གཅིག

དགུན་གྱི་ཁ་བ་ཐོག་མ་དེ་འབབ་བྱུང་། ཁ་བ་བབས་པའི་ཉིན་དེར་ནམ་རྒྱུན་མཐའ་འཁོར་དུ་གཅེར་བུར་ལུས་འདྲའི་ས་འཛིན་རྣམས་དང་ཁོ་ར་ཁོར་ཡུག་ཡོད་དོ་ཅོག་ཁ་བའི་རྒྱན་གྱིས་བཀླུབས་ཏེ། ཐམས་ཅད་དངུལ་དཀར་གྱི་འཇིག་རྟེན་ཞིག་ཏུ་བསྐྲུན་འདུག་ཅིང་། དེས་མ་ཚད། ཞག་མ་གཅིག་གི་ཁ་བ་འབབ་ཐེངས་གཅིག་ལ་འཇིག་རྟེན་འདི་ཉིད་སླར་ཡང་གཉིད་ལས་སད་པ་ཇི་བཞིན་འདྲེན་བྱེད་ཟུང་གྲུང་པོར་ཕྱེ་སྟེ། གསོན་ཤུགས་དང་སྐྱེ་སྟོབས་ཀྱིས་ཡོངས་སུ་ཕྱུག་པའི་ཉམས་སྣང་ཞིག་ངང་གིས་སྟེར།

གཉིས།

ཁ་བ་ནི་བཀྲ་ཤིས་རྟེན་འབྲེལ་གྱི་མཚོན་རྟགས་ཤིག་ཡིན་སྟབས། ང་ཚོ་ཚང་མས་དམར་ཆུང་སེམས་ཁོང་ནས་ཡུན་རིང་རེ་ཞིང་བསྒུགས། ཞག་གཅིག་གི་ཁ་བའི་བབས་ཤུལ་ལས་ང་དང་ང་འདྲ་བའི་སྐྱེ་བོའི་ཚོགས་རྣམས་ལ་སྨྲ་བརྗོད་ལས་འདས་པའི་དགའ་བ་དང་ཡིད་ཚིམ་གྱི་སྤྲོ་སྣང་ཞིག་དབང་མེད་དུ་བྱིན་ཏེ། དུས་ཡུན་རིང་པོའི་རེ་སྒུག་དེ། ད་ཆ་མངོན་དུ་འགྱུར་དུས་ལུས་སེམས་གཉིས་ཀར་བདེ་བའི་འོད་སྣང་ཁྱབ་ནས་བསམ་པའི་ལོངས་སྤྱོད་རྫོགས།

གསུམ།

ཁ་བ་ནི་ཟུར་དྲུག་འདབ་མ་སྟེ། དེས་རང་བྱུང་ཁམས་ལ་སྦྱིན་པའི་ཕན་ཡོན་ནི་བསམ་གྱིས་མི་ཁྱབ་པ་ཞིག་ཡིན་ཏེ། རིམས་ནད་དང་དྲི་ངན་སོགས་ཀྱིས་སྦགས་པའི་མཁའ་རླུང་བཙོག་པ་མྱུར་བར་བཅོམ་སྟེ། མིའི་རིགས་ལ་མཁོ་བའི་གསོ་རླུང་མཁོ་འདོན་བྱེད་པ་སོགས་མདོར་ན་ཁ་བས་རང་ཉིད་ཀྱི་ཡོད་ཚད་སེར་སྣ་སྤུ་ཙམ་ཡང་མེད་པར་འགྲོ་བ་རིགས་དྲུག་གི་དམར་ཆུང་ཚེ་སྲོག་ལ་ཚེ་གང་ཞབས་འདེགས་ཞུ་བཞིན་མཆིས། ཁ་བ་འབབ་པ་ནི་ཆེས་ལེགས་པའི་སྔ་ལྟས་ཤིག་ཡིན་པས། དགུན་གྱི་ཁ་བ་ཐོག་མ་དེ་བུམ་པ་ལས་བདུད་རྩི་བྱོ་བ་ལྟར་འབབ་དུས། སེམས་ལ་སྤྲོ་སྣང་མི་སྐྱེ་བ་ཞིག་གང་ལ་ཡོད།

བཞི།

ཁ་བའི་བབས་ཤུགས་ཇི་ལྟར་ཆེ་ནའང་སྣུམ་ནག་གཞུང་ལམ་དུ་འཕྲུལ་འཁོར་སྔར་བཞིན་འུར་སྒྲ་དང་དུང་སྒྲའི་ཁྲོད་དུ་སྐྱོད་བཞིན་འདུག དེ་བས་སློབ་གླིང་ར་བར་སློབ་ལ་བརྩོན་པའི་སློབ་མའི་ཚོགས་ལ་འགོག་རྐྱེན་སྤུ་ཙམ་ཡང་མེད་པར་སྔར་བཞིན་ཞོགས་སྔ་ལངས་བྱས་ཏེ། ཡིད་ཁམས་བདེ་བའི་སྒོ་ནས་དཔྱིད་ཀྱི་རྒྱལ་མོའི་ངག་ལ་དོ་བའི་དཔེ་ཀློག་གི་དབྱངས་རྟ་སྙན་པོ་ལེན་བཞིན་མཆིས། དེ་བས་སློབ་མ་ཚོས་ཁ་བ་འབབ་པའི་དགའ་སྣང་གདོང་ལས་ཕྱུང་སྟེ། སློབ་གསེང་གི་གོ་སྐབས་སྤྱད་ནས་གངས་རྩེད་ལ་རོལ།

ལྔ།

དགུན་དུས་ཀྱི་ཁ་བ་ཐོག་མ། ཁྱེད་ཀྱིས་ང་ལ་སློབ་སྦྱོང་ལ་བརྩོན་པ་སྔར་ལས་ལྷག་པ་བསྐྱེད་པའི་གསོན་ཤུགས་སྦྱིན་བྱུང་ལ། དེ་བས་བློ་རྒྱ་ཁོག་རྒྱ་ཡངས་མོས་མིའི་རིགས་ལ་ཞབས་འདེགས་ཞུ་བའི་ལམ་སྟོན་གནང་བ་མ་ཟད། དུས་རྟག་ཏུ་བློ་དཀར་གཞུང་དྲང་བྱེད་དགོས་པའི་ཁ་ཏ་བསླབ་བྱའང་གནང་བྱུང་།