འདི་ག་ཚགས་པར་ཁང་དུ་སེང་གེ་ཁ་འབབ་ནས་ཟླ་1ཚེས་23ཉིན་གློག་འཕྲིན་འབྱོར་གསལ། ཁེ་ལས་དང་མང་ཚོགས་ཀྱིས་ལས་དོན་སྒྲུབ་པར་སྟབས་བདེ་སྐྲུན་ཆེད། རྫོང་ཨུད་དང་། རྫོང་སྲིད་གཞུང་། ཀྲུང་གོ་ལན་ཐུང་བོད་སྐྱོར་ལས་དོན་རུ་ཁག་བཅས་ཀྱི་རྒྱབ་སྐྱོར་ཤུགས་ཆེན་འོག ཉེ་དུས་མངའ་རིས་ས་ཁུལ་དགེ་རྒྱས་རྫོང་གི་རིག་ནུས་ཞིབ་མཆན་གཞི་གཅིག་ཅན་གྱི་འཕྲུལ་ཆས་3རྫོང་སྲིད་དོན་ཞབས་ཞུ་ཚོམས་ཆེན་དང་། ཚྭ་མཚེའུ་ཤང་སྲིད་དོན་ཞབས་ཞུ་ཚོམས་ཆེན། གཞུང་པ་ཤང་སྲིད་དོན་ཞབས་ཞུ་ཚོམས་ཆེན་བཅས་ལ་དངོས་སུ་སྤྱོད་འགོ་ཚུགས་པ་རེད།

ཤེས་རྟོགས་བྱུང་བར་གཞིགས་ན། རིག་ནུས་ཞིབ་མཆན་གཞི་གཅིག་ཅན་གྱི་འཕྲུལ་ཆས་དེ་སྤྱོད་སྐབས། ལག་ཁྱེར་གཉེར་མཁན་གྱིས་ཐོབ་ཐང་ལག་ཁྱེར་བསྟན་ནས་ངོ་གདོང་དབྱེ་འབྱེད་དང་། དངོས་མིང་ར་སྤྲོད། གློག་རྡུལ་མིང་འགོད་སོགས་ཀྱི་ལྷུ་ཚིགས་བརྒྱུད་ན་ཚོང་དོན་ཐོ་འགོད་ཀྱི“དཔྱད་གཞི་མི་དགོས་པ་དང་། རིག་ནུས་ཞིབ་མཆན་འཕྲལ་འགོད། དུས་ཐོག་ཏུ་ལག་ཁྱེར་སྤྲོད་པ”བཅས་ཀྱི་ཕན་འབྲས་ཆེ་བའི་དམངས་ཕན་ཞབས་ཞུ་ལོངས་སུ་སྤྱོད་རྒྱུ་ཡོད། དེ་ལས་ཁེར་རྐྱང་བཟོ་ཚོང་དུད་ཚང་གི་ལག་ཁྱེར་གཉེར་བའི་ཐད་ལས་འབོར་ཆེ་བ་དང་། དུས་ཡུན་རིང་བ། ལམ་ཐག་རིང་བ་སོགས་ཀྱི་གནད་དོན་ཐག་གཅོད་ཐུབ་པ་དང་། གློག་རྡུལ་ཅན་གྱི་ལས་སྒོ་སྒྲུབ་གཉེར་གྱིས་མང་ཚོགས་ལ་ཞབས་འདེགས་ཞུ་བའི“མཐའ་མའི་འགག་གནད”བསལ་བ། དགེ་རྒྱས་རྫོང་གི་སྲིད་དོན་ཞབས་ཞུའི་ཆུ་ཚད་མཐོ་རུ་ཕྱིན་ཡོད། རྣམ་གྲངས་ལས་དོན་དེ་མིག་སྔར་མངའ་རིས་ས་ཁུལ་གྱི་མདུན་གྲལ་དུ་སླེབས་ཡོད་པ་རེད།

གོམ་སྟབས་རྗེས་མར་དགེ་རྒྱས་རྫོང་ཁྲོམ་ར་ལྟ་འདོམས་ཅུས་ཀྱིས་རིག་ནུས་ཞིབ་མཆན་བཀོལ་སྤྱོད་ཁྱབ་ཁོངས་རྒྱ་སྐྱེད་བཏང་ནས“སྟབས་བདེ་ཤོས་དང་། མགྱོགས་ཤོས། ལེགས་ཤོས”བཅས་ཀྱི་སྲིད་དོན་ཞབས་ཞུའི་ཁོར་ཡུག་ཧུར་ཐག་གཏོད་རྒྱུ་ཡིན་པ་རེད།