ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ་བདེ་ཆེན་གྲོང་ཚོ་ནས་ཡིན་པ་དང་། 2024ལོའི་རང་སྐྱོང་ལྗོངས་ཀྱི་ཚོགས་འདུ་གཉིས་ལ་ཞུགས་མཁན་མི་དམངས་འཐུས་ཚོགས་ཀྱི་འཐུས་མི་བློ་བཟང་སྒྲོལ་དཀར་གྱིས“ང་ཚོའི་གྲོང་ཚོས‘འདུ་ཤེས་གསུམ’གྱི་དྲིལ་བསྒྲགས་སློབ་གསོ་དུས་རབས་གསར་པར་མང་ཚོགས་ཀྱི་བསམ་བློའི་སློབ་གསོར་ཤུགས་སྣོན་དང་ལེགས་སུ་གཏོང་བའི་རྨང་གཞིའི་རང་བཞིན་དང་ཡུན་རིང་རང་བཞིན་གྱི་ལས་དོན་ཞིག་ལ་བརྩིས་ནས། ‘འདུ་ཤེས་གསུམ’གྱི་དྲིལ་བསྒྲགས་སློབ་གསོར་སྐུལ་འདེད་ཏན་ཏིག་བཏང་བས་དུས་མཚམས་རང་བཞིན་གྱི་གྲུབ་འབྲས་མངོན་གསལ་དོད་པོ་ཐོབ་ཡོད”ཅེས་གསར་འགོད་པར་གསུངས།
ཁོང་གིས། “འདུ་ཤེས་གསུམ”གྱི་དྲིལ་བསྒྲགས་སློབ་གསོ་སྤེལ་ཚུན། བདེ་ཆེན་གྲོང་ཚོས་ལས་བྲེལ་དུས་སུ་ཞིང་འབྲོག་མང་ཚོགས་ཀྱི་སྒྲོག་འགྲེལ་པ་དང་། ཏང་ཡོན། དུད་སྦྲེལ་སྤྱི་མི། ཏང་ཡོན་རྒན་གྲས་སོགས་ཀྱི་ཚོགས་སྤྱི་གང་ལེགས་སྤྱད་དེ། ཞིང་ནང་དང་མུ་ཁར་བསྐྱོད་ནས་མང་ཚོགས་ལ་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་དང“འདུ་ཤེས་གསུམ”བརྟན་པོར་འཛུགས་པའི་སྒྲོག་འགྲེལ་བྱེད་སྒོ་སྤེལ་བས། སྒྲོག་འགྲེལ་ལ་རྒྱ་ཁྱབ་རང་བཞིན་དང་དམིགས་སའི་རང་བཞིན་ལྡན་ཡོད། སྒྲོག་འགྲེལ་པས་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་དང“འདུ་ཤེས་གསུམ”བརྟན་པོར་འཛུགས་པའི་ནང་དོན་གཙོ་བོ་དྲིལ་བསྒྲགས་དང་སྒྲོག་འགྲེལ་བྱས་ནས། མང་ཚོགས་ཀྱི་ཐོན་སྐྱེད་དང་འཚོ་བ་དང་ཟུང་འབྲེལ་གྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་དང་། ཏང་གི་ཚོགས་ཆེན་ཉི་ཤུ་པའི་དགོངས་དོན། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ། “མོས་སེམས་ལྔ” ཁྲིམས་སྐྱོང་འཛུགས་སྐྱོང་། ཤེས་དཔལ་འཛུགས་གཏོད། བདེ་འཇགས་ཐོན་སྐྱེད། སྐྱེ་ཁམས་ཁོར་ཡུག འཆལ་རྡུང་ལོག་སེལ། ནག་སེལ་གཤེད་བཅོམ། གློག་འཕྲིན་དྲ་རྒྱའི་ཁ་བསླུས་འགོག་ཟོན། ཞིང་འབྲོག་ཚན་རྩལ་སོགས་ཀྱི་ཤེས་བྱ་དང་སྲིད་ཇུས་ཀྱི་ནང་དོན་དྲིལ་བསྒྲགས་དང་སྒྲོག་འགྲེལ་བྱས་ནས། ཞིབ་ཕྲའི་དཔེ་མཚོན་དང་གྱོད་དཔེ་དང་ཉེ་འགྲམ་གྱི་བྱ་བ་དང་ཟུང་འབྲེལ་བྱས་ཏེ་དྲིལ་བསྒྲགས་དང་སྒྲོག་འགྲེལ་གྱི་ནང་དོན་ཕུན་སུམ་ཚོགས་ཤིང་དབྱེ་ཞིབ་གཏིང་ཟབ་ཐུབ་པར་བྱས་ཡོད་ཅེས་གསུངས་པ་རེད།
（ཉི་དོན་དང་དཀོན་མཆོག་སྒྲོལ་མས་སྒྱུར་ཞུས་བྱས）