2023ལོར་གཞིས་རྩེ་གྲོང་ཁྱེར་གྱིས་དཔལ་འབྱོར་ལ་གྲུབ་འབྲས་མངོན་གསལ་དོད་པོ་ཐོབ་ཅིང་། སྔོན་དཔག་བྱས་ན་ལོ་ཧྲིལ་པོའི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་དང་། གཏན་འཇགས་རྒྱུ་ནོར་ལ་བཏང་བའི་མ་དངུལ། སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར། ཕྱི་ཕྱོགས་ཉོ་ཚོང་གི་ཕྱིར་གཏོང་ནང་འདྲེན་གྱི་བསྡོམས་འབོར་སོགས་དམིགས་ཚད་གཙོ་བོ་མང་པོ་ཞིག་གི་འཕར་ཚད་ལྗོངས་ཡོངས་ཀྱི་མདུན་གྲལ་དུ་སླེབས་ཡོད་པ་རེད།

སྔོན་དཔག་བྱས་ན་ལོ་ཧྲིལ་པོར་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་392ཟིན་ནས་10％ཡས་མས་འཕར་ཡོད།

གཏན་འཇགས་རྒྱུ་ནོར་ལ་བཏང་བའི་མ་དངུལ་47％འཕར་ནས་ལོ་གཉིས་བསྟུད་མར་ཆག་པའི་རྣམ་པར་འགྱུར་ལྡོག་བྱུང་ཡོད།

སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་སྒོར་དུང་ཕྱུར་21ཟིན་ནས་61％འཕར་བ་དང་སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་སྒོར་དུང་ཕྱུར་412ཟིན་ནས་18％འཕར་ཡོད།

སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་167.8ཟིན་ནས་18％འཕར་ཡོད།

གཙོ་གནད་རྣམ་གྲངས་རེ་རེ་བཞིན་ལ་ཕྱོགས་ཡོངས་ནས་ཤུགས་སྣོན་ཐེབས་པ་དང་། གཙོ་གནད་ལས་གྲྭ་རེ་རེ་བཞིན་མགྱོགས་མྱུར་བསྐྲུན་པ། ལས་དོན་གལ་ཆེན་རེ་རེ་བཞིན་དོན་འཁྱོལ་བཅས་བྱས་པར་བརྟེན“ལྟེ་བའི་གྲོང་ཁྱེར་གཉིས”འཛུགས་སྐྲུན་གྱི་འཆར་གཞི་རིམ་བཞིན་མངོན་འགྱུར་བྱུང་ཡོད།

གསར་དར་ཐོན་ལས་ལ་བཀྲག་མདངས་འཚེར་ས་མང་བ་དང་གོམ་སྟབས་བརྟན་པ།

2023ལོའི་གཞིས་རྩེ་གྲོང་ཁྱེར་གྱི་སྲིད་གཞུང་ལས་དོན་སྙན་སྒྲོན་ནང་། རྣམ་གྲངས་ནི་གནས་དང་།

(པར་ངོས་བཞི་པར་གཟིགས)(པར་ངོས་དང་པོར་མཐུད) ཐོན་ལས་ནི་གཙོ་ཐིག དཔལ་འབྱོར་ནི་ཁྱོན་བཅས་མཐའ་འཁྱོངས་ཀྱིས་ཐོན་ཁུངས་ཀྱི་ལེགས་ཆ་དང་ཁུལ་གནས་ཀྱི་ལེགས་ཆ་འདོན་སྤེལ་བྱས་ནས་མ་འཇོག་ལ་བརྟེན་ནས་སྣེ་ཁྲིད་དང་། ཐོན་ལས་རིམ་སྤོར། སྒྱུར་བཅོས་ཟབ་གཏོང་། སྒོ་མོ་འབྱེད་རྒྱ་ཆེ་རུ་གཏོང་བ། གྲོང་ཁྱེར་འཛུགས་སྐྲུན་བཅས་ལ་དམིགས་ཏེ་སྤྱི་འདོམས་འཆར་འགོད་དང་གཙོ་གནད་ཐོག་ཤུགས་སྣོན་བརྒྱབ་ནས་སྤུས་ཚད་མཐོར་གཏོང་དང་གྲངས་འབོར་ལུགས་མཐུན་ངང་འཕར་བ་བྱེད་དགོས་ཞེས་བཏོན་ཡོད།

བསམ་གྲུབ་རྩེ་ཆུས་ཀྱིས་རྒྱལ་ཁབ་ཀྱི་གྲངས་འཛིན་ནས་འདེབས་འཛུགས་གསར་གཏོད་བེད་སྤྱོད་རྟེན་གཞི་གྲུབ་འབྲས་ཐོབ་པའི་ངང་བསྐྲུན་པ་དང་། ལྕགས་འདམ་ཤང་དེང་རབས་སྐྱེ་ཁམས་ཐོན་ལས་གླིང་རང་སྐྱོང་ལྗོངས་དེང་རབས་ཞིང་ལས་ཐོན་ལས་གླིང་དུ་བསྐྲུན་རྒྱུའི་ཆོག་མཆན་ཐོབ་ཡོད།

གྲབ་ཡེར་ཚྭ་མཚེའུ་ཡི་ཏུན་ཁྲི་ཟིན་པའི་གློག་རྫས་རིམ་པའི་ཐཱན་སྐྱུར་ལིའི་རྣམ་གྲངས་བསྐྲུན་མགྱོགས་སུ་བཏང་བ་དང་བོད་ལྗོངས་ཚྭ་མཚེའུ་ཕྱོགས་བསྡུས་བེད་སྤྱོད་ཞིབ་འཇུག་གསར་སྤེལ་རྟེན་གཞི་བསྐྲུན་ཡོད།

“ཧྲང་ཧའེ་དང་གཞིས་རྩེའི”བོད་སྐྱོར་ཡུལ་སྐོར་གཙང་གླས་གནམ་གྲུ་དང“ཧྲང་ཧའེ་དང་བོད་ལྗོངས་རྟགས་ཅན”གྱི་ཡུལ་སྐོར་ཆེད་སྤྱོད་མེ་འཁོར་ས་མཐོར་བསྐྱོད་ནས“ཇོ་མོ་གླང་མའི་ཕ་ཡུལ། བཀྲ་ཤིས་པའི་གཞིས་ཀ་རྩེའི”རང་བྱུང་མཛེས་ལྗོངས་དང་མི་ཆོས་རིག་གནས་ཀྱི་རྣམ་པ་མྱོང་རོལ་བྱས་ཡོད།

གཞན་ཡང་། གཞིས་རྩེ་གྲོང་ཁྱེར་གྱིས་ད་དུང་ཞིང་ཞོར་ཐོན་རྫས་ལས་སྣོན་ཞིབ་ཚགས་དང་། མི་རིགས་ལག་ཤེས་བཟོ་ལས། ལས་སྣོན་སྒྲིག་སྦྱོར་སོགས་ངལ་རྩོལ་གཅིག་སྡུད་རྣམ་པའི་ཐོན་ལས་འཕེལ་རྒྱས་ཤུགས་ཆེན་བཏང་བ་མ་ཟད། སྨན་བཅོས་སྒྲིག་ཆས་དང་། གློག་གསོག ནུས་རྒྱུ་གསར་པའི་རླངས་འཁོར་དང་སྦག་སྦག་སྒྲིག་སྦྱོར་སོགས་ལས་སྣོན་བཟོ་སྐྲུན་ལས་རིགས་དང་གྲངས་འཛིན་དཔལ་འབྱོར་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་བཏང་བས་ཕན་འབྲས་བཟང་པོ་ཐོན་ཡོད།

དཔལ་འབྱོར་འཕར་ཚད་མགྱོགས་ལ་མྱུར་བ།

“ཚད་གཞི་མཐོ་བའི་ཞིང་ཁ་འཛུགས་སྐྲུན་རྣམ་གྲངས་ལག་བསྟར་བྱས་ཏེ་གྲོང་གསེབ་གནས་འཕྲོད་ལས་འཚམ་དང་། ཞིང་ལས་ཐོན་སྐྱེད་ཀྱི་ཆ་རྐྱེན་ལེགས་པ། ཞིང་པའི་འཚོ་བ་བདེ་སྐྱིད་ལྡན་པ་བཅས་ཡོང་བ་བྱས་ཡོད”ཅེས་ནོར་ཁང་གྲོང་ཚོའི་ཏང་ཀྲི་པུའི་ཧྲུའུ་ཅི་ལྷག་རྡོར་གྱིས་ངོ་སྤྲོད་བྱས། 2023ལོར་གྲོང་ཚོའི་མཉམ་སྡེབ་དཔལ་འབྱོར་གཉེར་སྐྱོང་རང་བཞིན་གྱི་ཡོང་འབབ་སྒོར་ཁྲི་6700དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་3.7ཟིན་ཡོད།

གཞིས་རྩེ་གྲོང་ཁྱེར་གྱིས་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་ཐོག་མཐའ་བར་གསུམ་དུ་མཐའ་འཁྱོངས་བྱས་ནས་དམངས་འཚོ་ལེགས་གཏོང་དང་མི་སེམས་གཅིག་སྒྲིལ་ལས་ཀའི་དམིགས་ས་དང་དོན་ལ་བབས་སར་བརྩི་བ་དང་། ཐོན་ལས་དང་པོ་ལེགས་སུ་གཏོང་བ་དང་། ཐོན་ལས་གཉིས་པ་སྟོབས་ཆེར་གཏོང་བ། ཐོན་ལས་གསུམ་པ་གོང་མཐོར་གཏོང་བ་བཅས་བྱས་པ་མ་ཟད། ས་མཐོའི་ཁྱད་ལྡན་ཞིང་འབྲོག་ལས་དང་། ནུས་རྒྱུ་གཙང་མ། རིག་གནས་ཡུལ་སྐོར། མཐའ་མཚམས་ཚོང་དོན་ཟོག་འགྲེམས་སོགས་ཐོན་ལས་འཕེལ་རྒྱས་ཤུགས་ཆེན་བཏང་བར་བརྟེན་འཕེལ་རྒྱས་ཀྱི་དུས་བབ་ལེགས་ལ་གྲུབ་འབྲས་བཟང་པོ་ཐོབ་ཡོད།

རྣམ་གྲངས་ནི་དཔལ་འབྱོར་འཕེལ་རྒྱས་ཀྱི་དམ་འཛིན་བྱ་གཞི་ཨང་དང་པོ་དང་མ་འཇོག་ནི་དཔལ་འབྱོར་འཛུགས་སྐྲུན་གྱི་སྒུལ་ཤུགས་ཨང་དང་པོ་རེད། 2023ལོར་གཞིས་རྩེ་གྲོང་ཁྱེར་གྱིས་གཙོ་གནད་རྣམ་གྲངས་ལ་དམ་པོར་དམིགས་ནས་མ་དངུལ་འཇོག་ཚད་མང་དུ་བཏང་ནས་རྨང་གཞི་བརྟན་གཏོང་དང་། ཞན་ཆ་སེལ་བ། ཕུགས་ལ་ཕན་པ་བཅས་ཀྱི་རྣམ་གྲངས་ཁག་གཅིག་མགྱོགས་མྱུར་དོན་འཁྱོལ་བྱས་ཏེ་ལོ་ཧྲིལ་པོའི་རྣམ་གྲངས་2048ལ་མ་དངུལ་སྒོར་དུང་ཕྱུར་302བཏང་སྟེ་དུས་མཚུངས་ལས་40.8％འཕར་ཡོད།

ལྷ་གཞིས་མྱུར་བགྲོད་གཞུང་ལམ་གྱི་ཕུག་ལམ་རིང་ཤོས་ཤར་གཏོང་ཐུབ་པ་དང་། དིང་རི་གནམ་ཐང་དངོས་སུ་ཤར་གཏོང་ཐུབ་པ། ཤངས་ཆུ་ཆུ་བེད་ལྟེ་གནས་ལས་གྲྭ་བསྐྲུན་པ། བར་རྩེ་ཆུ་བེད་ལྟེ་བའི་ལས་གྲྭའི་བཞུར་རྒྱུན་དང་ཆུ་གཤོང་བྲག་ཕུག་ཏལ་འབིགས་བཏང་བ་སོགས་རྣམ་གྲངས་གལ་ཆེན་བསྐྲུན་པར་བརྟེན་དཔལ་འབྱོར་འཕེལ་རྒྱས་ལ་སྐུལ་མ་ཐེབས་པ་མ་ཟད། “གཞིས་རྩེའི་མྱུར་ཚད”ཀྱི་ཟིན་ཐོ་བཏོད་ཡོད།

ཚོང་གཉེར་ཁོར་ཡུག་ལེགས་སུ་བཏང་བས་ཕན་འབྲས་བཟང་བ།

“ང་ཚོས་བློ་གཅིག་སེམས་གཅིག་གིས་ཁེ་ལས་ལ་ཞབས་འདེགས་ཞུ་བའི་འདུ་ཤེས་མཐའ་འཁྱོངས་བྱས་ཏེ་གཟིགས་སྐྱོང་ཆེ་ཤོས་ཀྱི་སྲིད་ཇུས་འདོན་པ་དང་སྤུས་ལེགས་ཀྱི་ཞབས་ཞུ་ཡག་ཤོས་མཁོ་འདོན་བྱས་ཏེ་ཚང་མས་གཞིས་རྩེར་མ་དངུལ་འཇོག་པའི་ཡིད་ཆེས་ཆེ་རུ་བཏང་ནས་མཉམ་ལས་གཉིས་ཕན་དང་ཐུན་མོང་ཐོག་འཕེལ་རྒྱས་ཡོང་བ་བྱས་ཡོད”ཅེས་གཞིས་རྩེ་གྲོང་ཁྱེར་དཔལ་འབྱོར་གསར་སྤེལ་ཁུལ་དོ་དམ་ཨུ་ལྷན་གྱི་ཀྲུའུ་རེན་ཏེང་ཡུང་པིན་གྱིས་གསར་འགོད་པར་བཤད།

གཞིས་རྩེ་གྲོང་ཁྱེར་གྱིས་དཔལ་འབྱོར་གསར་སྤེལ་ཁུལ་གྱི་རིམ་པ་མཐོར་གཏོང་དང་གཞི་ཁྱོན་ཆེ་རུ་གཏོང་བ་དང་། རིག་གཏོད་གླིང་ཁུལ་གྱི་ནུས་པ་ལེགས་གཏོང་དང་འདོན་སྤེལ། རྒྱལ་ཁབ་ཞིང་ལས་ཚན་རྩལ་གླིང་ཁུལ་གྱི་ལམ་སྲོལ་ལེགས་སྒྲིག་དང་ཚད་ལྡན་དང་འཕེལ་རྒྱས་ཀྱི་ལས་ཀའི་བསམ་ཕྱོགས་གཞིར་བཟུང་གླིང་ཁུལ་འཛུགས་སྐྲུན་ལ་སྤྱི་འདོམས་སྐུལ་འདེད་བཏང་བར་བརྟེན་ཐོན་ལས་གཅིག་སྡུད་ལ་ཕན་འབྲས་རགས་ཙམ་ཐོན་ཡོད།

གཞིས་རྩེ་གྲོང་ཁྱེར་གྱིས“ཕྱིར་བསྐྱོད་པ”དང“ནང་དུ་འདྲེན་པ”གལ་ཆེ་མཉམ་དུ་འཛིན་པ་མཐའ་འཁྱོངས་ཀྱིས《གཞིས་རྩེ་གྲོང་ཁྱེར་གྱི་ཚོང་འགུགས་མ་འདྲེན་གྱི་གཟིགས་སྐྱོང་སྲིད་ཇུས་ཀྱི་གཏན་འབེབས་འགའ་ཞིག（ཚོད་ལྟའི་ལག་བསྟར）》བཟོས་པ་དང་ཚོང་འགུགས་མ་འདྲེན་གྱི་བྱ་དགའི་དངུལ་སྒོར་ཁྲི་8000བཀོད་སྒྲིག་བྱས་ཡོད། 2023ལོར་གཞིས་རྩེ་གྲོང་ཁྱེར་གྱིས་ཚོང་འགུགས་མ་འདྲེན་གྱི་བྱེད་སྒོ་ཐེངས་102གཉེར་བ་དང་ཚོང་འགུགས་རྣམ་གྲངས་223ཟིན་པར་གྲོས་མཐུན་བཞག་པའི་མ་དངུལ་སྒོར་དུང་ཕྱུར་457.22ཟིན་པ་དང་མ་དངུལ་སྒོར་དུང་ཕྱུར་65.69དམིགས་སར་འབྱོར་ཏེ་དམིགས་ཚད་ལས་འགན་ཚད་བརྒལ་ངང་ལེགས་གྲུབ་བྱུང་ཡོད།

ཕྱི་ཕྱོགས་ཚོང་དོན་ཐོན་ལས་འཕེལ་རྒྱས་ཀྱི་གཏིང་ཤུགས་ཆེ་བ་དང་བར་མཐོངས་ཡངས་པ།

2023ལོ་ནས་བཟུང་གཞིས་རྩེ་གྲོང་ཨུད་དང་གྲོང་ཁྱེར་སྲིད་གཞུང་གིས“ཨེ་ཤེ་ཡ་ལྷོ་མར་སྒོ་མོ་འབྱེད་པའི་ལྟེ་བའི་གྲོང་ཁྱེར་སྐྲུན་པའི”ལས་འགན་ལྕི་པོ་མཐའ་གཅིག་ཏུ་འཁུར་བ་དང་། “རྒྱུད་གཅིག་ལམ་གཅིག”མཉམ་སྐྲུན་ལ་ཧུར་ཐག་ཞུགས་པ། ཕྱོགས་ཡོངས་ནས་ཕྱི་ཕྱོགས་སུ་སྒོ་མོ་འབྱེད་པའི་རྣམ་པ་ཧུར་ཐག་གཏོད་པ། དུས་རབས་ཀྱི་གོམ་སྟབས་ཀྱི་རྗེས་སུ་སྙེག་པ་དང་ལག་ལེན་གྱི་འཕེལ་རྒྱས་དང་བསྟུན་པ། ཕྱི་ཕྱོགས་ཚོང་དོན་གྱི་གཞི་ཁྱོན་ལོ་རྒྱུས་ཀྱི་ཟིན་ཐོ་གསར་པ་གཏོད་པར་སྐུལ་འདེད་གཏོང་བ་བཅས་བྱས་པས་ཕྱོགས་ཡོངས་ནས་ཕྱི་ཕྱོགས་སུ་སྒོ་མོ་འབྱེད་པའི་རྣམ་པ་སྔར་བས་མངོན་གསལ་དོད་དུ་ཕྱིན་ཡོད།

གཞིས་རྩེ་གྲོང་ཁྱེར་གྱི་ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་གྱི་བསྡོམས་འབོར་བརྟན་པོའི་ངང་འཕར་ཏེ་ཕྱི་ཕྱོགས་ཚོང་དོན་གྱི་ཐོན་ལས་ཆར་རྗེས་ཀྱི་མྱུ་གུ་བཞིན་འཕེལ་རྒྱས་ཕྱིན་ཡོད། 2023ལོར་གཞིས་རྩེ་གྲོང་ཁྱེར་གྱིས་སྐྱིད་གྲོང་གི་མཐའ་མཚམས་དཔལ་འབྱོར་མཉམ་ལས་ཁུལ་བསྐྲུན་མགྱོགས་སུ་བཏང་སྟེ་རྣམ་གྲངས་31ལག་ལེན་བསྟར་བར་མ་དངུལ་སྒོར་དུང་ཕྱུར་4.6བཏང་བ་དང་། ཚོང་འགུགས་མ་འདྲེན་ཐད་དམིགས་སར་འབྱོར་བའི་མ་དངུལ་སྒོར་དུང་ཕྱུར་2.4ཟིན་པ། ཕྱི་ཕྱོགས་ཚོང་དོན་གྱི་ཕྱིར་གཏོང་ནང་འདྲེན་གྱི་བསྡོམས་འབོར་སྒོར་དུང་ཕྱུར་29.44ཟིན་ཡོད། དེ་དང་ཆབས་ཅིག་འབྲོང་པ་རྫོང་གི་མ་ཡུམ་སོགས་མཐའ་མིའི་ཚོང་འབྲེལ་ས་ཚིགས་11ལྗོངས་ཡོངས་ཀྱི་བསྐྱར་གསོའི་འཆར་གཞི་ཁག་དང་པོའི་ནང་བཞག་པ་དང་། འགྲམ་འགག་སྒོའི་མཐའ་མིའི་ཚོང་འབྲེལ་ཁུལ་བསྐྲུན་རྒྱུར་ཆོག་མཆན་ཐོབ་པ། སྐྱིད་གྲོང་འགག་སྒོའི་མཐའ་མིའི་ཚོང་འབྲེལ་སླར་གསོ་བྱུང་ནས་གྲོང་ཁྱེར་ཡོངས་ཀྱི་མཐའ་མིའི་ཚོང་འབྲེལ་བསྡོམས་འབོར་སྒོར་ཁྲི་4500ཟིན་ཡོད།

གཞིས་རྩེ་གྲོང་ཁྱེར་གྱིས་སྤེལ་རེས་མཉམ་ལས་ཀྱི་ཐབས་ལམ་རྒྱ་ཆེར་ཤུགས་ཆེན་བཏང་ནས་ཕྱི་ཕྱོགས་སྤེལ་རེས་དེ་བས་ཟབ་ཏུ་བཏང་སྟེ། ནེ་པ་ལའི་པཱ་ལཱ་ཐི་ཕུར་དང་མཛའ་གྲོགས་གྲོང་ཁྱེར་གྱི་འབྲེལ་བ་ཚུགས་ནས་རྒྱལ་སྤྱིའི་རང་བཞིན་གྱི་ལུས་རྩལ་འགྲན་བསྡུར་ཐོག་མ་སྟེ། 2023ལོའི་སྐབས་བཞི་པའི་ཧི་མ་ལ་ཡ་སྐོར་བའི་རྒྱལ་སྤྱིའི་གཞུང་ལམ་རྐང་འཁོར་གྱི་མཐར་སོན་འགྲན་བསྡུར་གྱི་ལམ་དུམ་གཉིས་པའི་འགྲན་བསྡུར་དང་2023ལོའི་གཞིས་རྩེའི་ཀྲུང་ཕྱིའི་ཚོང་འདུས་གཉེར་ཡོད།

སྐྱིད་གྲོང་རྫོང་ཨུད་ཀྱི་ཧྲུའུ་ཅི་གཞོན་པ་དང་། རྫོང་དཔོན། འགག་སྒོ་དོ་དམ་ཨུ་ལྷན་གྱི་ཀྲུའུ་རེན་བཅས་ཡིན་པའི་ཏ་ཁྲུན་གྱིས་2023ལོ་ནས་བཟུང་སྐྱིད་གྲོང་མཐའ་མཚམས་དཔལ་འབྱོར་མཉམ་ལས་ཁུལ་གྱི་གྲོང་ཁྱེར་ཇུས་འགོད་འཆར་འགོད་ལ་མགྱོགས་མྱུར་སྐུལ་འདེད་བཏང་བ་མ་ཟད། སྐྱིད་གྲོང་གི་རྒྱལ་ཁབ་ཀྱི་གཙོ་གནད་གསར་སྤེལ་སྒོ་དབྱེའི་ཚོད་ལྟ་ཁུལ་གཉེར་རྒྱུའི་རེ་ཞུ་ཕུལ་ཏེ་སྐྱིད་གྲོང་འགག་སྒོ་དེ“བགྲོད་ལམ་དཔལ་འབྱོར”དང“བར་བརྒྱུད་དཔལ་འབྱོར”ནས“འགག་སྒོའི་དཔལ་འབྱོར”ཕྱོགས་སུ་འགྱུར་བར་སྐུལ་འདེད་བཏང་བར་བརྟེན། “འགག་སྒོའི་ཐོན་ལས་གྲོང་ཁྱེར”གྱི་མཉམ་འདྲེས་འཕེལ་རྒྱས་མངོན་འགྱུར་བྱུང་ཡོད་ཅེས་ངོ་སྤྲོད་བྱས།

（པ་སངས་དང་ཚེ་ཁོས་སྒྱུར་ཞུས་བྱས）