དགུན་དུས་ཀྱི་འཕྱོངས་རྒྱས་ཀྱི་ལུང་ཤུར་དང་ཁང་པའི་ཕྱི་རོལ་དུ་རུས་ཟུག་རྒྱག་པའི་གྲང་རླུང་ལྡང་ནའང་ཁང་པའི་ནང་དུ་འཁྲུག་ཆ་དོད་ཅིང་དགོད་སྒྲ་མཚམས་མི་ཆད་པར་གྲགས། ཉེ་བར་བཅར་ན། གསར་འགོད་པའི་ཐོས་འཛིན་གྱི་བུ་གར་ས་གཞི་ཆེན་པོ་བོད་རུམ་བཟོ་གྲྭ་ནས་གྲགས་པའི་སྙན་དབྱངས་ལྷང་ལྷང་དུ་ཐོས་བྱུང་།
ཡངས་ཤིང་དཀར་ཆ་དོད་པའི་བཟོ་གྲྭར་བུད་མེད་ཚོས་འཐག་ཁྲིའི་མདུན་དུ་དཀྱིལ་ཀྲུང་བཅས་ནས་ལ་ལས་གླུ་ལེན་པ་དང་ལ་ལས་གད་མོ་འཚེར་འཚེར་ངང་བལ་ལས་ལ་བྲེལ་བཞིན་མཆིས། ཚོན་མདོག་སྣ་ལྔའི་བལ་སྐུད་གྲུ་གུ་མགོ་ཐོད་དུ་དཔྱངས་པ་དང་། ཁོང་ཚོས་སྐུད་སྣེ་བཟུང་སྟེ་ཕྲུ་བཙུགས་པ་ལས་འཇའ་རིས་སྣ་ཚོགས་གྲུབ།
ལས་མི་བྱམས་པ་སྒྲོལ་མས་བལ་ལས་ལ་བྲེལ་བཞིན་དུ་གསར་འགོད་པར། ང་བཟོ་གྲྭར་ཞུགས་ནས་ལོ་གསུམ་ཙམ་སོང་། སོ་སོའི་ལག་ཤེས་ལ་བརྟེན་ནས་ཁྱིམ་གྱི་སྒོ་རྩར་ལས་ཞུགས་ཐུབ་པས། སོ་ནམ་ཁོ་ནར་བརྟེན་མི་དགོས་པར་ཐོན་ལས་ཀྱི་བཟོ་པ་ངོ་མར་གྱུར་སོང་ཞེས་བརྗོད།
འཕྱོངས་རྒྱས་རྫོང་ལ་ལོ་རྒྱུས་ཡུན་རིང་ལྡན་ཞིང་མངོན་མིན་རིག་གནས་ཤུལ་བཞག་གི་ཐོན་ཁུངས་ཕུན་སུམ་ཚོགས་པོ་ཡོད། སྲོལ་རྒྱུན་གྱི་ལག་ཤེས་དང་གྲོང་གསེབ་དར་རྒྱས་ཟུང་འབྲེལ་བྱེད་ཆེད། འཕྱོངས་རྒྱས་རྫོང་མི་དམངས་སྲིད་གཞུང་དང་ཧུའུ་པེ་ཤང་དབྱང་བོད་སྐྱོར་ལས་དོན་རུ་ཁག་གིས་ཚོང་འགུགས་མ་འདྲེན་ཧུར་ཐག་བྱས་ནས། བོད་ལྗོངས་ས་གཞི་ཆེན་པོ་ཁེ་ལས་ཚད་ཡོད་འགན་འཁྲི་ཀུང་སི་ནང་འདྲེན་གྱིས་བཙུགས་ཏེ། ལག་ཤེས་ཁོ་ནར་བརྟེན་པའི་བོད་རུམ་སྤུས་དག་ཆེད་དུ་ཐོན་སྐྱེད་བྱེད་ཀྱི་ཡོད་པས། དེས་སྲོལ་རྒྱུན་གྱི་ལག་ཤེས་རྒྱུན་འཛིན་ཐུབ་པར་མ་ཟད། མང་ཚོགས་ཀྱི་ལས་ཞུགས་འབབ་འཕར་ལ་སྐུལ་འདེད་གཏོང་བའི་ཐབས་ལམ་གསར་པ་ཞིག་ཏུའང་གྱུར་ཡོད།
“ཀུང་སི་+མཉམ་ལས་ཁང་+ཞིང་དུད”ཀྱི་བྱེད་ཐབས་ལ་བརྟེན་ནས་ས་གཞི་ཆེན་པོ་བོད་རུམ་བཟོ་གྲྭས་ཡུལ་དེ་གའི་མང་ཚོགས་ལ་ལས་གནས་40མཁོ་འདོན་བྱས་ཏེ། མང་ཚོགས་ཚོས་སོ་སོའི་ལག་གཉིས་ལ་བརྟེན་ནས་གྲོང་གསེབ་དར་རྒྱས་དང་རང་ངོས་འཕེལ་རྒྱས་གཏོང་བའི་བདེ་སྐྱིད་ལྡན་པའི་ལམ་བུ་གཏོད་པར་སྐུལ་ཁྲིད་ཐུབ་ཡོད།
བཟོ་གྲྭར་འཁེལ་འཐག་ལས་མི་30ལྷག་ཙམ་ཡོད་པ་དེ་དག་གིས་དང་ཐོག་བོད་རུམ་འཐག་སྟངས་ཤེས་ཀྱི་མེད། རྩལ་ནུས་གསོ་སྦྱོང་དང་དགེ་རྒན་གྱི་དམར་ཁྲིད་བྱས་པ་བརྒྱུད། ད་ཆ་འཁེལ་འཐག་གི་ལས་ཀ་ཚང་མར་ནང་བྱན་ཆུད་དེ་རིམ་བཞིན་ལག་ཤེས་ཆེ་མོ་བར་གྱུར་དང་འགྱུར་བཞིན་ཡོད་པ་དང་། ལས་ཀ་དང་ཁྱིམ་ཚང་གཉིས་ཀར་འཐུས་ཤོར་འགྲོ་ཡི་མེད། ཁོང་ཚོས་བཏགས་པའི་བོད་རུམ་ལྗོངས་ཡོངས་དང་རྒྱལ་ཡོངས་སུ་འཚོང་གི་ཡོད་ལ། ཐག་རིང་ཡོ་རོབ་དང་རྒྱ་མཚོ་ཆེན་པོའི་གླིང་ཆེན་སོགས་ཕྱི་རྒྱལ་གྱི་ཁྲོམ་རར་ཡང་འཚོང་བཞིན་ཡོད། 2022ལོར། བཟོ་གྲྭ་དེ་ནས་རི་པིན་གྱི་ཁྲོམ་ར་ཁོ་ནར་བཏང་བའི་ཕྱིར་གཏོང་དངུལ་འབོར་སྒོར་ཁྲི་200ཟིན་པ་དང་ལོ་འཁོར་མོའི་ཐོན་རྫས་རིན་ཐང་སྒོར་ཁྲི་600ལྷག་ཙམ་ཟིན་ནས་ལས་མི་མི་རེར་ཆ་སྙོམས་འབབ་འཕར་སྒོར་ཁྲི་3.5བྱུང་བ་རེད།
མི་ཧྲེང་ཨ་ཅག་ཁྲ་གོག་ནི་དེ་སྔ་ཡིག་ཚགས་དང་གཱ་བཟོས་པའི་དུད་ཚང་དབུལ་པོའི་ཡུལ་མི་ཞིག་ཡིན་པ་དང་། ཤང་སྲིད་གཞུང་དང་གྲོང་ཚོ་ཨུ་ལྷན་གྱི་རོགས་རམ་ལས་ཁོ་མོ་བོད་རུམ་བཟོ་གྲྭར་ལས་ཞུགས་ཐུབ་ཡོད། དེ་གར་ཁོ་མོས་འཁེལ་འཐག་གི་ལག་རྩལ་ཤེས་པའི་ཁར་གླ་ཆ་ཡང་མི་ཉུང་བ་ཞིག་ལེན་རྒྱུ་ཡོད་པ་དང་། ད་དུང་ཕན་ཚུན་རོགས་རམ་དང་ཅི་འཕྲོས་མོལ་འཕྲོས་ཤོད་སའི་གྲོགས་མོ་དང་ལས་རོགས་མང་པོ་ངོ་ཤེས་པས། ཁོ་མོ་དེ་སྔོན་དང་མི་འདྲ་བར་བློ་བདེ་བག་ཡངས་དང་འཚོ་བ་ཇེ་སྐྱིད་དུ་ཕྱིན་ཡོད།
ཁྲ་གོག་གིས། ང་རང་ལོ་ན་རྒས་པས་གླ་པ་རྒྱུག་པར་འགྲོ་ཐུབ་ཀྱི་མི་འདུག འདི་གར་འཁེལ་འཐག་གི་ལག་རྩལ་ལ་བརྟེན་ནས་རང་ཁ་རང་གསོ་ཐུབ་པར་མ་ཟད། ད་དུང་ཅི་འཕྲོས་མོལ་འཕྲོས་ཀྱང་ཤོད་རོགས་ཡོད་པས་ཉིན་ལྟར་དོན་སྙིང་ལྡན་པ་ཞིག་འདུག་ལ། སེམས་ཡང་ལྷོད་པོ་འདུག་ཅེས་བརྗོད།
སླད་ཕྱིན་ལས་ལ་བྱང་བའི་འཁེལ་འཐག་རུ་ཁག་གི་རུ་མི་ཚོས་མུ་མཐུད་དེ་ལག་ཤེས་ལ་བརྟེན་ནས་གྲོང་གསེབ་དར་རྒྱས་ལ་སྐུལ་འདེད་དང་ལག་རྩལ་རྒྱུན་འཛིན་བྱས་ཏེ། སྤུས་ལེགས་ཀྱི་བོད་རུམ་ཐོན་རྫས་ས་ཆ་དེ་བས་མང་བ་ས་ཐག་དེ་བས་རིང་སར་འཚོང་ཐུབ་པ་བྱེད་རྒྱུ་རེད།