འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། 2023ལོར། རང་ལྗོངས་ཀྱི་རིམ་ཁག་མི་དམངས་དངུལ་ཁང་དང་ནོར་སྲིད་སྡེ་ཚན་གྱིས་མཐུན་སྦྱོར་གཞོགས་འདེགས་བྱས་ནས་ནོར་སྲིད་ཀྱི་གསོག་འབོར་མ་དངུལ་ཕན་སྒྱུར་གྱི་ལས་དོན་དོན་འཁྱོལ་ལ་ནུས་ཤུགས་ཡོད་རྒུས་དམ་འཛིན་བྱས་ནས་ལྗོངས་ཡོངས་སུ་ནོར་སྲིད་ཀྱི་གསོག་འབོར་མ་དངུལ་སྒོར་དུང་ཕྱུར་184.51མཛོད་འཇུག་བྱས་པའི་ནང་ནག་ཆུ་གྲོང་ཁྱེར་གྱིས་སྒོར་དུང་ཕྱུར་83.37མཛོད་འཇུག་བྱས་པ་དེ་དུས་མཚུངས་ལས་450.27%འཕར་ཏེ་ལྗོངས་ཡོངས་ཀྱི་ཨང་དང་པོ་སླེབས་ཡོད།

དེ་དང་ཆབས་ཅིག རང་ལྗོངས་ཀྱི་རིམ་ཁག་མི་དམངས་དངུལ་ཁང་ལ་ནོར་སྲིད་ཀྱི་གསོག་འབོར་མ་དངུལ་མཛོད་འཇུག་དཔང་འཛིན་འབྱོར་རྗེས་མགྱོགས་མྱུར་ཞིབ་བསྡུར་དང་འཕྲལ་མར་མཛོད་འཇུག་གི་བླང་བྱ་ལྟར་སླེབས་མ་ཐག་ཞིབ་བསྡུར་དང་སྒྲུབ་གཉེར་བྱས་ནས་ནོར་སྲིད་ཀྱི་གསོག་འབོར་མ་དངུལ་དུས་ཐོག་དང་ནུས་ཆེའི་ངང་མཛོད་འཇུག་ཐུབ་པ་བྱས་ཡོད།