འདི་ག་ཚགས་པར་ཁང་དུ་རྩེད་ཐང་ནས་ཟླ་1ཚེས་15ཉིན་གློག་འཕྲིན་འབྱོར་གསལ། བརྗོད་དོན་གཙོ་བོའི་སློབ་གསོ་སྤེལ་ཚུན། ལྷོ་ཁ་གྲོང་ཁྱེར་གྱིས་ནུས་མེད་ཟབ་ཟོབ་ཀྱི་གཞི་རིམ་ཏང་རྩ་འཛུགས་བཅོས་སྒྲིག་དང་རིམ་སྤོར་ལ་དམིགས་ནས་གཙོ་གནད་ལ་དམ་འཛིན་དང་། བྱ་ཐབས་དངོས་འདོན་པ། ཆད་སྐྱོན་སེལ་བ། དངོས་ཕན་དོན་གཉེར་བཅས་བྱས་ཏེ། གཞི་རིམ་ཏང་རྩ་འཛུགས་ཀྱི་ཆབ་སྲིད་ཀྱི་ནུས་པ་དང་རྩ་འཛུགས་ཀྱི་ནུས་པ་རྒྱུན་ཆད་མེད་པར་ཆེ་རུ་འགྲོ་བར་སྐུལ་འདེད་བཏང་ཡོད།

བསམ་བློ་ཆབ་སྲིད་འཛུགས་སྐྱོང་ལ་དམིགས་ཏེ“ནུས་མེད”ལ་བཅོས་སྒྲིག་བྱས་ཤིང་། ལྷོ་ཁ་གྲོང་ཁྱེར་གྱིས“དགོངས་པ་སློབ་སྦྱོང་བྱེད་པ”དེ་ལས་འགན་ཨང་དང་པོར་བརྩི་རྒྱུ་མཐའ་འཁྱོངས་ཀྱིས་གཞི་རིམ་ཏང་རྩ་འཛུགས་ཀྱི་ཧྲུའུ་ཅིས་ཏང་གི་སློབ་ཚན་ཐེངས་80འཁྲིད་རྒྱུར་སྐུལ་འདེད་བཏང་བ་དང་། བརྗོད་དོན་གཙོ་བོའི་སློབ་གསོའི་རིགས་པའི་གཞུང་ལུགས་སློབ་སྦྱོང་དང་གྲོང་ཚོའི་ལས་བྱེད་པའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་ནུས་པ་ཆེ་རུ་བཏང་བ། དྲ་ཐོག་ཐབས་ལམ་སྟབས་བསྟུན་ངང་སྤྱོད་པ། མཚན་མོའི་སློབ་གྲྭར་གསོ་སྦྱོང་ཐེངས་60ལྷག་ཙམ་བྱས་པ། ཆ་སྒྲིག་རོགས་སྐྱོར་ཐེངས་110ལྷག་ཙམ་བྱས་ནས། གྲོང་ཚོའི་ལས་བྱེད་པ་50ཡི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་ཆུ་ཚད་མཐོ་རུ་ནུས་ལྡན་བཏང་ཡོད།

ཟངས་རི་རྫོང་རྫིང་ཕྱི་ཤང་སྤྲིན་མཚོ་གྲོང་ཚོར་གྲོང་ཚོའི་ཏང་ཀྲི་པུའི་ཧྲུའུ་ཅི་ཡེ་ཤེས་ཆོས་འཕེལ་དང་གྲོང་ཚོའི་ལས་བྱེད་པ་5ཡིས“བོད་སྒྱུར་ལོ་ཙྭ་བའི”APPསྤྱད་དེ་རང་འགུལ་ངང་སློབ་སྦྱོང་བྱས་པ་བརྒྱུད་ཚང་མས་རྒྱལ་ཁབ་ཀྱི་སྤྱི་སྤྱོད་སྐད་ཡིག་མཉམ་དུ་སྦྱོང་བ་དང་། མཉམ་དུ་ཀློག་པ། མཉམ་དུ་འབྲི་བ་བཅས་བྱས་ཏེ་ཕན་ཚུན་དཔྱད་བརྗོད་བྱས་པར་ཡར་རྒྱས་མངོན་གསལ་དོད་པོ་བྱུང་ཡོད།

ཚན་ཁག་དང་དཔུང་ཁག་འཛུགས་སྐྱོང་ལ་དམིགས་ཏེ“ཉམས་ཞན”ལ་བཅོས་སྒྲིག་བྱས་ཤིང་། ལྷོ་ཁ་གྲོང་ཁྱེར་གྱིས་གྲོང་ཚོ་རིམ་པའི་རྩ་འཛུགས་ཚན་ཁག་གི་དཔུང་ཁག་ལེགས་འདེམས་ཧྲག་སྒྲུག་བྱས་ནས་ནུས་མེད་ཟབ་ཟོབ་ཀྱི་གཞི་རིམ་ཏང་རྩ་འཛུགས་ཀྱི་ཧྲུའུ་ཅི་2དང་ཚན་ཁག་གི་ཁོངས་མི་6ལེགས་སྒྲིག་བྱས་པ་དང་། གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མི་45སྒྲིག་འཛུགས་བྱས་ཏེ་ལྗོངས་ཕྱི་ནང་དུ་སློབ་སྦྱོང་སྤེལ་རེས་བྱེད་པར་མངགས་ནས་མཐོང་རྒྱ་ཆེ་རུ་དང་ལས་ཀའི་བསམ་ཕྱོགས་རྒྱ་ཆེར་བཏང་བ། གྲོང་ཚོ་རིམ་པའི་རྗེས་གྲབས་ལས་བྱེད་པར་རྗེས་སྙེག་གསོ་སྐྱོང་བྱེད་ཤུགས་ཆེ་རུ་བཏང་ནས་ཕུལ་བྱུང་ཤེས་ལྡན་པ་80གྲོང་ཚོ་རིམ་པའི་རྗེས་གྲབས་ལས་བྱེད་པའི་མཛོད་ནང་བཅུག་པ་དང་། ཆ་སྒྲིག་རོགས་སློབ་སོགས་ཀྱི་བྱེད་ཐབས་བརྒྱུད་རྗེས་སྙེག་གསོ་སྐྱོང་ཐེངས་300ལྷག་ཙམ་བྱས་ཡོད།

གྲ་ནང་རྫོང་དཀྱིལ་རུ་ཤང་བཀྲ་ཤིས་གླིང་གྲོང་ཚོའི་ཏང་ཀྲི་པུས་གྲོང་ཚོའི་ལས་བྱེད་པའི་དགོངས་ཞུའི་ལམ་ལུགས་ལག་བསྟར་ནན་པོ་བྱས་ཏེ། རྫོང་ནས་ཁ་བྲལ་བའི་དུས་ཚོད་རིང་ཐུང་གཞིར་བཟུང་ཤང་ཏང་ཨུད་དང་སྲིད་གཞུང་གི་འགོ་ཁྲིད་གཙོ་བོར་ཡིག་ཐོག་ནས་དགོངས་པ་ཞུ་བ་དང་ཕྱིར་ལོག་རྗེས་དུས་ཐོག་ཏུ་དགོངས་དུས་ཐིམ་ཞུ་བྱས་ནས། གྲོང་ཚོའི་ལས་བྱེད་པའི་དོ་དམ་ཚད་ལྡན་ཅན་དུ་གཏོང་བ་དང་མང་ཚོགས་ལ་ཞབས་འདེགས་ཞུ་བའི་ལས་དོན་གཏིང་ཟབ་སྤེལ་བར་སྐུལ་འདེད་བཏང་ཡོད།

རང་ངོས་འཛུགས་སྐྱོང་ལ་དམིགས་ཏེ“ཟབ་ཟོབ”ལ་བཅོས་སྒྲིག་བྱས་ཤིང་། གཞི་རིམ་ཏང་རྩ་འཛུགས་ཀྱི་ཚན་ཁག་འགའ་ཞིག་གི་ཁོངས་མིའི་ཁྲིམས་སྐྱོང་འདུ་ཤེས་ཞན་པ་དང་སྒྲིག་འགལ་ཁྲིམས་འགལ་གྱི་གནད་དོན་ཡང་ཡང་ཐོན་པ་སོགས་ཀྱི་གནས་ཚུལ་ལ་དམིགས་ཏེ་ལྷོ་ཁ་གྲོང་ཁྱེར་སྒྲིག་ཨུད་ལྟ་ཞིབ་ཨུ་ལྷན་དང་། རྩ་འཛུགས། སྤྱི་བདེ་སོགས་སྡེ་ཚན་གྱིས་གཞི་རིམ་ཏང་རྩ་འཛུགས་དང་མཉམ་དུ་སྒྲིག་ཁྲིམས་དང་སྤྱོད་ཚུལ་གྱི་ཆེད་དོན་གསོ་སྦྱོང་དང་། ཉེན་བརྡའི་སློབ་གསོ། བཅའ་ཁྲིམས་དང་ཁྲིམས་སྲོལ་སྒྲོག་འགྲེལ། སྲིད་གཙང་སློབ་གསོའི་རྟེན་གཞིར་ལྟ་སྐོར་སོགས་ཀྱི་ཆེད་དོན་བྱེད་སྒོ་ཐེངས་19སྤེལ་བ་དང་ཉེ་འགྲམ་གྱི་ལས་དོན་ལ་བརྟེན་ནས་ཉེ་འགྲམ་གྱི་མིར་སློབ་གསོ་བཏང་བར་སློབ་གསོ་ཐེབས་པའི་མི་ཐེངས་2500ལྷག་ཙམ་ཟིན་ཡོད་པ་རེད།

ལྷོ་ཁ་གྲོང་ཁྱེར་ལས་རིགས་ལག་རྩལ་སློབ་གྲྭ་གཉིས་པའི་ཏང་ཀྲི་པུའུ་གསུམ་པས་ཏང་ཡོན་གྱི་སྔོན་ཐོན་རང་བཞིན་དང་སྤྱོད་གཙང་རང་བཞིན་གྱི་སློབ་གསོ་རྒྱུན་རྣམ་ཅན་གྱི་སྒོ་ནས་སྤེལ་བ་དང་། དཔེ་མཚོན་གྱོད་གཞིའི་བརྡ་ཁྱབ་སློབ་སྦྱོང་དང་དགེ་རྒན་གྱི་ཀུན་སྤྱོད་དང་སྤྲོད་ཚུལ་གྱི་ཆེད་དོན་འཆད་ཁྲིད་སོགས་རྣམ་པ་སྣ་ཚོགས་བརྒྱུད་དགེ་རྒན་དང་ལས་བཟོ་ཏང་ཡོན་30ལ་བསམ་བློའི་འགོག་སྲུང་བརྟན་པོ་ཞིག་བསྐྲུན་ཡོད།

ལས་ཀའི་འགན་འཁྲི་ནན་དུ་གཏོང་བར་དམིགས་ཏེ“ཁ་ཐོར”ལ་བཅོས་སྒྲིག་བྱས་ཤིང་། ལྷོ་ཁ་གྲོང་ཁྱེར་གྱིས་ཏང་ནང་ཁུལ་གྱི་ཆབ་སྲིད་འཚོ་བ་ནན་དུ་བཏང་ནས“ཚོགས་འདུ་གསུམ་དང་སློབ་ཚན་གཅིག”ཚད་ལྡན་དུ་བཏང་བ་དང་། གྲོས་དོན་ཐབས་ཇུས་ལམ་སྲོལ་འཐུས་སྒོ་ཚང་དུ་བཏང་བ། གྲོང་དོན་ལྟ་སྐུལ་ཨུ་ལྷན་ཁག་གིས་རྗེས་འདེད་ལྟ་སྐུལ་བྱས་པ། “གྲོས་དོན་བཞི་དང་ཡོངས་བསྒྲགས་གཉིས”ལ་བརྟེན་ནས་གྲོང་ཚོ་རིམ་པའི་དོན་གནད་གལ་ཆེན་ལ་ཞིབ་འཇུག་བྱེད་པར་སྐུལ་འདེད་བཏང་བ། བཅོས་སྒྲིག་ལས་དོན་གྱི་ལྟ་སྐུལ་ཞིབ་བཤེར་ལམ་ལུགས་འཛུགས་པ་དང་དག་ཐེར་བྱེད་དགོས་པའི་གནད་དོན་117ལ་གཅིག་ཤེས་ཀུན་གྲོལ་གྱིས་ལྟ་སྐུལ་བྱས་པས་རྗེས་སྟེག་གིས་ཕན་འབྲས་འདྲི་རྩད་དང་སྲ་བརྟན་མཐོར་གཏོང་ཐུབ་པ་བྱུང་ཡོད།

གོང་དཀར་རྫོང་རྒྱ་དྲུག་གླིང་གྲོང་རྡལ་རྒྱ་རི་གྲོང་ཚོས་སྔ་རྗེས་སུ་ཏང་དོན་ཤེས་བྱའི་གསོ་སྦྱོང་ཐེངས་26བྱས་ཏེ་ཏང་དོན་ལས་ཀའི་འཇོན་ཐང་དང་ཆུ་ཚད་མཐོ་རུ་བཏང་བ་དང་། སྣེ་གདོང་ཆུས་རྡོ་ཕོ་བྲང་ཤང་ཀ་ལ་གྲོང་ཚོའི་ཏང་སྤྱི་ཁྱབ་ཀྲི་པུའུ་ཡིས་2023ལོའི་གྲོང་ཚོའི་མཉམ་སྡེབ་དཔལ་འབྱོར་ཡོང་འབབ་སྒོར་ཁྲི་72.2དང་གཏོང་སྒོའི་མ་དངུལ་སྒོར་ཁྲི་161.367དུས་ཐོག་ཏུ་ཡོངས་བསྒྲགས་བྱས་ནས་ཏང་ཡོན་དང་མང་ཚོགས་ཀྱི་ཤེས་རྟོགས་དབང་ཆར་འགན་ལེན་བྱས་པ་རེད། མིག་སྔར་ལྷོ་ཁ་གྲོང་ཁྱེར་གྱི་ནུས་མེད་ཟབ་ཟོབ་ཀྱི་གཞི་རིམ་ཏང་རྩ་འཛུགས་15ལ་བཅོས་སྒྲིག་བྱེད་ཚད་100%ཟིན་ནས་ཏང་ཡོན་གྱི་བློ་ཡིད་ཚིམ་ཚད་དང་མང་ཚོགས་ཀྱི་འཐུས་མིའི་བློ་ཡིད་ཚིམ་ཚད་མངོན་གསལ་དོད་པོས་མཐོ་རུ་ཕྱིན་ཡོད་པ་རེད།