ང་རང་ལྟེ་ཁྲག་འཕོ་སའི་འབྲོག་ཁུལ་ན། །

མགོ་སྐྱེས་སྐྲ་ལོ་སྣུམ་པའི་འབྲོག་མོ་ཡོད། །

སྨིན་མ་ནག་ལ་གཞུ་མོའི་དབྱིབས་དང་ལྡན། །

ངོ་ལ་མཛེས་ཀོང་ལྡན་པའི་འབྲོག་མོ་ཡོད། །

མཆུ་སྒྲོས་སྲབ་མོ་འདབ་མའི་རང་བཞིན་ལྡན། །

ང་རང་འཚར་ལོངས་ཡོང་སའི་འབྲོག་ཁུལ་ན། །

ཕ་མར་བྱམས་བརྩེ་ཆེ་བའི་འབྲོག་མོ་ཡོད། །

བཟའ་ཟླར་བརྩེ་བ་ཟབ་ལ་རྒྱུ་དག་ལྡན། །

ཟས་ལ་གཡོ་སྦྱོར་མཁས་པའི་འབྲོག་མོ་ཡོད། །

ཉིན་མཚན་ལས་ལ་བརྩོན་པའི་རང་གཤིས་ལྡན། །

ང་རང་སློབ་གཉེར་བྱེད་སའི་ར་བ་ན། །

སྐག་ཚོས་གཡའ་དང་བྲལ་བའི་འབྲོག་མོ་ཡོད། །

མཁུར་ཚོས་དཀར་དམར་ཅན་གྱི་བཞིན་རས་ལྡན། །

ཡ་རབས་དྲང་བདེན་ཅན་གྱི་འབྲོག་མོ་ཡོད། །

རིག་པའི་གནས་ལ་བརྩོན་པའི་ལྷག་བསམ་ལྡན། །

ང་རང་རྒྱལ་ཁམས་འགྲིམ་སའི་ཡུལ་གྲུ་ན། །

མཛེས་མཛེས་མཚར་སྡུག་ལྡན་པའི་བུ་མོའི་ཁྲོད། །

མཚར་མཚར་འབྲོག་མོའི་དོ་ཟླ་སུ་ཡང་མེད། །

འཚེར་འཚེར་འཛུམ་ཆུང་དགོད་པ་མང་ན་ཡང་། །

བཟང་བཟང་འབྲོག་མོའི་སེམས་དཀར་ཉུང་ཉུང་རེད། །