འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉིན་ཤས་གོང་། 2023ལོའི་ལོ་འཁོར་གྱི་རྒྱལ་ཁབ་ཀྱི་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་སྐོར་ལ་དཔྱད་ཞིབ་དཔྱད་དཔོག་བྱེད་པའི་ཞིང་ཆེན་རིམ་པའི་འབྲེལ་མཐུད་ཚོགས་འདུ་ལྷ་སར་འཚོགས་པ་རེད།

རྒྱལ་ཁབ་དཔྱད་ཞིབ་དཔྱད་དཔོག་ཕྱོགས་བསྡུས་ཞིབ་དཔྱད་ཚོགས་ཆུང་གི་ཙུའུ་ཀྲང་དང་རྒྱལ་ཁབ་སྨན་བཅོས་འགན་སྲུང་ཅུས་ཀྱི་ཅུས་ཀྲང་གཞོན་པ་ལི་ཐའོ་ཚོགས་འདུར་ཞུགས་ནས་གསུང་བཤད་གནང་བ་དང་། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་སྲིད་ཁྲིམས་ཨུ་ལྷན་གྱི་ཧྲུའུ་ཅི་ལིའུ་ཅང་གིས་ཚོགས་འདུ་གཙོ་སྐྱོང་གནང་ནས་གསུང་བཤད་ཀྱང་གནང་བ་རེད། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲུང་ཆེ་ཟླ་བ་ཚེ་རིང་ཚོགས་འདུར་ཞུགས་པ་རེད།

(པར་ངོས་གཉིས་པར་གཟིགས)(པར་ངོས་དང་པོར་མཐུད) རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ཚེ་རིང་ཕུན་ཚོགས་ཀྱིས་རང་ལྗོངས་ཀྱི་ལས་ཀའི་གནས་ཚུལ་སྙན་སེང་ཞུས་པ་རེད།

ལི་ཐའོ་ཡིས། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་རྒྱ་སྐྱེད་དང་གྲོང་གསེབ་དར་རྒྱས་འབྲེལ་མཐུད་ནུས་ལྡན་ལ་དཔྱད་ཞིབ་དཔྱད་དཔོག་བྱེད་པ་ནི་བར་བརྒལ་དུས་སྐབས་ཀྱི་ལམ་ལུགས་བཀོད་སྒྲིག་གལ་ཆེན་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དེའི་ཐད་ཚད་མཐོའི་མཐོང་ཆེན་གནང་སྟེ་གསུང་བཤད་གལ་ཆེན་དང་མཛུབ་སྟོན་གལ་ཆེན་ཐེངས་མང་གནང་ནས། དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་རྒྱ་སྐྱེད་གཏོང་བ་དང་དཔྱད་ཞིབ་དཔྱད་དཔོག་ལས་དོན་ཡག་པོ་བསྒྲུབ་པར་ཁ་ཕྱོགས་གསལ་སྟོན་གནང་བ་མ་ཟད། རྩ་བའི་གཞི་འཛིན་སའང་མཁོ་འདོན་གནང་ཡོད། ཕྱོགས་བསྡུས་ཞིབ་དཔྱད་ཚོགས་ཆུང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ནས་དཔྱད་ཞིབ་དཔྱད་དཔོག་གི་ཇུས་གཞིའི་བླང་བྱ་དང་ནན་པོ་བསྡུར་བ་དང་། དམ་པ་དོན་གཉེར་གྱིས་ཞིབ་བསྡུར་ལས་དོན་ཡག་པོ་སྒྲུབ་པ། སྒྲིག་ཁྲིམས་ཁག་ལ་བརྩི་སྲུང་ནན་པོ་ཞུ་བ། བོད་རང་སྐྱོང་ལྗོངས་ཀྱི་འབྲེལ་ཡོད་སྡེ་ཚན་དང་མཉམ་དུ་དཔྱད་ཞིབ་དཔྱད་དཔོག་གི་ལས་འགན་ཁག་ལེགས་སྒྲུབ་ཡག་པོ་བཅས་བྱས་ནས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་ལ་བློ་ཡིད་ཚིམ་པའི་རྒྱུགས་ལན་ཧུར་ཐག་འབུལ་དགོས་ཞེས་གསུངས་པ་རེད།

ལིའུ་ཅང་གིས་དང་ཐོག་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཚབ་ཞུས་ནས་ཞིབ་དཔྱད་ཚོགས་ཆུང་དང་བཅས་པར་དགའ་བསུ་དང་ཐུགས་རྗེ་ཆེ་ཞུས་ཤིང་། ཁོང་གིས། དཔྱད་ཞིབ་དཔྱད་དཔོག་གི་ལས་དོན་ཁག་ཏན་ཏིག་སྒྲུབ་དགོས་པ་དང་། ནུས་ཤུགས་ཡོད་རྒུས་རྒྱབ་སྐྱོར་དང་གཞོགས་འདེགས་བྱས་ནས་ཞིབ་དཔྱད་ཚོགས་ཆུང་གི་ལས་ཀའི་བཀོད་སྒྲིག་ལ་བརྩི་སྲུང་མཐའ་གཅིག་ཏུ་ཞུས་ཏེ་ཞབས་ཞུར་འགན་ལེན་གྱི་ལས་དོན་ཡག་པོ་སྒྲུབ་དགོས་པ། དག་ཐེར་དོན་འཁྱོལ་ལ་ཕྱོགས་ཡོངས་ནས་དམ་འཛིན་ཡག་པོ་བྱས་ཏེ་གནད་དོན་ཕྱོགས་སྟོན་དུ་འཛིན་རྒྱུ་མཐའ་འཁྱོངས་དང་། རང་འགུལ་ངང་རྗེས་མཐུད་ཚུར་ལན་གྱི་གནད་དོན་ལ་ངོས་འཛིན་རྩིས་ལེན་དང་དོན་ཚན་རེ་རེ་བཞིན་གསེད་བཀྲོལ། དག་ཐེར་གྱི་ཇུས་གཞི་ཆེད་མངགས་བཟོ་བ། རྩིས་ཁྲའི་རྣམ་པའི་དོ་དམ་བཅས་བྱས་ནས་དག་ཐེར་གནད་ལ་འཁེལ་བར་འགན་ལེན་བྱེད་དགོས་པ་བཅས་ཀྱི་བླང་བྱ་བཏོན་གནང་བ་རེད།

（པ་ཚེ་དང་དཀོན་སྒྲོལ་གྱིས་སྒྱུར་ཞུས་བྱས）