། ཁོང་ཚོས་བྱ་སྤྱོད་དངོས་ལ་བརྟེན་ནས་མཐའ་མཚམས་འགག་སྒོའི་ངར་ལྕགས་ལྟ་བུའི་ལྕགས་རི་རིང་པོ་བརྟན་པོ་ཞིག་བསྐྲུན་ཡོད་ལ། གཅེས་སེམས་ལ་བརྟེན་ནས་ཀྲུང་ཧྭ་མི་རིགས་ཀྱི་གཅིག་མཐུན་ཚོགས་པའི་འདུ་ཤེས་བརྟན་པོ་བཙུགས་ཡོད།

2023ལོར་བཀྲ་ཤིས་འཛོམས་ཤང་གི་མང་ཚོགས་དར་རྒྱས་ལ་བསམ་ཡུལ་ལས་འདས་པའི་ལས་འཛོལ་ཐོན་ནས་གཤགས་བཅོས་ཀྱི་སྨན་རིན་མང་པོ་གཏོང་དགོས་པ་དང་དུས་མཚུངས་ད་དུང་ཕྲུ་གུ་གསུམ་གསོ་དགོས་ཀྱི་ཡོད་པ་རེད། ཁོང་གཉིས་ཀྱིས་གནས་ཚུལ་དེ་ཤེས་རྗེས་འཕྲལ་མ་ཉིད་དུ་དངུལ་སྨར་སྒོར་5000ཞལ་འདེབས་བརྒྱབ་ནས་དར་རྒྱས་ཀྱི་དཀའ་ངལ་སེལ་རོགས་བྱས། （སྒྱུར་ཞུས་པ་བསོད་བདེ་ཆེ་བ）