འདི་ག་ཚགས་པར་ཁང་དུ་རྩེད་ཐང་ནས་ཟླ་1ཚེས་17ཉིན་གློག་འཕྲིན་འབྱོར་གསལ། ཚེས་16ཉིན་གྱི་སྔ་དྲོ། 2023ལོ་ནས་2024ལོའི་བར་གྱི་ལྷོ་ཁ་གྲོང་ཁྱེར་གྱི་སྨན་བཅོས་འགན་སྲུང་སྒྲུབ་གཉེར་ཁོངས་གཏོགས་ཀྱི་ལས་སྒོ་འགྲན་བསྡུར་སྣེ་གདོང་ཆུས་སུ་གཉེར་བ་རེད།

ལྷོ་ཁ་གྲོང་ཁྱེར་གྱི་རྫོང（ཆུས་དང་གྲོང་ཁྱེར）12ཀྱི་སྨན་བཅོས་འགན་སྲུང་ཅུས་དང་ལྷོ་ཁ་གྲོང་ཁྱེར་སྨན་བཅོས་འགན་སྲུང་ཅུས་གྲོང་ཁྱེར་གྱི་རིམ་པ་དེ་གའི་དཔུང་ཁག་གཉིས་ཀྱི་ཡན་ལག་རུ་ཁག་14འགྲན་བསྡུར་ལ་ཞུགས་པ་རེད། བདམས་ཐོན་པ་ཚོས་ལན་ཧུར་ཐག་བཏབ་ནས་རང་ངོས་ཀྱི་རིགས་པའི་གཞུང་ལུགས་ཀྱི་ཡོན་ཚད་གང་ལེགས་མངོན་པར་བྱས་ཡོད། འགྲན་བསྡུར་གྱི་དྲི་གཞི་མང་ཆེ་བ་འགན་བཅོལ་ལ་ཞུགས་མཁན་གྱིས་དོ་ཁུར་བྱེད་པའི་གནད་དོན་དང་དེ་བཞིན་དེང་སྐབས་གླེང་མང་བའི་གླེང་གཞིར་དམིགས་ཏེ་ས་གནས་ས་ཐོག་གི་ལྟད་མོ་བ་ཚོས་སྨན་བཅོས་འགན་སྲུང་གི་སྲིད་ཇུས་སྔར་བས་ཤེས་རྟོགས་ཐུབ་པར་བྱས་པ་རེད།

རེས་སྐོར་མང་པོའི་འགྲན་བསྡུར་བརྒྱུད་མཚོ་སྨད་རྫོང་སྨན་བཅོས་འགན་སྲུང་ཅུས་ལ་ཚོགས་པའི་བྱ་དགའ་ཨང་དང་པོ་ཐོབ་པ་དང་མཚོ་སྨད་རྫོང་སྨན་བཅོས་འགན་སྲུང་ཅུས་ཀྱི་པད་མ་ཆོས་སྐྱིད་ལ་མི་སྒེར་གྱི་བྱ་དགའ་ཨང་དང་པོ་ཐོབ་པ་རེད།

ཤེས་རྟོགས་བྱུང་བར་གཞིགས་ན། སྨན་བཅོས་འགན་སྲུང་སྒྲུབ་གཉེར་མ་ལག་གི་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་བ་ནི་སྨན་བཅོས་འགན་བཅོལ་སྒྱུར་བཅོས་འཕེལ་རྒྱས་ཀྱི་ནང་དོན་གལ་ཆེན་ཞིག་རེད། ལྷོ་ཁ་གྲོང་ཁྱེར་སྨན་བཅོས་འགན་སྲུང་ཅུས་2019ལོར་བཙུགས་ཚུན། ཐོག་མཐའ་བར་གསུམ་དུ་སྨན་བཅོས་འགན་སྲུང་སྒྲུབ་གཉེར་ཞབས་ཞུའི་གནད་འགག་དང་དཀའ་གནད་སོགས་ལ་དམིགས་ནས། སྨན་བཅོས་འགན་སྲུང་ཁྱབ་ཁོངས་ཀྱི“གློད་སྡོམ་ཞབས་གསུམ”གྱི་སྒྱུར་བཅོས་མུ་མཐུད་གཏིང་ཟབ་ཏུ་བཏང་བ་དང་། སྨན་བཅོས་འགན་སྲུང་གི་སྒྲུབ་གཉེར་ལས་དོན་གཞི་རིམ་དུ་སྤེལ་བར་སྐུལ་འདེད་ཤུགས་ཆེན་བཏང་བ། ལམ་ལུགས་ལམ་སྲོལ་དང་། ཆ་འཕྲིན་ལག་རྩལ་ཁྱབ་གདལ་དང་བེད་སྤྱོད། རྨང་གཞིའི་སྒྲིག་བཀོད་འཐུས་སྒོ་ཚང་དུ་གཏོང་བ་སོགས་ཐད་དམངས་འཚོར་ཕན་འདོགས་པ་དང་དམངས་སེམས་ལ་དྲོ་སྐྱིད་སྦྱིན་པའི་བྱ་ཐབས་རབ་དང་རིམ་པ་སྤྱད་དེ“སྨན་བཅོས་འགན་སྲུང་གི་སྒྲུབ་གཉེར་ལས་དོན་གཞི་རིམ་དུ་སྤེལ་བ་དང་ཕྱོགས་ཡོངས་ལ་ཁྱབ་པའི”ཕྱོགས་བསྡུས་ཞབས་ཞུའི་རྣམ་པ་ཞིག་བཏོད་ཡོད།

（ཉི་དོན་དང་དཀོན་མཆོག་སྒྲོལ་མས་སྒྱུར་ཞུས་བྱས）