ནགས་ཐང་གྲོང་ཚོའི་བོད་ཕག་གསོ་ཚགས་མཉམ་ལས་ཁང་བཙུགས་ཚུན། གྲོང་ཚོ་ཡོངས་ཀྱི་དུད་ཚང་70ལྷག་ཙམ་གྱི་འབབ་འཕར་ལ་སྐུལ་ཁྲིད་བྱས་པ་མ་ཟད། ད་ཐེངས་ཀྱི་བགོ་འགྲེམས་མི་དམངས་ཤོག་སྒོར་ལ་ཕབ་ན་སྒོར་ཁྲི་11.5ཟིན་གྱི་ཡོད།

འདི་ག་ཚགས་པར་ཁང་དུ་གཞིས་རྩེ་ནས་གློག་འཕྲིན་འབྱོར་གསལ། ཉེ་ཆར། གཏིང་སྐྱེས་རྫོང་འདྲེན་ཐང་གྲོང་རྡལ་ནགས་ཐང་གྲོང་ཚོ་ནས་བགོ་འགྲེམས་ཀྱི་གཏམ་བཟང་གང་སར་ཁྱབ། བགོ་འགྲེམས་རྒྱག་པའི་ཉིན་དེར་གྲོང་མི་70ལྷག་ཙམ་གྱིས་གྲོང་ཚོའི་བོད་ཕག་གསོ་ཚགས་མཉམ་ལས་ཁང་གི་སྒོ་རའི་ནང་བང་བསྒྲིགས་ནས་ཕག་ཤ་ལེན་བཞིན་ངོ་གདོང་ནས་འཛུམ་མདངས་འཕྱུར།

“ལོ་གསར་གོང་མཉམ་ལས་ཁང་གིས་ང་ཚོར་ཕག་ཤ་བགོ་འགྲེམས་བརྒྱབ་པས་ལོ་གསར་གྱི་ཤ་ཉོ་དགོས་བྱུང་མ་སོང”ཞེས་ཕག་ཤ་ལེན་མཁན་གྲོང་མི་ཕུར་དར་གྱིས་དགའ་ཚོར་ཆེན་པོས་བཤད། མཉམ་ལས་ཁང་གི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། ད་ཐེངས་ཁྱོན་བོད་ཕག་25བཤས་བཏང་ནས་ཁྱིམ་ཚང་73ལ་བགོ་འགྲེམས་བརྒྱབ་པ་དེ་མི་དམངས་ཤོག་སྒོར་ལ་ཕབ་ན་སྒོར་ཁྲི་11.5ཟིན་གྱི་ཡོད་པ་རེད།

ཤེས་རྟོགས་བྱུང་བར་གཞིགས་ན། ནགས་ཐང་གྲོང་ཚོའི་བོད་ཕག་གསོ་ཚགས་མཉམ་ལས་ཁང་བཙུགས་ཚུན་ཡུལ་མི་གཉིས་ལས་ཀར་བཅུག་པ་དང་གྲོང་ཚོ་ཡོངས་ཀྱི་དུད་ཚང་70ལྷག་ཙམ་གྱི་འབབ་འཕར་ལ་སྐུལ་ཁྲིད་བྱས་ཡོད། མཉམ་ལས་ཁང་ལ་ལག་ཡོད་བོད་ཕག་མགོ་གྲངས་300ཡོད་པ་ནས་2023ལོར་80བཤས་བཏང་བར་ཡོང་འབབ་སྒོར་ཁྲི་20ལྷག་ཙམ་བྱུང་བ་རེད།

(སྐལ་མཆོག་གིས་བསྒྱུར། སྒྲོན་ལགས་ཀྱིས་ཞུས)