ཉིན་ཤས་གོང་། རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གཞུང་དོན་ཐིང་དང་། རྒྱལ་ཡོངས་རྒྱལ་གཅེས་འཕྲོད་བསྟེན་ལས་འགུལ་ཨུ་ལྷན་གཞུང་དོན་ཁང་། དམངས་སྲིད་པུའུ་གཞུང་དོན་ཐིང་སོགས་སྡེ་ཚན་8ཀྱིས་མཉམ་འབྲེལ་ཐོག《ཕྱོགས་ཡོངས་ནས་བདེ་ཐང་ཁྱིམ་ཚང་འཛུགས་སྐྱོང་བྱེད་པའི་སྐོར་གྱི་བརྡ་ཐོ》བཀྲམ་པ།

བདེ་ཐང་ཁྱིམ་ཚང་འཛུགས་སྐྱོང་གི་གཞི་རྩའི་ཆ་རྐྱེན།

ཁྱིམ་ཚང་གི་ཁོངས་མི་གཙོ་བོ་གྲོང་ཚོ（སྡེ་ཁུལ）དེ་གར་བསྡད་དེ་ལོ་1ཕྱིན་པ།

ཁྱིམ་ཚང་གི་ཁོངས་མིས་ས་གནས་དེ་གའི་གྲོང་ཚོའི（སྡེ་ཁུལ）འཕྲོད་བསྟེན་ཞབས་ཞུའི་སྒྲིག་གཞི་དང་འགན་འཁུར་སྨན་པའི་གན་འཇོག་ལམ་ལུགས་ལག་ལེན་བསྟར་ནས། ཁྱིམ་ཚང་གི་གན་འཇོག་སྨན་པའི་ནད་བརྟག་སྨན་བཅོས་དང་ཁྱིམ་ཚང་གི་བདེ་ཐང་མཛུབ་ཁྲིད་པའི་བདེ་ཐང་འཚོ་བ་སྐྱེལ་སྟངས་ཀྱི་མཛུབ་ཁྲིད་སོགས་དང་ལེན་བྱེད་པ།

ཁྱིམ་ཚང་གི་ཁོངས་མིའི་བདེ་ཐང་གནས་ཚུལ་ཡག་པོ་ཡོད་པ།

བརྡ་ཐོའི་ནང་། ཁྱིམ་ཚང་གི་བདེ་ཐང་བྱང་ཚད་མཐོ་རུ་གཏོང་བ་དང་། བདེ་ཐང་ཁྱིམ་ཚང་གི་ཁོར་ཡུག་གཏོད་པ། ཁྱིམ་ཚང་གི་རིག་གནས་བཟང་པོ་སྐྱེད་སྲིང་བྱེད་པ། བདེ་ཐང་ཁྱིམ་ཚང་གི་ལས་དོན་ལམ་སྲོལ་འཐུས་སྒོ་ཚང་དུ་གཏོང་བ་བཅས་ཕྱོགས་4ཐད་བདེ་ཐང་ཁྱིམ་ཚང་སྐོར་གྱི་ཤེས་བྱ་ཁྱབ་གདལ་གཏོང་བ་དང་ཡ་རབས་དང་། བདེ་ཐང་། གནོད་མེད། ཁོར་ཡུག་སྲུང་སྐྱོང་བཅས་ཀྱི་འཚོ་བ་སྐྱེལ་སྟངས་དར་སྤེལ་གཏོང་བ། གཙོ་གནད་མི་ཚོགས་ཀྱི་བདེ་ཐང་འགན་སྲུང་འཐུས་སྒོ་ཚང་དུ་གཏོང་བ་སོགས་ཚུད་པའི་གཙོ་གནད་ལས་འགན་ཁག་11བཀོད་སྒྲིག་བྱས་ཡོད་པ་རེད།

བརྡ་ཐོ་ལྟར་ན། 2025ལོར་སླེབས་སྐབས། རྒྱལ་ཡོངས་ཀྱི་གྲོང་མིའི་བདེ་ཐང་བྱང་ཚད་25％ལས་མི་དམའ་བ།

2030ལོར་སླེབས་སྐབས། རྒྱལ་ཡོངས་ཀྱི་གྲོང་མིའི་བདེ་ཐང་བྱང་ཚད་30％ལས་མི་དམའ་བ།

དེ་དང་ཆབས་ཅིག གྲོང་ཚོ（སྡེ་ཁུལ）རེར་ཁྱིམ་ཚང་གི་བདེ་ཐང་མཛུབ་ཁྲིད་པ་གཅིག་ནས་གཉིས་བར་བཀོད་སྒྲིག་བྱ་རྒྱུ།

2025ལོའི་ལོ་མཇུག་བར་གྲོང་ཚོ（སྡེ་ཁུལ）95％ཡན་ལ་ཁྱབ་ནས་ཧ་ལམ་གྲོང་ཚོ（སྡེ་ཁུལ）ཡོངས་ལ་ཁྱབ་ཐུབ་པར་བྱ་རྒྱུ།

2030ལོའི་ལོ་མཇུག་ཏུ་གྲོང་ཚོ（སྡེ་ཁུལ）100％ལ་ཁྱབ་པར་བྱ་རྒྱུ་ཡིན་པ།